—Pimicha Israel lakénamijlo numájikare nakú pijló meꞌetení. 4 Kaja namá mékeka nulaꞌaká Egipto eyájena chapú iꞌimaká, nuwáꞌakaloje neká nateꞌeré eyá majó penaje. Nunakojó naꞌakana nakuja nuká. 5 Ñakele nemaꞌajika ee noꞌopiyá piyuke numájikare nakú pijló, neꞌemajé nuleꞌejena inaꞌukena, ajopana inaꞌukena chaje nuwátakale neká. Nuleꞌejé waja piyuke nakaje marí ejaꞌawá chu iꞌimakare. 6 Neká piyukeja iꞌimajeño nojló purákaꞌaloji lamáꞌatajeño ke, kaja nuꞌuwapakárena neꞌemakale, ke pimájika piyukeja Israel lakénamijlo —ke Tupana kemaká Moisesjlo.

7 Raú Moisés witúkaꞌari Israel lakénami ejo. Riphaka rejo ee, rawakata pheñawaꞌaní Israel lakénami eꞌiyayá. E riꞌimá najló mékeka Tupana kemaká nanaku yukuna. 8 Nemaꞌaká aú ripurákaꞌalo, piyukeja kemaño rijló:

—Aꞌa, walaꞌajé piyuke nakaje rimakare nakú wajló.

Raú Moisés paꞌaró piño rapumí chuwá riyukuna iꞌimajé Tupánajlo.

9 Riphá rejo. E Tupana kemari piño Moisesjlo marí ke:

—Chuwa nuyáꞌatajiko pijló juni juwákaꞌala eꞌiyowá, reyá nupuraꞌajó pijwaꞌaté, ajopana jemaꞌakáloje nupuraꞌakó pijwaꞌaté penaje. Nemaꞌajika ee nupuraꞌakó pijwaꞌaté, reyá aꞌajná ñoꞌojó naꞌajé nanakojó pipurákaꞌalo —ke Tupana kemaká rijló.

Rejomi Moisés iꞌimari piño rijló riyukuna mékeka rijwaꞌatéjena kemaká rijló, rimakare nakú najló iꞌimaká, nalaꞌakáloje riwakáraꞌaka neká ke penaje, neꞌemakáloje rileꞌejena inaꞌukena raú penaje.

10 Rejomi Tupana kemari piño Moisesjlo:

—Chuwa pipaꞌó, pimakáloje nuleꞌejena inaꞌukénajlo nalamáꞌatakaloje napéchuwa nojló penaje, rejomi nalaꞌakáloje puꞌují napéchuwa nojló. Pimaje kaja najló, nepakáloje naꞌarumaká eꞌiyayá. 11 Nuwata neꞌemaká lamáꞌatakeja. Meyake nuphaje pinaku kajruni juni juwákaꞌala eꞌiyowá marí ipuré iꞌiwátaje, pileꞌejena inaꞌukena amákaloje riká penaje. 12 Paꞌajé kaja najló marí ipuré jiꞌilá jená, nephaka piyá rawaꞌajé riwakajé. Riwakajé unká na kalé iphájeri marí ipuré jiꞌilá nakojé. Na kaꞌajná iphájika ee ipuré jiꞌilá nakojé, inaꞌuké kaꞌajná, ipirana kaꞌajná, nókana iꞌimajeri. 13 Eyá jaꞌapáñaajeri rená, numakare nakú, takaꞌajeri. Unká na jápalaje rinaku. Iꞌikajeri riwilá jipa aú kaꞌajná, ijijila aú kaꞌajná, nókana iꞌimajeri. Inaꞌuké kaꞌajná, pirájina kaꞌajná, iphájika ee ipuré nakojé riwakajé, nókana iꞌimajeri. Nemaꞌajika ee jema pirakana iꞌiwáwimi chojé aphoꞌokana mejé ejéchami, inaꞌuké iꞌijnajika ipuré awaꞌajé —ke Tupana kemaká Moisesjlo.

14 Raú Moisés witúkaꞌari riyukuna iꞌimajé najló. Rejomi nalamáꞌata napéchuwa, palá napechu iꞌimakáloje Tupana nakú penaje. Nepá kaja naꞌarumaká eꞌiyayá. 15 Moisés kemari piño najló:

—Ilamáꞌata ipéchuwa meyákejlo penaje, ketana unká na laꞌalaje riyajalo waꞌaté.

16 E kaja weji ke kala laꞌaká wakajé najmeꞌetá. Kajruni wani iꞌimari lapiyami; kajrú pichaní apíroꞌoka, ñaké kaja rimajákaꞌako, eꞌiyowá ke namaka juni juwákaꞌala iphaka ipuré jiꞌiwátaje. Reꞌiyayá nemaꞌá puwaꞌajné wani luwiluwí kaje mejé, riká mejé keroꞌótari najló. 17 Raú Moisés wáꞌari neká piyukeja reyá, nawakákoloje ipuré jiꞌilaje, re neꞌemakáloje Tupana awaꞌá penaje. 18 Kajrú wani ija jeñoꞌoká ipuré eꞌiyayá, Tupana witúkaꞌakale keraꞌathani eꞌiyowá. Kajrú reñoꞌoká reyá, iná káraꞌaka wakajé ke ija jeñoꞌoká, waꞌató ke ipuré ñakaꞌakó kaphí wani. 19 Ewá richaje ke kaphika luwiluwí kaje mejé iꞌimaká. Kaja ewaja Moisés puraꞌaró Tupana waꞌaté; Tupana puraꞌaró kaja rijwaꞌaté. Pichaní mejé ke rinúrupi mejé iꞌimaká.

20 Tupana witúkaꞌari ipuré jiꞌiwátaje. Reyá rimá Moisesjlo, ráchoꞌokoloje ipuré iꞌiwátaje penaje. Raú ráchoꞌo, iphari riꞌiwátaje. 21 E Tupana kemari rijló:

—Chuwa pipaꞌó piño papumí chuwá. Pimicha ajopánajlo, naꞌapáñaaka piyá rená, paꞌakare najló ipuré jiꞌilá iꞌimaká. Apala naꞌapáñaa riká, nawátakale nomákana. Naꞌapáñaajika ee riká, natakaꞌajé. 22 Nupurákaꞌalo lamáꞌatajeño inaꞌukena chaya nujwaꞌaté, lamáꞌatajeño kaja nekó, nuwajaka piyá neká —ke rimaká rijló.

23 Raú Moisés kemari rijló:

—Kaja naweꞌepí, unká náchoꞌolajo marí ipuré nakojé. Kaja nuꞌumá najló riyukuna mékeka pimaká rinaku. Kaja nephá marí ipuré jaꞌapí.

24 Eꞌiyonaja Tupana kemari rijló:

—Piwitúkaꞌa paineko riyukuna iꞌimajé piño najló. Kéchami pipaꞌajiko majó Aarón waꞌaté. Eyá nupurákaꞌalo lamáꞌatajeño inaꞌukena chaya nujwaꞌaté, ajopana waꞌaté, unká jaꞌapálajeño rená noꞌokare najló iꞌimaká eyá, nuwajaka piyá neká. 25 Raú Moisés witúkaꞌari riyukuna iꞌimajé piño najló.