Jacob iꞌijnaká Egipto teꞌeré ejo yukuna marí
46
Raú nalamáꞌata piyuke nanane, neꞌejnakáloje reyá penaje. E náchoꞌo reyá, najñaꞌatá piyukeja nanane najwaꞌató. Kaja ewaja nephá Beerseba teꞌeré ejé. Re Jacob nori ripirana nakiyana Tupana, raraꞌapá michú pechu iꞌimajíkare chojé kaphijlo. Re nakamato. 2 Riká lapí Tupana puraꞌaró Jacob waꞌaté ritapú, riwaꞌa rijló:—Jacob.
—Maare nuká —ke raꞌajipaká.
3 —Nuká Tupana, paraꞌapá pechu iꞌimajíkare chojé kaphí nuká. Pikeroꞌoniño Egipto teꞌeré ejo iꞌijnakana piyá, nulaꞌajíkale piká palá, raú pilakénami iꞌimajeño íkiꞌiruna wani re. 4 Nuká iꞌijnajeri pijwaꞌaté rejo; nuká kaja jáchoꞌotajeri piño pilakénami reyá piteꞌeré nakojé. Pitajnájiko wakajé, José iꞌimajeri pawaꞌá —ke Tupana kemaká rijló lapí ritapú.
5 E muní ke naꞌapá piño reyá. Israel yaní wakáraꞌaño naraꞌapá, nayani, naluna, kele iꞌijnaká peꞌiyowa jaꞌapaka chu, faraón wakáraꞌakare najló iꞌimaká chu. 6 Ilé ke Jacob, rijwaꞌatéjena, kele iꞌijnaká Egipto teꞌeré ejo. Nawaꞌa kaja napirana jémana pirakana, ovéjana, kajena rejo. Piyukeja nakaje nakapi iꞌimakare Canaán teꞌeré e najñaꞌatá najwaꞌató. 7 Piyukeja riyani, rilakena, kele iꞌijnaño kaja rijwaꞌaté.
26 Setenta y seis inaꞌukena neꞌemaká iꞌijnaño Egipto teꞌeré ejo. Achiñánaja kalé nalapaꞌatá, unká nalapaꞌatala naluna, nayani waꞌaté.
28 E kaja naꞌapá juká iꞌimaká. Yewíchaja nephaka ee, Jacob wakáraꞌari Judá iꞌijnaká natukumó riyukuna iꞌimajé Josejlo, riꞌijnakáloje Gosen teꞌeré ejo namaje. Raú Judá iꞌijnari riyukuna iꞌimajé rijló. 29 E kaja riphá José nakú, iꞌimari rijló nephaka yukuna. Nephaka Gosen teꞌeré ejo ee, José wakáraꞌari rijwaꞌaté jápajeño lamáꞌataka rijló peꞌiyowa jaꞌapaka, riꞌijnakáloje richu raraꞌapá amaje. E kaja riꞌijná ramaje, iphari rinaku, e rimawíloꞌo riká, re riyá júpija raraꞌapá waꞌaté. 30 Júpichami Jacob kemaká rijló:
—Kaja chuwa nomicha piká, re joꞌó kaja joꞌó piká. Chuwa palani nutakaꞌakajla, nomíchaka piká ejomi.
31 Re napuraꞌó pajwaꞌatéchaka meketánaja, e José kemari rejénajlo:
—Chuwaka nuꞌujichaka iphíchaka yukuna iꞌimajé weꞌemakana faraónjlo. Numaje rijló: “Kaja nojena iphicha Canaán teꞌeré eyá; majó nephicha nunaku, nayuríkoloje nujwaꞌaté maare penaje. 32 Kaja nephátiya napirana najwaꞌató: ovéjana, jémana pirakana, kajena. Piyukeja nanane najiꞌichá majó. Ovéjana, jémana pirakana, kele lamáraꞌakana nakú najápano”, ke numájika rijló.
33 Riwáꞌajika ee imaná, rimaje kaꞌajná ijló: “¿Na nakú chi ijapa?” 34 Raú imaje rijló: “Ovéjana lamáraꞌajeño weká. Riká wajápakaꞌala; rinákuja kaja wachiꞌiná michuna jápake iꞌimajika”. Marí ke imájika rijló aú, riyureje ijló Gosen teꞌeré, iꞌimakáloje rewá penaje. Raú unká meke laꞌajé Egipto eyájena iꞌimalaje ijwaꞌaté pajñakani, unkale nawátala ovéjana lamáraꞌajeño waꞌaté iꞌimakana, “wawejáputena neká”, ke napechu iꞌimakale nanaku —ke José kemaká najló.