39
2 Ilé ke nalaꞌaká José iꞌimaká, eꞌiyonaja Tupana iꞌimakeri José wákeꞌewe wani. Ñakele nakaje rilaꞌajíkare rikariwate ñakaré chu jáchoꞌokerono rijló palá waja. Rikariwate ñakaré chu rijápake rijló. 3 Riká weꞌepíkeri Tupana aꞌajika kajrú José ñathé, raú palá waja nakaje rilaꞌajíkare iꞌimajika rijló. 4 Marí ke Tupana laꞌaká riká palá, rikariwate pechu iꞌimakáloje rinaku palá penaje. Raú raꞌá riká riñathé aꞌajeri penaje, eyá piyuke rijwaꞌaté jápajeño wakáraꞌajeri penaje raꞌá kaja riká. Rikariwate yuriri kaja Josejlo piyukeja rinane, ramákaloje riká penaje. 5 Tupana laꞌakeri palá Potifar nakú; raꞌaké riñathé, nakaje iꞌimakáloje palá riñakaré chu, ñaké kaja nakaje nejátajikare rimena eꞌiyá, iꞌimakáloje palá penaje. Raꞌakale José rijwaꞌaté jápajeri penaje, raú nakaje iꞌimaké ñaké rijló. 6 Piyukeja nakaje rikapi iꞌimakare riyurí Josejlo, raꞌakáloje rinakojó riká penaje. Riweꞌepíjikale palá José amájika piyuke nakaje, unká raꞌaké rinakojó rinane reyá aꞌajná ñoꞌojó; raꞌajnewá ajñakánaja kalé riweꞌepike.Palá wani José amako, palá kaja piyuke rijwaꞌatéjena pechu iꞌimajika rinaku. 7 Re riꞌimá najwaꞌaté júpija kemachi, ewá manáikeꞌela rikariwate yajalo pechu iꞌimajika rijwaꞌaté, raú rumá rijló:
—Piꞌijná nujwaꞌaté, pitoꞌochó nujwaꞌaté.
8 Unká José jemaꞌalá roꞌopiyá, rimá rojló:
—Pemaꞌá numaká pijló: piyajná nukariwate yuriri nojló piyukeja nakaje, nomákaloje riká penaje, ñakele unká raꞌalá na rinakojó meꞌetení, maare nuꞌumaká ketana. 9 Marí pají chiyá wakáraꞌajeri nuká, unká apú iꞌimalá nuchaje rijwaꞌaté jápajeño eꞌiyá. Nojló nukariwate yurí piyukeja nakaje, pikaja kalé, riyajalo, unká riyurila nojló. Eta, ¿naje chi piwata nulaꞌaká numanaicho pijwaꞌaté puꞌuwaré wani, nakaje unká wani Tupana wátalare kaje?
10 Eꞌiyonaja weꞌechú kaꞌalá keja rulaꞌajika riká mawó, kaja ruꞌuwapató wani richá. Eꞌiyonaja unká remaꞌaké roꞌopiyá. 11 E apú wakajé rimujlúkaꞌa nañakaré chojé, rilaꞌakáloje rijápakaꞌala re penaje. Unká na iꞌimalá richu, rukaja kalé iꞌimayo re. 12 Rimujlúkaꞌaka richojé ee, rupatá riká raꞌarumaká nakiyá, rumá rijló:
—Chuwa ta majó, walaꞌachí numakáreno nakú pijló, pitoꞌochó chuwa nujwaꞌaté.
Raú riñaó pají chiyá. Eꞌiyonaja kamachá wani rupataká riká raꞌarumaká nakiyá aú, riyurí riká rukápeje. 13 Romaka aú raꞌarumaká nakiyana iꞌimaká rukapi, 14 ruwaꞌa pají chiyájenajlo. Nephaka runaku ee, rumá najló:
—Iyakaꞌo, kele José, hebreo jaꞌa ta nuyajná warúwaꞌakare iꞌimaká, unká wani iphálacha noꞌopí. Rimujlúkiꞌicha majó, e ramicha ta nokoja nuꞌumichaka aú ripatíyajla nuká, rilaꞌakáloje rimanáicho nujwaꞌaté penaje. Raú nowíyoꞌocha kaphí wani, 15 e kalé riyuricha ta nuká. Rejomi riicho ta peyajwé, akuwaná riyuricha maare raꞌarumaká nakiyana nowaꞌá.
—Kele hebreo jaꞌa ta, jápari pijwaꞌaté, liꞌichárijla rimanáicho nujwaꞌaté. 18 Ripatíyaka nuká aú nowíyoꞌocha kaphí wani, raú riyuricha ta nuká, rejomi riicho ta. Pamá, riñáaichaka ta marí raꞌarumaká. 19 Ilé ke pijwaꞌaté jápajeri ta liꞌichákajla nuká.
Ilé ke ruꞌumaká rijló riyukuna aú, rikariwate yúchaꞌaro íkiꞌija wani José waꞌaté. Ripatá riká, rejomi riwakáraꞌa nakaꞌaká riká inaꞌuké wajákelana chojé. Re riꞌimaké ajopana, neꞌemakana kaꞌakárena richojé waꞌaté. 21 Richu Tupana iꞌimakeri kaja rijwákeꞌewe; palá rilaꞌajika José re. Rilaꞌajíkale riká palá, inaꞌuké wajákelana chiyá wakáraꞌajeri pechu iꞌimakeri palá José nakú. 22 Raú riyurí José piyuke richujena wakáraꞌajeri penaje. José wakáraꞌakerino neká nakaje nalaꞌajíkareno inaꞌuké wajákelana chu nakú. 23 Unká namájeri aꞌaké rinakojó nakaje rilaꞌajíkare. Unká kaja ramake mékeka rilaꞌaká rijápakaꞌala, rilaꞌajíkale piyuke nakaje palá. Palá rilaꞌajika nakaje, Tupana aꞌajíkale riñathé rilaꞌakana aú.