Tupana aꞌaká nañathé juni jalomi Kerálani kuwáꞌakana aú yukuna marí
14
Tupana puraꞌaró piño Moisés waꞌaté, rimá rijló:2 “Pimá Israel lakénamijlo, napaꞌakóloje wejápaja nayámojo penaje, ñakele juni jalomi Kerálani turenaje itáraꞌataje ipajré. 3 Raú Faraón pechu iꞌimajeri inaku: ‘Mapeja nachiraꞌakó ta desierto eꞌiyowá, unkale naweꞌepila ta méñoꞌojo iꞌijnakana’, ke. 4 Unká nopiyákalaje ripechu; nuyureje rilaꞌaká nakaje ripechu nakú riꞌimaká ke, rechoꞌótakaloje iká piño penaje. Nuká cháꞌatajeri piño riká, rileꞌejena suráana waꞌaté. Raú amaje piño nakaje nuweꞌepíkare laꞌakana; raú kaja Egipto eyájena weꞌepéjeño Paminá wani nuká”, ke Tupana kemaká Moisejlo.
Raú Moisés wakáraꞌari nalaꞌaká Tupana kemaká rijló ke. 5 Reꞌiyowá ke Egipto eyájena kemaká neꞌemakánajlo: “Kaja Israel lakénami iícho maáreya”.
Ilé ke nemaká neꞌemakánajlo aú rijimá apiyákaro; rijwaꞌatéjena jimá apiyákaro kaja. Rejéchami nemaká pajlokaka: “¿Meke laꞌajé chi neñáicha weká? Pachá kaja unká na jápalaje wajló chuwaka”.
6 Raú faraón wakáraꞌari piyuke rileꞌejena suráana lamáꞌataka peꞌiyowa jaꞌapaka, kawaruna waꞌaté, nechoꞌótakaloje neká richu penaje. 7 Seiscientos peꞌiyowa jaꞌapaka, palá nojé reꞌiyayá iꞌimakare, riwakáraꞌa nalamáꞌataka, richu nechoꞌótakaloje neká penaje. Pajluwano ke, pajluwano ke, nawakáraꞌajeño iꞌijnajika peꞌiyowa jaꞌapaka chu. 8 Unká Tupana apiyákala faraón pechu; riyurí rilaꞌaká nakaje ripechu nakú riꞌimaká ke, rechoꞌótakaloje neká penaje. Kaja Tupana laꞌá kajrú nakaje ripechu aú iꞌimaká, raú riyurí Isarael michú lakénami jáchoꞌoko reyá iꞌimaká.
9 E kaja Egipto eyájena jaꞌañó nechoꞌótaje, iphátaño neká yaꞌajná juni jalomi Kerálani turená. 10 Namaka aú faraón waíchaka, piyuke rileꞌejena suráana waꞌaté, nakeroꞌó kajrú wani. Mawó nemaká Tupánajlo, raꞌakáloje nañathé penaje, 11 e nemá Moisesjlo.
—¿Na penaje ta páchoꞌota weꞌemaká reyá? ¿Unká chi támijimina kaꞌakelana iꞌimalá Egipto e iꞌimaká, piwáꞌale weꞌemaká majó, wakapichákoloje maárowa desierto chu penaje? ¿Na penaje piwaꞌa ta weꞌemaká reyá? 12 Wajápalareja mapeja Egipto eyájenajlo, ke wemájika pijló. Palani wajápajika najló mapeja iꞌimajika, eyá chuwa nakapichátaje weká piyukeja meꞌetení maare desierto chu.
13 Moisés kemari najló:
—Ikeroꞌoniño, ilaꞌá ipéchuwa kaphí Tupana chojé. Meꞌetení amájika mékeka Tupana laꞌajika neká, riꞌimatákaloje iká naliyá penaje. Ileruna Egipto eyájena suráana amákarena meꞌetení, unká amálaje piño neká aꞌajná ñoꞌojó chami. 14 Iꞌijnatániña ipéchuwa kajrú wani; iweꞌepíniña ijluwa; manaꞌija iꞌimá. Unká iká kalé nókajeño najwaꞌaté; Tupana nókajero najwaꞌaté ichaya.
15 E Tupana kemari Moisesjlo:
—¿Naje pilaꞌá pikó mawó wani, noꞌokáloje iñathé? Pimá pijwaꞌatéjenajlo, naꞌapákaloje pitukumajo penaje. 16 Eyá piká jáchoꞌotajeri pikutiware juni jalomi chaje, ritamákaꞌatakoloje paliyáaka raú, ikuwáꞌakaloje paꞌanojo pitá riwami chuwá, makajreni nakuwá. 17 Unká nopiyákalaje Egipto eyájena pechu; nuyureje nalaꞌaká napechu nakú riꞌimaká ke, najñaꞌakóloje piño inaku penaje. Rejéchami nuyaꞌatájika najló naka nuweꞌepika laꞌakana, naweꞌepíkaloje raú meke laꞌajérika nuká penaje. Nucháꞌataje faraón, rileꞌejena suráana waꞌató. 18 Namájika aú mékeka nukapichátajika piyuke faraón leꞌejena suráana, naleꞌejé peꞌiyowa jaꞌapaka, kecha nakawarútena waꞌaté, rejéchami Egipto eyájena weꞌepíjika Paminá wani nuká —ke Tupana kemaká rijló.
19 E kaja nephá nawaꞌajé, rejéchami Tupana waꞌatéjeri, jeꞌechú chiyaje, iꞌijnakérino juni juwákaꞌala eꞌiyowá natukumá, pajnoꞌokó nayámojo pumitá. 20 Riká juni juwákaꞌala tamákaꞌatari neká paliyáaka, raú lapí ke riꞌimaká faraón leꞌejena suráana iꞌimaká ewajlo. Eyá palá rikamaré pataká Israel lakénami iꞌimaká ewajlo, raú unká meke laꞌajé Egipto eyájena iphátala neká lapí ketana.
21 E Moisés jáchoꞌotari rikutiware juni jalomi chaje, raú Tupana wakáraꞌari karená aphoꞌoká lapí ketana kaphí wani. Raú juni jalomi tamákaꞌataro paliyáaka, kaja makajreni peꞌiyowá iꞌimaká. 22 Riká jiwami chuwá Israel lakénami kuwáꞌaño paꞌanojo pitá, kaja iyamá pumitanó juni iꞌimaká nawaꞌó.
23 Egipto eyájena leꞌejena suráana kuwáꞌaño kaja nápumichu richuwá, kajrú peꞌiyowa jaꞌapaka chu. Peꞌiyojechá neꞌemaká nápumichu. 24 Eyá lapiwá Tupana yakáꞌaro Egipto eyájena leꞌejena suráana chaje juni juwákaꞌala, keraꞌathani ke iꞌimaká eꞌiyayá, raú apú ke napechu laꞌakó. 25 Waꞌaté ke Tupana apichátaka najló naleꞌejé peꞌiyowa jaꞌapaka jiꞌimá, raú unká meke laꞌajé raꞌapala palá. Kaja ewaja Egipto eyájena kemaño pajlokaka:
—Iꞌijná wapaꞌachó maáreya, kaja Nachiꞌinárikana noka wajwaꞌaté nachaya chuwa.
26 Kaja Israel lakénami kuwaꞌa paꞌanojo pitá piyukeja, rejéchami Tupana kemaká Moisesjlo:
—Chuwa páchoꞌota piño pikutiware juni jalomi chaje, ripaꞌakóloje piño rapumí chuwá nachá penaje, raú piyuke nakapichákoloje rakojé.
27 Raú Moisés jáchoꞌotari rikutiware juni jalomi chaje. Lapiyami namá kaja juni jalomi paꞌakó piño rapumí chuwá. E Egipto eyájena atáꞌañojla neñaakojla nayámojo piño, eꞌiyonaja unká meke nalaꞌalá, aꞌajnáreje keja juni iphátaka neká. Raú Tupana kapichátari neká piyukeja juni jalomi jakojé, 28 unká na pajluwaja nanakiyánami yurilo. 29 Eyá Israel lakénami kuwáꞌaño palá riꞌimaká teꞌerí makajreni eꞌiyowá, juni jiwami chuwá.