José iꞌimaká iyamá inaꞌukejlo natapú yukuna, yukuna marí
40
E kaja apú wakajé iyamá Egipto iꞌimakana waꞌaté jápajeño laꞌañó nakaje unká wani paala, raú riyúchaꞌo nachá. Pajluwaja nanakiyana iꞌimari iꞌirakaje jaꞌapátajeño neꞌemakánajlo wakáraꞌajeri, eyá apú iꞌimari pan laꞌajeñó neꞌemakánajlo wakáraꞌajeri. 2 Faraón (neꞌemakana, ke kemakánaka riká) yúchaꞌaro nachá, 3 raú riwakáraꞌa neká riñakaré waꞌaphena wakáraꞌajeri ñakaré ejo. Re inaꞌuké wajákelana iꞌimaké. Richojé nakaꞌá neká, richu kaja José iꞌimaké. 4 Richiyá wakáraꞌajeri kemari Josejlo, raꞌakáloje rinakojó neká. E kaja júpija neꞌemaká richu.5 E apú wakajé lapí natapúnaꞌa. Pajluwa tapúnaꞌari apoꞌojó, eyá apú tapúnaꞌari apoꞌojó kaja. 6 Muní ke José iꞌijnaká namaje, amari kamuꞌují napechu iꞌimaká, 7 raú rimá najló:
—¿Naje chi kamuꞌují wani ipechu?
8 E nemá rijló:
—Unká paala wani watapúniꞌichaka lapí iꞌimichaka, unká kaja na iꞌimalajla wajló palá watapúniꞌichaje yukuna.
Rimá najló:
—Tupana aꞌarí iná ñathé, iná weꞌepíkaloje meke kemakánaka riká penaje. Chuwa iꞌimá nojló itapúniꞌichaje yukuna.
9 Neꞌemakánajlo iꞌirakaje jaꞌapátajeño wakáraꞌajeri iꞌimari ritapú yukuna Josejlo paineko, rimá:
—Marí ke nutapúniꞌichaka: Nomicha pajluwa jepepí kúwiꞌichako. 10 Riká iꞌiché iꞌimichari weji kele. Rinakiyá nomicha ripaná jeñoꞌochaka, rejomi kajrú riwí iꞌimichaka. Eyá riwí jewíꞌicharo kajmú penaje, kaja ewaja raparicha. 11 Weꞌemakana tiyélane iꞌimichari nukapi, riká chojé nopiꞌichá ralá. Kéchami nuꞌumatíyaka rijló riká, riꞌirakáloje richiyá penaje.
12 E José kemari rijló:
—Ilé riꞌiché, weji kele pamíchaje: weji ke kala, ke kemakánaka riká. 13 Weji ke kala iꞌimajemi, weꞌemakana faraón iꞌijnataje ripéchuwa nakaje pilaꞌakare, unká wani paala rijló iꞌimaká nakú. Rejomi ráchoꞌotaje piká maáreya, pijápakaloje piño rijwaꞌaté, júpimi pijápajika rijwaꞌaté iꞌimajika ke kaja. Ilé ke piꞌimajika —ke José kemaká rijló—. 14 Ilé ke riꞌimajika pijló wakajé, eko pipuraꞌó weꞌemakana waꞌaté nunaku, ráchoꞌotakaloje nuká maáreya penaje. Eko piweꞌepí kamuꞌují nunaku. 15 Hebreo jaꞌa nuká, tejmuji nawáꞌaka nuꞌumaká majó iteꞌeré ejo. Eyá maare unká na nulaꞌalá, eꞌiyonaja nakaꞌá nuká marí inaꞌuké wajákelana chojé.
16 Pan laꞌajeñó wakáraꞌajeri jemaꞌarí José iꞌimaká rijwákeꞌewejlo palá riꞌimajika yukuna. Raú riꞌimá kaja rijló ritapú yukuna, rimá rijló:
—Nuká tapúniꞌichari marí ke: Nutapú nomicha kuwáꞌala leꞌepé, weji kaꞌalá iꞌimichaka pacháaka nuꞌuwata cha. Pan jareni iꞌimichari richu. 17 Kuwáꞌala, jiꞌiwata cha iꞌimichaje, chu nomicha palá nojé pan, keꞌiyapejé nojé pitíyako weꞌemakánajlo penaje. Kéchami kupiraꞌaphana witúkiꞌichaka richiyá ajñaje.
18 Raú José kemari rijló:
—Weji ke kala, ke kemakánaka riká, weji kele kuwáꞌala leꞌepé. 19 Weji ke kala iꞌimajemi, weꞌemakana weꞌepeje mékeka rilaꞌajika piká. Rejomi riwakáraꞌaje pakúwaꞌatakana pinúrupi nakiyá yenoje aꞌawaná iꞌiché nakiyá. Re pitami akúwaꞌajero, kéchami kupiraꞌaphana witúkaꞌajika pitami ajñaje —ke José kemaká rijló.
20 E weji ke kala iꞌimajemi, Faraón iphátari jarechí, raú riwakáraꞌa nalaꞌaká kajrú aꞌajnejí, raꞌapiyatéjena ajñákaloje naꞌajnewá rijwaꞌaté penaje. E kaja piyukeja riyukupéraꞌakarena awakaño rejé. Re neꞌemanoja riwakáraꞌaka rikaꞌakárena inaꞌuké wajákelana chojé jáchoꞌotakana. 21 Iꞌirakaje jaꞌapátajeño rijló wakáraꞌajeri ripaꞌatá rapumí chuwá, raꞌapátakaloje rijló iꞌirakaje penaje, júpimi rilaꞌajika ke kaja. 22 Eyá pan laꞌajeñó wakáraꞌajeri riwakáraꞌa kúwaꞌatakana rinúrupi nakiyá. José kemaká najló, ke Faraón laꞌaká neꞌemaká. 23 Eꞌiyonaja unká iꞌirakaje jaꞌapátajeño wakáraꞌajeri weꞌepila José, riꞌimakáloje riyukuna neꞌemakánajlo penaje.