—¿Na ilaꞌá maare pachájekaka yakáꞌakano nakú? 2 Ajopana kemaño nojló: “Re trigo Egipto teꞌeré e”. Iꞌijná rejo, iwarúwiꞌicha wajluwa trigo rejo, weꞌemakóloje raú penaje.

3 Iyamá théꞌela kele neꞌemaká, iꞌijnaño rejo trigo warúwaꞌaje. 4 Unká naraꞌapá Jacob yurila riꞌirí Benjamín iꞌijnaká rejo najwaꞌaté, ripechu iꞌimakale rinaku apala meke rilaꞌó rejo. José meremi wani riꞌimaká. 5 E kaja Jacob yaní iꞌijnaño rejo, kajrú ajopana inaꞌukena waꞌaté, najñaꞌajíkale meꞌepijí panaku Canaán teꞌeré ewá.

6 Riwakajé José iꞌimari Egipto eyájena wakáraꞌajeri; riká kaja aꞌakeri ajopana teꞌeré eyá iphájikañojlo trigo. E kaja rejena iphaño rejé rinaku. Namaka riká aú, najlámaꞌo rijimaje, reyájena wakáraꞌajeri riꞌimakale. 7 José amaka neká ejéchami, riweꞌepika rejena neꞌemaká, eꞌiyonaja rilaꞌá rikó unká japi ramánaꞌapana kalé neká ke. Raú rimá najló yurí:

—¿Mere eyájena ta chi iká iphíchaño majó?

Nemá rijló:

—Canaán teꞌeré eyájena weká, majó weꞌejichá trigo warúwaꞌaje piliyá.

8 José weꞌepiri rejena neꞌemaká, eyá neká unká weꞌepílaño na inaꞌukeka riꞌimaká. 9 Raú riphá ripechu nakojé mékeka ritapúnaꞌaka júpimi ke iꞌimaká, rimá najló:

—Nuweꞌepí wapinana nakiyana iká. Wakejílaꞌaje iꞌijichá majó, amákaloje mékeka icháꞌatakajla weká nókakajo aú.

10 —Unká wani ipinana nakiyana kalé weká —ke nemaká—. Pijwaꞌaté jápajeño keja weká. Trigo warúwaꞌaje weꞌejichá piliyá majó. 11 Pajluwaja yaní waja weká; palá laꞌakaño weká; unká ajopana kejílaꞌajeño kalé weká.

12 —Unká kewaka kalé imaká ta nojló —ke José kemaká najló—. Majó iꞌijichá ta wakejílaꞌaje, amákaloje mékeka icháꞌatakajla weká penaje.

13 E nemá rijló:

—Pijwaꞌaté jápajeño keja weká. Iyamá iphata jiꞌimaji nakojé kele weká; pajluwaja waraꞌapá; Canaán teꞌeré e wañakajela. Pajluwaja wajmeremi yuriro re joꞌó kaja waraꞌapá waꞌaté, eyá apú weꞌewé michú, unká iꞌimalá wajwaꞌaté.

14 Eꞌiyonaja José kemari najló:

—¡Numíchaka inaku ta keja iká, wakejílaꞌajeño ta iká! 15 Marí aú nuweꞌepeje kewákaka imaká nojló, ipajlaka kaꞌajná nujwaꞌaté. Faraón ií aú numá ijló: Unká ipaꞌalajo maáreya, aꞌajná ijmeremi iphájika majó ejená. 16 Pajluwaja inakiyana paꞌajero ijmeremi wáꞌaje, ketana iká ajopana yuríjiko maare inaꞌuké wajákelana chu. Nomáijla kewákaka imaká nojló, ipajlaka kaꞌajná nujwaꞌaté. Unkájika ee ijmeremi iphá majó, nuweꞌepeje wakejílaꞌaje iꞌijnaká majó —ke rimaká najló.

17 Raú rikaꞌá neká inaꞌuké wajákelana chojé piyukeja. 18 Weji ke kala iꞌimajemi riꞌijná namaje, rimá najló:

—Tupana jaꞌapí iphájeri nuká. Ñakele ilaꞌá marí ke, raú nomajo ichaje, unká nukapichátalaje iká: 19 Kewaka, palá laꞌajeñó iꞌimajika ee, iyurí pajluwaja inakiyana maare inaꞌuké wajákelana chu. Eyá iká ajopana paꞌajeño, iꞌijnatákaloje trigo ejénajlo penaje. 20 Rejomi iwáꞌaje majó nojló ijmeremi. Nomájika ee riká, nuweꞌepeje kewaka imaká nojló. Unkájika ee iwaꞌa riká majó, ikapichajo —ke rimaká najló.

21 E napuraꞌó pajwaꞌatéchaka nekámika ke napuraꞌakó chu, nemá pajlokaka:

—Unká wani paala walaꞌaká weꞌewé michú júpimi iꞌimaká. Mawó rimaká wajló iꞌimaká, waweꞌepíkaloje rimuꞌují penaje, eꞌiyonaja unká wani waꞌalá wanakojó riꞌimaká. Wapachoja wamá chapú kaje yajwé meꞌetení.

22 Rubén kemari najló:

—Palá numaká ijló iꞌimaká: Walaꞌaniña riká chapú, ke, eꞌiyonaja unká wani jemaꞌalá ta noꞌopiyá iꞌimaká, pachá chuwa waꞌajika rinókana wemí.

23 José jemaꞌarí mékeka napuraꞌakó. Napechu iꞌimá: “Unká japi remaꞌalá wapuraꞌakó”, ke, apú Egipto eyaje jaꞌapátakale rijló napuraꞌakó. 24 Remaꞌaká mékeka napuraꞌakó pajwaꞌatéchaka nekámika ke aú, riꞌijná nawaꞌayá aꞌajná ñoꞌojó kemachi. Re riyá. Kéchami ripaꞌakó piño nachaje, e riwaꞌa Simeón neꞌiyayá. Najimaje riwakáraꞌa apú jepoꞌotaka riká, nakaꞌakáloje riká jepoꞌokeja inaꞌuké wajákelana chojé. 25 Kéchami rimaká ajopánajlo:

—Chuwa imanoꞌotá najló natulané trigo aú; ipaꞌatá kaja najló naliñérute pajluwano, pajluwano ke, natulané chojé; aꞌá kaja najló aꞌajnejí iñeꞌepú aꞌajnená penaje.

26 E kaja napitá trigo nakawarútena janapeje, e napaꞌó reyá. 27 Pajluwa kala ketana naꞌapaka, kaja ewaja nephá nakamátakelo ejé. E pajluwaja nanakiyana meꞌetari ritulané chaya, raꞌakáloje rikawarute aꞌajné penaje. Rijmeꞌetá riká, amari riliñérute toꞌokó richu, 28 raú rimá rejénajlo:

—¡Amá, napaꞌataka nojló nuliñérute, maare riká nutulané chu!

Raú kajrú nakeroꞌokó piyukeja, akuwaná kajrú nakurúkaka, nemá pajlokaka:

—¿Meke chi Tupana laꞌaká weká?

29 Re nakamato, e muní ke naꞌapaka piño. Kaja ewaja nephá naraꞌapá nakú. E neꞌemá rijló mékeka neꞌemaká rejo yukuna, nemá rijló:

30 —Unká wani paala weꞌemaká rejo. Yurí wani reyá wakáraꞌajeri puraꞌakó wajwaꞌaté, rimá wajló: “Wapinana nakiyana ta iká”, ke. 31 Eꞌiyonaja wemá rijló:

—Unká ikejílaꞌajeño kalé weká, palájneꞌekena inaꞌuké weká. Pajluwaja yaní kaja weká. 32 Iyamá iphata jiꞌimaji nakojé kele weká. Pajluwaja weꞌewé michú kalé unká iꞌimalá wajwaꞌaté, eyá apú wajmeremi yuriro re joꞌó kaja waraꞌapá waꞌaté Canaán teꞌeré e —ke wemaká rijló. 33 —Raú rimá wajló: “Marí aú nuweꞌepeje kewákaka, palá laꞌajeñoka iká: Iyurí pajluwaja eꞌewé maare inaꞌuké wajákelana chu, eyá iká ajopana iꞌijnatájeño wejápaja trigo ejénajlo. 34 Rejomi ipaꞌajó majó ijmeremi, imakare nakú nojló waꞌaté. Nomájika ee riká, nuweꞌepeje kewaka palá laꞌajeñoka iká, unká wakejílaꞌajeño kalé. Rejomi nóchoꞌotaje ijló eꞌewé inaꞌuké wajákelana chiyá, eyá kaja manaꞌija ichiraꞌajiko maárowa wateꞌeré nakuwá”, ke rimaká wajló —ke neꞌemaká riyukuna naraꞌapajlo.

35 E kaja najmeꞌetá natulané chaya, nakhoꞌokáloje trigo richiyá penaje. E namá napaꞌataka najló naliñérute nanakojó, aꞌajnejí wemí naꞌakare najló iꞌimaká. Namaka aú liñeru iꞌimaká re joꞌó kaja naliñérute aꞌakuná chu, kajrú nakeroꞌokó, ñaké kaja naraꞌapá keroꞌokó. 36 E Jacob kemari najló:

—Kaja cha ikupátaka nuliyá nuyani. Unká José michú iꞌimalá wajwaꞌaté, eyá Simeón unká kaja iꞌimalá, eyá chuwa iwátaka Benjamín kaꞌakana nuliyá. ¡Nuká waja kalé amárino chapú kaje yajwé!

37 Raú Rubén kemari rijló:

—Paꞌayú, piyurí nojló Benjamín, nukako amá rijwaꞌaté. Wawáꞌaje riká rejo, rejomi nupaꞌataje pijló riká majó. Unkájika ee nupaꞌatá pijló riká majó rapumí chuwá, numaká pijló ke, eko pinota ileruna iyamá nuyani.

38 Eꞌiyonaja raraꞌapá kemari:

—Unká, unká wani nuyurílaje riꞌijnaká ijwaꞌaté. Kaja reꞌewé wani iꞌimaká michú takaꞌarí, eyá rikaja kalé pajluwaja yuriro. Meke kaꞌajná rilaꞌajiko ee iñeꞌepú chuwá, ¿meke chi ilaꞌakajla? Kaja phíyuꞌuke nuká, meke rilaꞌakelo, kamuꞌují wani nupechu laꞌakojla raú, akuwaná nutakaꞌajla ipachá.