—Chuwa iꞌijná piño Egipto ejo, iwarúwaꞌakaloje wejápaja trigo wajló.

3 Eꞌiyonaja Judá kemari rijló:

—Paꞌayú, reyá wakáraꞌajeri kemari wajló marí ke iꞌimaká: “Unkájika ee iwaꞌa majó ijmeremi, unká naje kalé iꞌijná majó nomaje”, ke. 4 Ñakele piwakáraꞌajika ee wajmeremi iꞌijnaká wajwaꞌaté, weꞌejnajé rejo trigo warúwaꞌaje pijló. 5 Eyá unkájika ee piyurí riꞌijnaká wajwaꞌaté, unká weꞌejnalaje rejo, reyá wakáraꞌajeri kemakale wajló iꞌimaká: “Unkájika ee iwaꞌa ijmeremi majó, unká naje kalé iꞌijná majó nomaje”, ke.

6 Raú naraꞌapá kemari najló:

—Eta, ¿naje chi ilaꞌátano nuká chapú wani? ¿Naje chi imá rijló ta iꞌimaká: “Reka wajmeremi”, ke?

7 Nemá rijló:

—Kaja paja kajrú rikejáꞌaka waliyá wejena yukuna. Rimá wajló iꞌimaká: “¿E chi re joꞌó kaja jaraꞌapá?” Rimá kaja wajló: “¿E chi apú eꞌewé?”, ke rimaká ta wajló. Raú weꞌemá riyukuna rijló. ¿Meke laꞌajé chi waweꞌepíkajla marí ke ta rimájika ta wajló: “Iwaꞌa majó ijmeremi”, ke?

8 E Judá kemari piño raraꞌapá Israeljlo:

—Wawátajika ee re joꞌó kaja iꞌimakana marí ejaꞌawá chu, piyurí wajmeremi iꞌijnaká wajwaꞌaté, nukako amá riká. Paꞌajipajika ee aꞌa ke nojló, meꞌetenija weꞌejnajika, raú unká watakaꞌalaje meꞌepijí nakú pijwaꞌaté, piyani, pilakena, kele waꞌaté. 9 Nuká amájeri riká, nupachá rilaꞌajiko ee meke, pikejáꞌaje riyukuna nuliyá. Unkájika ee nupaꞌatá piño riká rapumí chuwá majó pijló, e paꞌajé nuchá riká, nuꞌumajika ejaꞌawá chu ketana. 10 Unkákela wamaláraꞌojla jupi wani maare, kaja maapami weꞌejichajla rejo, meꞌetení wephíchakajla piño majó. Iyaampe cha kaꞌajná weꞌejnakajla rejo.

11 —Ñaké riká —ke naraꞌapá kemaká—. Chuwa unká meke walaꞌalá, ñakele ilaꞌá marí ke: Ijñaꞌá ijwaꞌató palá nojé nakaje maárowa iꞌimakare marí teꞌerí nakiyá, ilamáꞌatachi riká raú. Ijñaꞌá rijló munumunú jalá, eyá puꞌumé amarí. Ijñaꞌá kaja rijló kula kaje icha. Marí kaje ijñaꞌá ijwaꞌató, aꞌakáloje rijló riká mapeja penaje. 12 Ijñaꞌá kaja ñóꞌope liñeru, iwarúwaꞌakaloje aꞌajnejí raú penaje. Eyá ilé liñeru, napaꞌatákare ijló iꞌimaká, ipaꞌataje piño najló riká nakápeje. Apala napechu kapichako aú kaꞌajná napaꞌatá ijló riꞌimaká. 13 Chuwa iꞌijná piño ilé inaꞌuké ejo, iwaꞌa kaja ijmeremi ijwaꞌató. 14 Tupana weꞌepiri piyukeja nakaje laꞌakana. Eko riweꞌepí imuꞌují, ilé inaꞌuké yuríkaloje apú eꞌewé ijló, ñaké kaja riyuríkaloje Benjamín paꞌakó majó ijwaꞌaté. Eyá nuká, mayanikeru nuꞌumajika ee, kaja keja nuꞌumatáreja —ke rimaká najló.

15 Ilé kaje aú Jacob yaní ñaꞌañó keꞌiyapejé nakaje najwaꞌató, nalamáꞌatakaloje José raú penaje. Najñaꞌá kaja ñóꞌope liñeru, nawarúwaꞌakaloje trigo raú penaje, eyá napaꞌatá kaja liñeru, napaꞌatákare najló apú wakajé iꞌimaká. E kaja neꞌejná ají ke Egipto teꞌeré ejo; nawaꞌa kaja najwaꞌató Benjamín, kaja ewaja nephá José nakú. 16 Riká amari Benjamín iꞌimaká najwaꞌaté. Rijmeremi wani riꞌimaká aú, rimá riñakaré chiyá jápajeño wakáraꞌajerijlo:

—Piwaꞌa mariruna inaꞌukena nuñakaré ejo. Eko pinó pajluwana jémana pirakana nakiyana, rejomi pimothoꞌojé palá riꞌimi, najñákaloje naꞌajnewá nujwaꞌaté kaápuꞌuku.

17 Rimaká rijló ke rilaꞌaká. Riwaꞌa neká José ñakaré ejo. 18 Eꞌiyonaja nakeroꞌó, riwáꞌakale neká rejo, nemá pajlokaka:

—¡Yee jaꞌa! meke kaꞌajná ripechu nakú walaꞌakana. ¿Naje riwakáraꞌa wawáꞌakana riñakaré ejo? Apala liñeru, napaꞌatákare wajló apú wakajé iꞌimaká, pachá kaꞌajná netaje wachá, nawáꞌakaloje weká wapirana waꞌaté, wajápakaloje najwaꞌaté mapeja penaje —ke napuraꞌakó pajwaꞌatéchaka.

19 Nephaka José ñakaré numanaje ee, nawakó José ñakaré chiyá jápajeño wakáraꞌajeri nakojé, 20 nemá rijló:

—Apú wakajé weꞌemá majó trigo warúwaꞌaje iꞌimaká, waꞌá ijló riwemí iꞌimaká. 21 Rejomi wapaꞌó maáreya iꞌimaká. Pajluwa kala waꞌapá, wajúwaꞌaka ee, wajmeꞌetá watulané chaya, amaño waliñérute iꞌimaká watulané chu. Panakiyánaya waja waliñérute iꞌimaká apú tulané chu, apú tulané chu ke. Waꞌaká ijló riwemí iꞌimaká, keja kaja ipaꞌataka wajló riꞌimaká. Eyá chuwa wapaꞌatá piño riká majó wajwaꞌató, wapaꞌatákaloje ijló riká penaje. 22 Wephátiya kaja richaje liñeru wajwaꞌató, wawarúwaꞌakaloje piño raú iliyá aꞌajnejí. Unká waweꞌepila naka paꞌataka wajló waliñérute iꞌimaká apú wakajé —ke nemaká rijló.

23 E rimá najló:

—Iweꞌepíniña ijluwa. Tupana, ipechu iꞌimakare chojé kaphí, paꞌatari ijló iliñérute rapumí chuwá. Nuká ñaꞌarí iliyá iliñérute aꞌakare nojló iꞌimaká.

E riñakaré chiyá wakáraꞌajeri jáchoꞌotari neꞌewé Simeón inaꞌuké wajákelana chiyá, e riwaꞌa riká rejena iꞌimaká ejo. 24 Rejomi riwaꞌa neká José ñakaré chojé. Raꞌá najló juni, nepakáloje neꞌemá nakiyá raú penaje; raꞌá kaja nakawarútena aꞌajné. 25 Re nawata kaápuꞌuku ejená José. Ketana nalamáꞌataka nakaje, naꞌakáloje rijló riká penaje, kaja naweꞌepí re najñájika naꞌajnewá rijwaꞌaté.

26 E kaja kaápuꞌuku José iphari riñakaré chojé. Neꞌejná rijimaje, najalaka riká, e naꞌá rijló nakaje najñaꞌakare rijló iꞌimaká. E najlámaꞌo rijimaje teꞌerí eꞌiyajé. 27 Rimá najló:

—¿Meke iká? Eyá, ¿meke chi jaraꞌapá phíyuꞌuke, imakare nakú nojló apú wakajé iꞌimaká? ¿Re joꞌó kaja chi riká?

28 Ilé ke rimaká aú, najlámaꞌo piño rijimaje, nemá rijló:

—Waraꞌapá, pijwaꞌaté jápajeri keja riká. Palani joꞌó riká, peyajweni riká.

29 E José yakáꞌaro nachaje, amari re Benjamín iꞌimaká najwaꞌaté. Rijmeremi wani riꞌimaká, pajluwájaru naló iꞌimaká, ñaké kaja naraꞌapá iꞌimaká. E rimá najló:

—¿Marí chi ijmeremi, imakare nakú nojló iꞌimaká?

E rimá rijló:

—Eko Tupana laꞌá piká palá.

30 Ilé ke ramaka rijmeremi ejéchami, makaꞌaní riyaka, kaja puꞌují wani ripechu iꞌimakale, raú rimujlúkaꞌa kiñaja rikapure chojé. Re riyá. 31 Júpichami riyurika iyakaje, rejomi ripá rijimá chiyá, riꞌijná piño nachaje. E rimá rijwaꞌaté jápajeñojlo:

—Chuwata aꞌá najló aꞌajnejí.

32 Josejlo naꞌá raꞌajné apoꞌojó naliyá, apú mesa nakojé. Apú kaja mesa nakojé naꞌá Jacob yanijlo naꞌajné, eyá apú mesa nakojé ajopánajlo. Egipto eyájena, José waꞌaté iꞌimakaño, ajñaño kaja naꞌajnewá. Unká Egipto eyájena ajñake naꞌajnewá hebréona waꞌaté pajñakani, awíyoꞌokeja ke richá iꞌimajíkale najló rewá. 33 Rejomi José ejena yáꞌaño José wakáraꞌaka nayáꞌako ke. Riwakáraꞌa neꞌewé pheꞌejrí yáꞌako paineko, kéchami riwakáraꞌaka nayáꞌako raꞌapejé, raꞌapejé ke. Raú nayakaꞌo pachájekaka, apú ke napechu laꞌakó raú, napechu iꞌimá: “¿Meke laꞌajé chi riweꞌepí weká palá wani?” 34 E ritamákaꞌata najló aꞌajnejí, rimesané nakú iꞌimakare nakiyana. Raꞌá Benjaminjlo ñóꞌope wani, ajopánajlo raꞌaká chaje. Najñá naꞌajnewá keyajupa pajwaꞌatéchaka.