—Palani Tupana kapichátakajla weꞌemaká Egipto teꞌeré nakú weꞌemaké wakajé. Rewá kajrú riꞌimi mothoꞌokeja yáꞌajiko wawaꞌá iꞌimajika. Rewá kaja palá wajñájika waꞌajnewá, wamanoꞌojika ejé iꞌimajika. Eyá iwaꞌa ta weká majó desierto chojé, watakaꞌakáloje meꞌepijí nakú maárowa.

4-5 E Tupana kemari Moisesjlo:

—Nuwakáraꞌaje chuwa aꞌajnejí jaꞌakó ijló jeꞌechú chiyá. Piyukeja iꞌijnajíkano riwayoꞌojé weꞌechú kaꞌalá keja. Iwayoꞌojé rinakiyana, iweꞌepíjika palá ajñátajika riká riwakajeja ke ñóꞌopekano. Eyá jápakaje tajnájiko keja, iwayoꞌojé iyamá kálajlo ke penaje. Nuwata riweꞌepíkana mékajenaka jemaꞌañó noꞌopiyá, eyá mékajenaka unká jemaꞌalaño noꞌopiyá —ke Tupana kemaká rijló.

6 Rejomi Moisés, Aarón waꞌaté, iꞌimaño riyukuna najló:

—Chuwajá laínchu iweꞌepeje Tupánaka jáchoꞌotaka iꞌimaká Egipto teꞌeré eyá. 7 Muní lapiyami amaje Tupana leꞌejé mejámaꞌatani. Kaja remiꞌichá akhiꞌichaka rimaná. Akhiꞌichaka aú wamaná, akhiꞌichá kaja rimaná, walaꞌakale riwakáraꞌaka walaꞌaká ke. ¿Na chi walaꞌá akhaꞌakáloje wamaná ilé ke penaje?

8 E Moisés kemari piño najló:

—Tupana aꞌajeri ijló aꞌajnejí. Laínchu raꞌajé ijló riꞌimi ajñákaloje penaje, eyá lapiyami raꞌajé ijló kujnú kaje. Kaja remaꞌá kajrú wani akhaꞌaká wamaná Aarón waꞌaté. Unká wamanaja kalé akhaꞌá, Tupana maná akhaꞌá kaja.

9 Rejomi Moisés kemari Aaronjlo:

—Pimicha najló piyukeja, neꞌejnakáloje majó, natáraꞌakoloje Tupana jimaje penaje. Riká jemaꞌarí nakhaꞌaká wamaná pajlokaka.

10 E Aarón iꞌijnari najló kemaje. Ripuraꞌakó najwaꞌaté eꞌiyowá ke, nayakáꞌako desierto lokoꞌopánejo. Re namá Tupana leꞌejé mejámaꞌatani pataká juni juwákaꞌala eꞌiyayá. 11 Reꞌiyayá Tupana puraꞌaró Moisés waꞌaté, rimá rijló:

12 —Nuká jemiꞌichari Israel lakénami akhiꞌichaka imaná. Marí ke pimájika najló nunaku: “Laínchu ajñaje riꞌimi, eyá lapiyami ajñaje kujnú kaje, imanoꞌojika ejená. Marí kaje aú iweꞌepeje Paminá wánika riká, ipechu iꞌimakare chojé kaphí”, ke pimájika najló nunaku —ke Tupana kemaká Moisesjlo.

13 E kaja riwakajé laínchu kajrú putúruna witúkaꞌaka rejé. Napajré iꞌimaká awaꞌá kajrú natami yáꞌako. Neká nenó, najñákaloje neꞌimi penaje. Eyá muní ke najmeꞌetaka piño, amaño kajrú ijamani iꞌimaká. 14 Raꞌapaka ejomi, namá jarephí, ituꞌurú ke, teꞌerí jimá iꞌimaká. 15 Mamákanaru riꞌimaká Israel lakénamijlo, raú nemá pajlokaka:

—¿Na chi kele?

Moisés kemari najló:

—Aꞌajnejí, Tupana wakáriꞌichaje wajló, kaari. 16 Marí ke Tupana kemaká wajló rinaku, wawayoꞌokáloje rinakiyana penaje, palá riphájika wajló piyukeja ejé. Iyamá litros ewá wajñaꞌajé apujlo, apujlo ke, ke Tupana kemaká wajló rinaku —ke Moisés kemaká najló.

17 E najñaꞌá riká rimaká najló ke. Neꞌiyajena ñaꞌañó rená raꞌaká najló jaꞌapejé, neꞌiyajena cháꞌataño rená. 18 Palá riphájika nanakojé lokópaꞌala, nawayoꞌojíkano riká. Moisés kemari kaja najló:

19 —Unká na lamáꞌatalaje rijlupemí muní kejlo penaje.

20 Eꞌiyonaja neꞌiyajena unká jemaꞌaké raꞌapiyá. Nalamáꞌatake rinakiyana muní kejlo penaje. Muní ke kajrú jamoꞌonana iꞌimajika reꞌiyá, raú puꞌuwaré wani rama iꞌimajika. Ilé kaje aú Moisés yúchaꞌaro nachá.

21 Lapiyami kaꞌalá keja nawáyoꞌojika riká, palá riphájika nanakojé ke ñóꞌopekano. Eyá rijlupemí yuríjikaro kamú kamaré japi, akhoꞌotákero. 22 Pajluwa kuwáꞌata ke kala iꞌimajika wakajé, nawayoꞌoké ñóꞌope riká, riꞌimakáloje najló iyamá kálajlo ke penaje. Paꞌu kele litros apujlo, apujlo ke najñaꞌajika riká najluwa riwakajé. Rejomi nawakáraꞌajeño nakiyana amaño najñaꞌaká riká kajrú, raú neꞌejná Moisés chaje riyukuna iꞌimajé rijló. 23 E Moisés kemari najló:

—Tupana wakáraꞌaka ke nalaꞌaká. Muní watánaꞌakaje wakajé; Tupana leꞌejé weꞌechú kaꞌalá riká. Ñakele chuwajá imothoꞌojé piyukeja nakaje iwátajikare mothoꞌokana, eyá rijlupemí yuríjikaro ilamáꞌataje muní kejlo penaje.

24 Nalaꞌá Moisés wakáraꞌaka neꞌemaká ke. Rijlupemí, nayuríjikare watánaꞌakaje wakajejlo penaje, iꞌimakeri palani joꞌó muní ke. Unká jamoꞌonana iꞌimaké reꞌiyá, unká kaja rama iꞌimaké puꞌuwaré. 25 Watánaꞌakaje iꞌimaká wakajé Moisés kemari najló:

—Ñakele ajñaje aꞌajnewá chuwajajlo penaje. Watánaꞌakaje wakajé chuwajá, Tupana leꞌejé weꞌechú kaꞌalá riká. Puꞌutheni chuwá unká aꞌajnejí iꞌimalaje, iwayoꞌokáloje penaje. 26 Pajluwa kuwáꞌata ke kala riwayoꞌokana iꞌimajika, eyá watánaꞌakaje iꞌimaká wakajé, iyamá kuwáꞌata ke kala laꞌaká wakajé, unká na iꞌimalaje —ke rimaká najló.

27 Eꞌiyonaja neꞌiyajena iꞌijnaño watánaꞌakaje iꞌimaká wakajé riwayoꞌojé. Unká na iꞌimalá nawayoꞌokáloje penaje. 28 Raú Tupana kemari Moisesjlo:

—¿Meketana chi júpika pileꞌejena inaꞌukena laꞌajika marí ke nuká? Unká wani nemaꞌalá noꞌopiyá. 29 Piweꞌepí noꞌoká ijló watánaꞌakaje, iwatánaꞌakaloje riwakajé penaje. Ñaké iꞌimakale jápakaje tajnako wakajé, noꞌó ijló ñóꞌope aꞌajnejí, riꞌimakáloje iyamá kálajlo penaje. Ñakele watánaꞌakaje wakajé unká nuwátala náchoꞌoko nañakaré chiyá —ke Tupana kemaká Moisesjlo.

30 Ñaké iꞌimakale nemaꞌá raꞌapiyá, unká najápala watánaꞌakaje iꞌimaká wakajé.

31 Israel lakénami aꞌañó riká aꞌajnejí ií “maná”, ke. Nakaje icha ijí, kapajé nojé, jareni, ke ramákana iꞌimaká. Meríyaꞌa, munumunú jalá waꞌaté kechípaꞌakanami mela riꞌimaká. 32 Rejomi Moisés kemari najló:

—Marí ke Tupana wakáraꞌaka walaꞌaká: “Ilamáꞌata maná iyamá litros ke ñóꞌopeka, ilamáꞌatakaloje ilakénamijlo penaje, namákaloje mékajeka riká, aꞌajnejí noꞌokare ijló desierto chu iꞌimaká wakajé, nóchoꞌotaka iꞌimaká Egipto teꞌeré eyá ejomi”, ke riwakáraꞌaka weká —ke Moisés kemaká najló.

33 E rimá Aaronjlo:

—Pijiꞌichá kuwáꞌala pilamáꞌatakaloje iyamá litros puꞌuthé maná richojé. Rejomi piyureje riká Tupana jimaje ke, walakénami amákaloje riká penaje —ke rimaká rijló.

34 Rilaꞌá ñaké riká. Riyurí riká kuwáꞌala kaichama, Tupana purákaꞌalo iꞌimakare chu awaꞌá. Re nalamáꞌata riká, aꞌajná ñoꞌojó chami iꞌimajíkañojlo penaje.

35 Riká maná aꞌajnekanami neꞌemá iyamá inaꞌukena leꞌejé kele jarechí ketana, neꞌemaká desierto chu wakajé ketana. Riká najñake, aꞌajná nephaka Canaán teꞌeré awaꞌajé ketana.