Marí ke Moisés, ajopana waꞌaté, atanika Tupánajlo riyale
15
Rejomi naꞌó Tupánajlo ataneje; marí ke natanika rijló:“Notaneje Tupánajlo, richáꞌatakale wajló neꞌemaká.
Rikapichata piyukeja neká: kawaruna, nanaku jaꞌapájeño, kele rikapichata wajló junápeje.
2 Notaneje Tupánajlo, ripalamane nuꞌumakale.
Notaneje rijló, nuꞌumatájeri riꞌimakale.
Notaneje rijló, richojé nupechu iꞌimakale kaphí.
Palá nupuraꞌajiko rinaku.
Tupana, nuchiꞌiná michuna pechu iꞌimajíkare chojé kaphí, riká.
Notaneje rijló, piyuke riweꞌepíkare laꞌakana yukuna nuꞌumajé rijló notaniko.
3 Wachaya nókajero wani Tupana.
Paminá wani riká.
4 Rikapichata faraón leꞌejena suráana michuna junápeje wajló iꞌimaká.
Raꞌapiyatéjena michuna, ajopana chaje iꞌimakaño waꞌató, takaꞌañó kaja junápeje iꞌimaká.
5 Riphuta chojé naꞌó jipa ke,
rejomi riphuta chojé juni apáraꞌatari neká.
6 Tupana, ajopana chaje wani piweꞌepika nakaje laꞌakaná.
Piká cháꞌatari chapú pinaku péchuruna.
9 Napechu iꞌimá nanakuwá:
‘Wechoꞌótaje neká, wephátajika neká ejená,
rejomi wakaꞌajé naliyá nanane,
watamáꞌatakaloje wawátajikare kaje wajluwa,
rejomi wenótaje neká’, ke napechu.
10 Eꞌiyonaja, paphoꞌoká aú, juni jalomi ajmíloꞌotari neká;
pikaéjane aú ja pikapichata neká.
Juni chipúkakaꞌalo jakojé ke naꞌakó, chumu jaꞌakó junápeje ke.
11 Tupana, unká apú iꞌimalá piká ke.
Unká piweꞌepila puꞌuwaré laꞌakaná;
pikaja kalé weꞌepiri piyukeja nakaje laꞌakaná.
Unká na apú iꞌimalá piká ke kaja, weꞌepiri nakaje laꞌakaná piká ke kaja.
Palani waja nakaje piweꞌepíkare laꞌakaná,
ñakele palani pinaku puraꞌakano wajló,
palani wani piꞌimakale.
13 Íkiꞌija piwátaka weká, piꞌimatákarena kapichákajo liyá.
Piká wáꞌajeri kaja weká piteꞌeré, palani wani iꞌimakare ejo.
17 Tupana, piwáꞌaje kaja weká piꞌiwapakárena pijluwa iꞌimaká,
weꞌemakáloje pileꞌejé ipuré ejo penaje.
Re piñakaré pilaꞌakare pijluwa iꞌimaká.
18 Matajnako wani piꞌimajika inaꞌuké wakáraꞌajeri”,
ke natanika Tupánajlo.
Juni ipijílani yukuna marí
22 E Moisés jaꞌapátari Israel lakénami juni jalomi Kerálani eyá, ají ke aꞌajná desierto Sur ejo. Weji ke kala ketana naꞌapaka rejo. Unká mérowa nephátake juni neꞌerakáloje penaje. 23 Kaja ewaja nephá juni awaꞌajé, eꞌiyonaja ipijílani wani riꞌimaká, raú unká méñoꞌojo neꞌeralá riká. Ñakele naꞌá rií Mará, ke. (Ipijini ke kemakánaka Mará napuraꞌakó chu.)
24 Ilé ke riꞌimakale, kajrú nakhaꞌaká piño Moisés maná, nemá pajlokaka: “¿Na chi weꞌerajé?”
25 Raú Moisés puraꞌaró piño Tupana waꞌaté, raꞌakáloje nañathé penaje. Tupana yaꞌatari rijló pajluwana aꞌawaná kawakánani, rikaꞌakáloje riká junápeje penaje. Moisés kaꞌarí riká rakojé, raú pumélani juni laꞌakó, rejéchami piyukeja neꞌeraká riká. Re Tupana atáꞌari neká, ramákaloje mékeka napechu iꞌimaká rinaku penaje. Re rimá kaja najló nakaje nakú, neꞌemakáloje ripurákaꞌalo jaꞌapiyá penaje, nalaꞌakáloje rimaká ke.
26 Re Tupana kemari kaja najló: “Nuká Tupana, ipechu iꞌimakare chojé kaphí. Itejmoꞌótajeri penaje iꞌimaká nuká. Iweꞌepí itukumá nakaje laꞌakana, numájikare nakú ijló. Ilaꞌajika ee piyukeja nakaje palá, nuwátaka ke, ñaké kaja jemaꞌajika ee nakaje nuwakáraꞌakare ilaꞌaká jaꞌapiyá, unká nuwajálaje iká, nuwajaka Egipto eyájena iꞌimaká ke”.
27 Reyá naꞌapá piño, iphaño Elim ejé. Re doce muthú, re kaja setenta punama kaje ina iꞌimaká, raú nayuró juni awaꞌá.