—Chuwá paꞌá wajló juni weꞌerakáloje penaje.

Raú Moisés kemari najló:

—¿Naje chi imá nojló ilé ke, noꞌokáloje ijló juni penaje? ¿Meke kaꞌajná ipechu Tupana nakú?

3 Eꞌiyonaja kajrú nanúrupi chu makáraꞌatajiko, raú makaꞌaní wani neꞌeratájika juni. Ilé ke riꞌimaká aú najló, napuraꞌó Moisés nakú puꞌuwaré, nemaké kaja rijló:

—¿Naje chi páchoꞌota weꞌemaká Egipto teꞌeré eyá iꞌimaká? Watakaꞌakáloje maárowa penaje, piyukeja wayani, eyá wapirana kajena waꞌaté, juni iꞌiratákana meꞌekanami. ¿Ripenaje chi piwaꞌa weꞌemaká majó?

4 Raú Moisés puraꞌaró Tupana waꞌaté, rimá rijló:

—¿Meke nulaꞌajika mariruna inaꞌukena waꞌaté? Yewíchaja neꞌekataka nuwilá jipa aú chuwa.

5 Raú Tupana kemari rijló:

—Paꞌapá natukumá, piwaꞌa pijwaꞌató mekeleja Israel lakénami wakáraꞌajeño nakiyana. Pijñaꞌajé kaja pikutiware pijwaꞌató, piwaraꞌakare aú juni Nilo Egipto e iꞌimaká. 6 Re ipuré Horeb jiꞌiwata nuwátaje piká jipa nakú. Rejo piphájika ee, piwaraꞌajé riká jipa pikutiware aú, raú juni jeñoꞌojeri jipa eꞌiyayá inaꞌukejlo, neꞌerakáloje riká penaje.

Moisés laꞌarí Tupana kemaká rijló iꞌimaká ke. Piyuke pheñawaꞌaní iꞌimaño rijwaꞌaté ijlú chu riwaraꞌá jipa, juni jeñoꞌokáloje reꞌiyayá penaje. Raú juni jeñoꞌorí reꞌiyayá najló, neꞌerakáloje riká penaje. 7 Rejomi Moisés aꞌarí riká pukunaji ií Meribá, ke, Israel lakénami puraꞌátakale rijló, unkale juni iꞌimalá rewá. Raꞌá piño rií Masá, ke, natáꞌakale Tupana, nemakale: “¿E chi kaꞌajná Tupana wajwaꞌaté, unká kaꞌajná?”, ke.

8 Maárejechami amalecítana nakiyana iꞌijnaká Refidim ejo najwaꞌaté nókajo. 9 Ilé ke Moisés weꞌepika neꞌejnaká najwaꞌaté nókajo aú, rimá Josuejlo:

—Pikulá achiñana eꞌiyá mekeleja, piꞌijnakáloje najwaꞌaté amalecítana nakiyana waꞌaté nókajo. Eyá muní nuꞌujnajika ipuré jiꞌiwátaje, re nuꞌumajé nukutiware nukapi ke, Tupana wakáraꞌakareno nujñaꞌaká nujwaꞌató.

10 Raú Josué laꞌarí rimaká rijló ke, aꞌapona ke Moisés, Aarón, eyá Hur, kele iꞌijraká yenuri jiꞌiwátaje. 11 E kaja ajopana keñoꞌoñó pajwaꞌatéchaka nókakano. Jáchoꞌotakeja Moisés aꞌanapitá iꞌimajika ketana, Israel lakénami cháꞌatajika neká nókakajo aú. Eyá riwitúkaꞌatajika raꞌanapitá kewá, amalecítana nakiyana cháꞌatajika neká. 12 Kaja ewaja Moisés aꞌanapitá jayaꞌaró, raú nayáꞌata jipa, riyáꞌakoloje rinaku penaje. Rejomi Aarón, Hur, kele patañó raꞌanapitá. Pajluwaja patarí apoꞌojó pitá, eyá apú patarí apoꞌojó pitari, ke napataká raꞌanapitá, riꞌimakáloje jáchoꞌotakeja penaje. Ilé ke neꞌemaká, aꞌajná kamú jaꞌakó ejená. 13 Raú Josué, rijwaꞌatéjena waꞌaté, cháꞌataño amalecítana nakiyana nókakajo aú.

14 Rejomi Tupana kemari Moisesjlo:

—Pilanaꞌá icháꞌataka neká nókakajo aú yukuna, riyuríkoloje aꞌajná ñoꞌojó chami iꞌimajíkañojlo, naweꞌepíkaloje riyukuna penaje.