—Chuwa pimanoꞌotiya najló natulané puꞌutheno waja trigo aú, najñaꞌakajla lokópaꞌala paꞌá najló trigo. Pipaꞌatá piño kaja najló naliñérute natulané numaná chojé pajluwano, pajluwano ke. 2 Eyá najmeremi liñérute, pipaꞌataje kaja ritulané chojé. Rejomi pitoꞌotaje kaja nutiyélane, pejruꞌuwá sereni nakiyá laꞌakanami, richojé.

3 E muní ke, wajé wani kamú jeñoꞌoká ee, José yuriri rejena paꞌakó piyukeja, nakawarútena waꞌaté. 4 Napaꞌakó meketánaja aꞌajemi, José kemari rijwaꞌaté jápajerijlo:

—Chuwa pechoꞌota neká, piphátajika ee neká, pimaje najló marí ke: “¿Naje chi iliꞌichá puꞌuwaré wani, palá waliꞌichaka inaku eꞌiyonaja? Palá weꞌemakana liꞌichaka inaku, eꞌiyonaja ritiyélane jataꞌakana riliyá aú apiyákichaka rijló palá riliꞌichaje inaku. 5 Nukariwate iꞌirakare chiyano, riká tiyela jatiꞌiyá riliyá. Raú kaja riweꞌepino nakaje nakojé ritukumó. ¡Puꞌuwaré wani ta iliꞌichaka!” —ke pimájika najló.

6 E rechoꞌota neká, iphátari neká pajimila yámojo. E rimá najló, José wakáraꞌaka rimaká najló ke. 7 E nemá rijló:

—¿Naje chi pipuraꞌó wajwaꞌaté ilé ke wani? Unká joꞌó wani walaꞌalá nakaje, ilé pimaká wanaku ke. 8 Palá piweꞌepika meke laꞌajeñoka weká. Wapaꞌó majó Canaán teꞌeré eyá iꞌimaká, wapaꞌatákaloje ijló liñeru, ipaꞌatákare wajló apú wakajé watulané chojé iꞌimaká. Eta, ¿na penaje chi wataꞌajla pikariwate liyá rinane nakiyana? 9 Pikulá watulané eꞌiyowá riká. Piphátajikare kapi riká, nókana iꞌimajeri. Eyá unká riꞌimalaje kapi, iꞌijnajeño kaja pijwaꞌaté jápaje mapeja —ke nemaká rijló.

10 —Je. Imíchaka keja riꞌimajika —ke rimaká—. Eꞌiyonaja kalé riꞌimajíkare kapi ja kalé iꞌijnajeri nujwaꞌaté jápaje mapeja. Eyá iká ajopana, unká wajákana iꞌimalaje, manaꞌija ipaꞌajiko iteꞌeré ejo.

11 Raú kiñaja nawitúkaꞌataka natulané nakawarútena janapiya, eyá piyukeja neká meꞌetaño natulané chaya. 12 E José waꞌaté jápajeri kulari natulané chu. Rikeñoꞌó neꞌewé pheꞌejrí tulané chu rikulákana paineko. Rejomi raꞌapejé, raꞌapejé ke, rikulaka apú tulané chu, apú tulané chu ke. Kaja penaje rikulá najmeremi Benjamín tulané chu, riká chu riphata rikariwate tiyélane. 13 Raú ja najiyoꞌotá naꞌarumaká nanaku iꞌimakare, kamuꞌují wani napechu laꞌakole. E náchoꞌota piño natulané nakawarútena janapeje. Kéchami napaꞌakó piño napumí chuwá, 14-15 iphaño José ñakaré ejo. Re joꞌó kaja José iꞌimaká re nephaka rinaku ee. Najlámaꞌo rijimaje. Najlámaꞌako teꞌerí jimaje ketana, José kemaká najló marí ke:

—¿Meke chi iliꞌichaka ta? ¿Unká chi iweꞌepila inaꞌuké nuká kaje, weꞌepika palá nakaje nakojé weꞌepíkana nutukumó?

16 E Judá kemari rijló:

—Unká meke wemalá pijló, unká méñoꞌojo wapuraꞌaló wachayo pijwaꞌaté. Tupana amíchari mékeka waliꞌichaka puꞌuwaré. Ñakele maare weká piyukeja pijwaꞌaté, pitiyélane iꞌimichaje kapi waꞌaté, wajápakaloje pijwaꞌaté mapeja penaje.

17 José kemari rijló:

—Unká ilé ke kalé riꞌimajika. Riká, nutiyélane iꞌimichaje kapi ja kalé yuréjero, rijápakaloje nujwaꞌaté mapeja penaje. Eyá iká ajopana paꞌajeño manaꞌija jaraꞌapá ejo, unká na kawílaꞌalaje inaku.

18 Raú Judá iꞌijnari José awaꞌajé, rimá rijló:

—Numá pijló, pilaꞌakáloje nojló nakaje, pemaꞌakáloje noꞌopiyá numájikare nakú pijló. Piyurí numaká pijló nakaje nakú meꞌechú. Pilaꞌá nojló nakaje, piyúchaꞌaniño nujwaꞌaté. Faraón wakáraꞌaka inaꞌuké, keja kaja piwakáraꞌaka inaꞌuké. 19 Piká kejáꞌari waliyá wejena yukuna iꞌimaká, pimá wajló iꞌimaká: “¿E chi jaraꞌapá? ¿E chi apú eꞌewé?”, ke. 20 Raú wemá pijló iꞌimaká: “Re waraꞌapá re joꞌó kaja, phíyuꞌuke wani kalé riká; re kaja wajmeremi, kaja walijímaka cha riká. Phíyuꞌuke wani waraꞌapá iꞌimaká wakajé, rimothoꞌó iꞌimaká. Ñakele íkiꞌija waraꞌapá wátaka riká. Pajluwájaru riyajalo micholo waꞌaté riyani iꞌimaño iyamá iꞌimaká. Eyá rikaja kalé yuriro, apú reꞌewé michú tajnaro iꞌimaká”, ke wemaká pijló iꞌimaká. 21 Raú piwakáraꞌa wawáꞌaka riꞌimaká majó, piwátakale ramákana. 22 Eyá wemá kaja pijló iꞌimaká: “Unká méñoꞌojo waraꞌapá yurila riká; riyuríkela riká, apala ritakaꞌajla”, ke. 23 Eꞌiyonaja pimá wajló iꞌimaká: “Unkájika ee iwaꞌa riká majó, iꞌijnaniña piño majó”, ke pimaká wajló iꞌimaká.

24 —E kaja wapaꞌó waraꞌapá ejo iꞌimaká. Wephaka rinaku ee, weꞌemá rijló piyuke mékeka pimaká wajló iꞌimaká yukuna. 25 Meketánaja iꞌimajemi, waraꞌapá wakáraꞌari piño weꞌejnaká majó wejapa trigo warúwaꞌaje. 26 Eꞌiyonaja wemá rijló iꞌimaká: “Unká meke laꞌajé weꞌejnalajla rejo nawakáraꞌajeri amaje, unkájika ee wajmeremi iꞌijná wajwaꞌaté”, ke wemaká rijló. 27 Raú waraꞌapá kemari wajló: “Kaja iweꞌepí palá iyamaja nuyani iꞌimaká nuyajalo micholo waꞌaté iꞌimaká. 28 Pajluwaja kapicharo nuliyá iꞌimaká. Maárejecha unká nomala riká, apala yawi kaꞌajná nori riꞌimaká michú. 29 Eyá iwáꞌajika ee piño apú nuliyá, ¿meke kaꞌajná rilaꞌajiko ee iñeꞌepú chuwá, meke chi ilaꞌakajla? Ipachá nuká, kaja phíyuꞌuke iꞌimaká ta takaꞌajla, kamuꞌují wani nupechu iꞌimakálejla”, ke waraꞌapá kemaká wajló.

30 —Wajmeremi nakuja waraꞌapá pechu. Ñakele wapaꞌakelo rejo wekoja, waraꞌapá phíyuꞌuke amajla unká wajmeremi iꞌimalá wajwaꞌaté. 31 Raú kamuꞌují wani ripéchuwa iꞌijnatákana nakú, ritakaꞌajla wapachá. 32 Nuká kemari noraꞌapajlo iꞌimaká: “Nukako aꞌá nunakojó riká”, ke. Numá kaja rijló: “Unkájika ee nupaꞌatá pijló riká, nupachá riꞌimajika, nuꞌumajika ejaꞌawá chu ketana”. 33 Ñaké iꞌimakale numá pijló: “Nuká yuréjero rapumí chojé pijwaꞌaté jápajeri penaje, eyá riká paꞌajero rapumí chuwá nojena waꞌaté waraꞌapá ejo”. 34 Nupaꞌakelo noraꞌapá ejo, eyá unkákela wajmeremi iꞌimalajla nujwaꞌaté, ramajla chapú kaje yajwé. Unká nuwátala noraꞌapá ñaꞌaká chapú kaje panaku amákana —ke Judá kemaká rijló.