—Eꞌewé nuká, José. ¿E chi re joꞌó kaja noraꞌapá?

Marí ke rimaká najló aú nakeroꞌó kajrú wani, namákale piño riká. Raú unká méñoꞌojo naꞌajipalá rijló rejéchami. 4 José kemari najló:

—Chuwa, ilaꞌá nojló nakaje, jatató majó nowaꞌajé.

Raú natató rawaꞌajé, rimá najló:

—Nuká José, eꞌewé nuká. Iká aꞌañó nuꞌumaká júpimi ajopana inaꞌukénajlo liñeru aú, penájemi nuká. 5 Ipechu iꞌimaniña chapú inakuwá, ilaꞌakale ñaké nuꞌumaká. Tupana wakáraꞌari nuꞌumaká majó itukumá, nuꞌumatákaloje inaꞌuké kapichákajo liyá penaje. 6 Kaja iyamicha jarechí cha weká, unká na iphala wamena eꞌiyowá, re joꞌó kaja yuriro pajluwa théꞌela kele jarechí watukumá. Nejátajejla nakaje icha ijí, eꞌiyonaja unká na iphálaje. 7 Tupana wakáraꞌari nuꞌumaká majó itukumá, nulamáꞌatakaloje aꞌajnejí ipé penaje, iká, iyani, ilakénami, kele iꞌimakáloje kajrú marí teꞌerí nakú, maáreya aꞌajná ñoꞌojó. Raú nuꞌumatá inaꞌuké kapichákajo liyá, palá Tupana aꞌakale nuñathé. 8 Ñaké iꞌimakale, Tupana wakáraꞌari nuꞌumaká majó, unká iká kalé. Tupana palamane noꞌó faraón ñathé, riꞌijnatákaloje ripéchuwa palá. Riñakaré chiyá wakáraꞌajeri kaja nuká; piyuke inaꞌuké Egipto teꞌeré eyájena wakáraꞌajeri kaja nuká. 9 Ñakele chuwa ipaꞌó kiñaja, iꞌimichá nuyukuna waraꞌapajlo. Marí ke imájika rijló: “Marí ke piꞌirí José wakáraꞌaka pijló purákaꞌaloji: Tupana palamane Egipto eyájena wakáraꞌajeri nuká. Eko ramíchare nuká majó. Rimaláraꞌataniña rikó jupi wani, riꞌijnare majó kiñaja. 10 Majó riphájika ee, riꞌimajé Gosen teꞌeré nakú, riyani, rilakena, kele waꞌaté. Riwáꞌare kaja majó piyukeja ripirana; rijñaꞌare kaja piyuke rinane rijwaꞌató, riꞌimakáloje nowaꞌá penaje. 11 Maare noꞌojé rijló aꞌajnejí, piyukeja rijwaꞌatéjenajlo waꞌaté, unká na nakú kalé rilaꞌajé kamuꞌují maare. Pajluwa théꞌela kele jarechí ketana watukumá re joꞌó kaja meꞌepijí iꞌimajika”, ke imájika rijló.

12 —Nujmeremi Benjamín, eyá iká ajopana, jemiꞌichaño kaja numíchaje nakú ijló. Chuwa iꞌimichá nuyukuna paꞌayujlo: 13 maare piyuke Egipto teꞌeré eyájena wakáraꞌajeri nuká; iꞌimá kaja rijló mékeka amíchaka maárowa yukuna. Chuwa iwáꞌicha noraꞌapá majó —ke rimaká najló.

14 E José mawíloꞌori rijmeremi Benjamín, rejéchami riyaka. Ñaké kaja Benjamín iyako rimawíloꞌoka riká. 15 Rejomi richiñoꞌó piyuke rejena jimá chiyá pajluwano ke. Riyako rimawíloꞌoka neká. Marí kaje ejomi, rejena pechu laꞌaró kaphí, napuraꞌakóloje rijwaꞌaté penaje.

16 E yuku iphari neꞌemakana faraón nakú: “José ejénaka iphíchaño”, ke. Puꞌují ripechu laꞌakó rijwaꞌaté raú; ñaké kaja faraón jaꞌapiyatéjena pechu laꞌakó puꞌují riyukuna jemaꞌakana aú. 17 E kaja faraón iꞌijnari José waꞌaté puraꞌajó, rimá rijló:

—Pimicha pejénajlo, napitákaloje nakawarútena janapeje nanane, napaꞌakóloje Canaán teꞌeré ejo penaje. 18 Nephájikaja rejo ejomi, nawáꞌare majó naraꞌapá, naluna, nayani, kajena piyukeja majó. Maare noꞌojé najló palá nojé teꞌerí. Najñaje kaja palá nojé aꞌajnejí, apú chaje palaka iꞌimakare maárowa —ke rimaká Josejlo. 19 Rejomi rimá piño rijló:

—Piwakáraꞌa najñaꞌaká najwaꞌató maáreya peꞌiyowa jaꞌapaka, kawaruna chíraꞌakare, nawáꞌakaloje majó naluna, nayani, kele richu penaje. Richu kaja nawáꞌare jaraꞌapá majó. 20 Napechu iꞌimaniña nanane nakú khaí; majó nephájika ee, richaje palaka nakaje iꞌimajika najló —ke rimaká rijló.

21 E José aꞌarí najló peꞌiyowa jaꞌapaka, faraón wakáraꞌaka ke. Raꞌá kaja najló aꞌajnejí iñeꞌepú aꞌajnená penaje. 22 Raꞌá kaja najló wajé aꞌarumakaji, napiyákakaloje penaje. Eyá Benjaminjlo raꞌá kajrú liñeru, kajrú kaja aꞌarumakaji. 23 Eyá raraꞌapajlo riwakáraꞌa kajrú nakaje, iyamá théꞌela kele kawaruna janapiño nakaje riwakáraꞌakare. Palá nojé nakaje, Egipto teꞌeré nakú iꞌimakare, riwakáraꞌa rijló. Riwakáraꞌa kaja rijló pan, trigo waꞌaté, iñeꞌepú aꞌajnená penaje. 24 E kaja neꞌemá nayukuno rijló, kaja penaje José kemari najló:

—¡Pa! akhaꞌákaniño pajwaꞌatéchaka iñeꞌepú chuwá.

25 E kaja náchoꞌo Egipto teꞌeré eyá, napaꞌakóloje nañakajela ejo penaje. Raú napaꞌó ají ke yaꞌajnaje naraꞌapá ejo. 26 E nephá rinaku, nemá rijló:

—Kaja weꞌemá rejo. Re wamá piꞌirí José, weꞌewé. ¡Re joꞌó kaja riká, kajmuni joꞌó riká! Egipto eyájena wakáraꞌajeri riká meꞌetení.

Paineko chiyó, unká riweꞌepila meke kemakánaka nemaká rijló, ripechu iꞌimá: “Mapeja kaꞌajná napajlaka ta nujwaꞌaté”, ke. 27 Neꞌemá rijló riyukuna mékeka rimaká rinaku. Ramaka aú peꞌiyowa jaꞌapaka, José wakáraꞌakare rijló, nawáꞌakaloje riká richu rejo penaje, ripechu laꞌaró kaphí. 28 E rimá najló:

—Re joꞌó kaja joꞌó José. ¡Meke palá wani nojló riyukuna jemaꞌakana! Nuꞌujnajé rejo unká chiyó nutakaꞌá, nomákaloje riká penaje.