Jetró iphaka Moisés nakú yukuna marí
18
Moisés yanaꞌajú ií iꞌimari Jetró, Madián eyaje riꞌimaká. Inaꞌuké purákaꞌalo lamáꞌatajeri Tupana waꞌaté riꞌimajika. Riká jemaꞌarí mékeka Tupana aꞌaká palá wani Moisés ñathé, rileꞌejena inaꞌukena waꞌaté yukuna; remaꞌá kaja Tupana jáchoꞌotaka neꞌemaká Egipto eyá yukuna. 2 Kaja júpimi ke Moisés yurika riyajalo, ruꞌumakáloje roraꞌapá waꞌaté iꞌimaká. Ruí iꞌimari Séfora. 3 Eyá iyamá riyani riyurí kaja rijwaꞌaté iꞌimaká. Pajluwaja riꞌirí ií iꞌimari Gersón, 4 eyá apú ií iꞌimari Eliézer. 5 Moisés, rijwaꞌatéjena, kele iꞌimaño desierto chu Tupana leꞌejé ipuré awaꞌá. Re neꞌemaké wakajé, Jetró jáchoꞌoro riñakaré chiyá, Moisés yajalo, eyá riyani, kele waꞌaté, neꞌejnakáloje ají ke Moisés amaje.6 E kaja Jetró iphari rinaku, rimá rijló:
—Nuká, piyanaꞌajú Jetró, iꞌijichari majó pamaje, piyuke piyajalo, eyá piyani, kele waꞌaté.
7 Ilé ke rimaká rijló aú, Moisés jáchoꞌoro wakaꞌapojo najalákaje, e rijlámaꞌo riyanaꞌajú jimaje, richiñoꞌó rijimá chiyá, 8 rejomi rimujlúkaꞌata neká ripajré jaꞌapejé. Re riꞌimá riyanaꞌajujlo mékeka Tupana wajaka faraón, Israel lakénami chona, riꞌimatákaloje neká Egipto eyájena liyá penaje yukuna. Riꞌimá kaja rijló Tupana jáchoꞌotaka neꞌemaká Egipto teꞌeré eyá iꞌimaká yukuna, mékeka namájika chapú kaje yajwé naꞌapájika ewá, piyukeja yukuna riꞌimá rijló. Riꞌimá kaja rijló Tupana aꞌajika kajrú wani nañathé yukuna. 9 Jetró jemaꞌaká riyukuna aú puꞌují wani ripechu laꞌakó, 10 raú rimá Moisesjlo:
—Palani iná puraꞌakó Tupana nakú palá, riꞌimatákale iká faraón, rijwaꞌatéjena, kele liyá. 11 Chapú wani nalaꞌajika iká iꞌimajika. Mékeka riꞌimataka iká naliyá yukuna jemaꞌakana aú nuweꞌepí Tupana cháꞌataka ajopana chiꞌinárikana.
12 Raú Jetró nori ripirana nakiyana, rikáraꞌatakaloje riká Tupánajlo, nephákale raꞌapí. Aarón, eyá pheñawaꞌaní Israel lakénami nakiyana, kele iꞌijnaño kaja rijwaꞌaté rejo. Najñá kaja rijwaꞌaté piraji rinókare iꞌimi, palá napechu iꞌimakale Tupana nakú.
13 Muní ke Moisés iꞌimaká purákaꞌaloji lamáꞌatakana nakuja Israel lakénami waꞌaté. Riká nakuja neꞌemá weꞌechú ketana; ajopana, ajopana ke, nephájika rinaku rijwaꞌaté puraꞌajó. 14 Marí ke riyanaꞌajú Jetró amaka aú kajrú nephaka Moisés nakú, rilamáꞌatakaloje najló purákaꞌaloji penaje, rimá rijló:
—Kajrú wani pilaꞌaká pijwaꞌatéjenajlo nakaje. Pikaja kalé, pajluwaja yáꞌaro, pilamáꞌatakaloje najló purákaꞌaloji penaje, eyá neká íkiꞌiruna iꞌimaño táraꞌakajo nakú weꞌechú ketana piwátakana nakú, napuraꞌakóloje pijwaꞌaté.
15 Raú Moisés kemari rijló:
—Kajrú inaꞌukena iphákano majó nunaku, nawátakale Tupana wátaka ke laꞌakana nakojé weꞌepíkana. 16 Unká paala neꞌemakachu pajwaꞌatéchaka, neꞌejnano kaja majó nuchaje purákaꞌaloji lamáꞌatakana yukuna kejáꞌaje nuliyá, numakáloje najló naka palani nalaꞌakáloje penaje. Numá kaja najló mékeka Tupana purákaꞌalo kemaká rinaku.
17 Raú riyanaꞌajú kemari rijló:
—Unká paala pikoja wani piká marí kaje laꞌakana nakú. 18 Nuweꞌepí payaꞌakó wani, ñaké kaja pijwaꞌatéjena jayaꞌakó piwátakana nakú. Unká méñoꞌojo pilaꞌalá piyuke wani nakaje pikoja, pijápakaꞌala cháꞌatakale piká. 19 Pemaꞌá numaká pijló, pilaꞌakáloje ñaké penaje: Tupana aꞌajeri piñathé rilaꞌakana aú. Palani pipuraꞌakó Tupana waꞌaté nachaya nájeka inaꞌuké yúchaꞌako pajwaꞌatéchaka; 20 palani kaja pewíñaꞌata neká Tupana purákaꞌalo nakú, naweꞌepíkaloje palá pajwaꞌatéchaka iꞌimakana, nalaꞌakáloje raú palá penaje. 21 Eyá pikulaje kaja inaꞌuké eꞌiyayá neꞌiyajena, neꞌemakáloje paꞌapiyatéjena penaje. Neꞌiyajena iꞌimajeño mil inaꞌukena wakáraꞌajeño; naꞌapiyatéjena iꞌimajeño kaja cien inaꞌukena wakáraꞌajeño; eyá naꞌapiyatéjena iꞌimajeño kaja cincuenta inaꞌukena wakáraꞌajeño; eyá naꞌapiyatéjena iꞌimajeño kaja iyamá théꞌela kele inaꞌukena wakáraꞌajeño penaje. Marí kajena neꞌemajika: kaliyáruna neꞌemajika; Tupana jaꞌapí iphájeño; nemaká nakaje nakú najló, keja nalaꞌajika riká richuwá; unká kaja nayurílaje ajopana aꞌaká najló liñeru, nalaꞌakáloje najló nakaje nawátaka ke. 22 Neká lamáꞌatajeño purákaꞌaloji inaꞌukejlo, eyá purákaꞌaloji iꞌimajíkare, unká meke laꞌajé nalamáꞌatalaje, nemaje nakú pijló, pilamáꞌatakaloje riká najwaꞌaté penaje. Ilé ke ilaꞌajika ee, palá aꞌajika pañathéchaka purákaꞌaloji lamáꞌatakana aú, ñakele unká pikoja kalé pilamáꞌatajika purákaꞌaloji najló. 23 Pilaꞌajé marí numíchaka pijló ke, Tupana wakáraꞌajika ee pilaꞌaká ñaké. Rejéchami kaja piwatánaꞌajika kemachi pijápakaꞌala liyá. Inaꞌuké iphaño majó, pilamáꞌatakaloje najló purákaꞌaloji penaje, paꞌajeño nañakaré chojé puꞌují napechu ke, nalamáꞌatajikale najló purákaꞌaloji —ke Jetró kemaká Moisesjlo.
24 E kaja Moisés laꞌarí riyanaꞌajú kemaká rijló ke: 25 rikulá nachaje weꞌepíkaño Israel lakénami eꞌiyayá, e raꞌá neká nawakáraꞌajeño penaje. Neꞌiyajena iꞌimaño mil inaꞌukena wakáraꞌajeño; naꞌapiyatéjena nakiyana iꞌimaño kaja cien inaꞌukena wakáraꞌajeño; eyá ajopana naꞌapiyatéjena nakiyana iꞌimaño kaja cincuenta inaꞌukena wakáraꞌajeño; eyá ajopana nakiyana iꞌimaño kaja iyamá théꞌela kele inaꞌukena wakáraꞌajeño. 26 Neká lamáꞌatakeño purákaꞌaloji najló iꞌimajika. Eyá lakaꞌapheji rilamáꞌatakana iꞌimajika najló ee, nawáꞌake neká Moisés ejo, rilamáꞌatakaloje najló purákaꞌaloji penaje, ke nalaꞌajika iꞌimajika.
27 E kaja Moisés yanaꞌajú iꞌimari riyukuno Moisesjlo, rejomi ripaꞌó piño riñakaré ejo.