—Unká piwáꞌakalajo maárowajeru inanaru waꞌaté. 2 Piꞌijná chuwa Padan-aram ejo paꞌajuta Betuel ñakaré ejo, rejo piwáꞌakajo pikú Labán itu waꞌaté. 3 Eko Tupana, piyukeja wani laꞌaká nakaje, laꞌá piká palá, kajrú piyani iꞌimakáloje penaje. Ñaké kaja pilakénami iꞌimakáloje penaje, pipalamane kajrú wani inaꞌukena iꞌimajika marí ejaꞌawá chu. 4 Rilaꞌajé kaja pinaku palá piyani, pilakénami, kele waꞌaté, marí teꞌerí yuríkoloje ijló iteꞌerewa penaje. Ajopana teꞌeré eyájena ke weká maare meꞌetení. Marí teꞌerí nakú rimá paꞌajuta Abraham michujlo iꞌimaká, riyuríkoloje rilakénamijlo penaje.

10 Ilé kaje aú Jacob jáchoꞌoro Beerseba teꞌeré eyá, riꞌijnakáloje Harán teꞌeré ejo. 11 E kaja riꞌijná reyá, pajluwa kala ketana raꞌapaka. Kaja ewaja rikeñoꞌó ajúwaꞌakaje, raú ritajnó rikamátakoloje re mapeja penaje. Re rijñaꞌá pajlúwaꞌala jipa riwílaꞌaru jaꞌapí toꞌotájona penaje, e kaja rikamato. 12 Re rikamátako ee, ritapúnaꞌa; ritapú ramá mitamitá ke witúkaꞌaka majó jeꞌechú chiyá teꞌerí eꞌiyajé; riká chuwá ramá Tupana waꞌatéjena, jeꞌechú chiyájena, witúkaꞌaka palanakíyaka. Neꞌiyajena witúkaꞌaño kawakaje, ñaké ajopana apiyákaka neká yenojo piño. 13 Ramá kaja Tupana iꞌimaká, maare ke riꞌimá awaꞌá. Reyá remaꞌá rimaká rijló: “Tupana nuká. Paꞌajuta Abraham, paraꞌapá Isaac waꞌaté, kele pechu iꞌimakare chojé kaphí, nuká. Pijló, pilakénamijlo waꞌaté, noꞌojé marí teꞌerí meꞌetení pitoꞌokaro nakú, riyuríkoloje iteꞌerewa penaje. 14 Íkiꞌiruna wani pilakénami iꞌimajika; muꞌupé iꞌimaká teꞌerí nakuwá, ke kaja íkiꞌika neꞌemajika; piyukeja ejaꞌawá chuwá neꞌemajika. Neꞌiyajena iꞌimajeño kamú jeñoꞌoká ejo pumitá nakojó; ajopana iꞌimajeño kamú jaꞌajiko ejo pumitá nakojó; eyá neꞌiyajena iꞌimajeño kaja riparaꞌalá chojó pumitá nakojó. Neꞌemajé kaja apoꞌojó pumitá nakojó, ke pilakénami iꞌimajika piyukeja wani marí ejaꞌawá chuwá. Napalamane nulaꞌajé piyukeja inaꞌukena palá. 15 Nuꞌumajé kaja pijwaꞌaté, numejñátakaloje piká chapú kaje liyá, mérowa paꞌapájika ewá. Nupaꞌataje kaja piká majó papumí chuwá, marí teꞌerí nakojé. Unká wani nuyurílaje piká, aꞌajná nulaꞌajika pijló piyuke nakaje, numíchaje nakú pijló iꞌimichaka nakú ejená”, ke Tupana kemaká rijló ritapú.

16 Rapoka ejomi, ripechu iꞌimá: “Kewaka, maare Tupana, unká nuweꞌepílacha maáreka rapukuna iꞌimichaka, nuphíchaka majó ee”. 17 Kajrú rikeroꞌokó raú, ripechu iꞌimá: “Tupana pukuna maare. Maare riñakaré, maare kaja rinumaná, iná mujlúkaꞌakaloje jeꞌechú chojé richuwá penaje”, ke ripechu iꞌimaká.

18 E muní ke rapoka lapiwá wani. Ritáraꞌata riká jipa ritoꞌotákare riwílaꞌaru jaꞌapejé. Rejomi rakhoꞌó nakaje jilá rinakojé, riyuríkoloje Tupánajlo ke penaje. 19 Rikaja kaja pukunaji e pajimila iꞌimá júpimi ke. Rií iꞌimari Mejámaꞌatani. Riwakajé Jacob apiyaka rií Betel ke iꞌimaká. (Tupana ñakaré ke kemakánaka Betel napuraꞌakó chu.)

20 E Jacob kemari Tupánajlo: “Piꞌimajika ee nujwákeꞌewe, pamájika ee palá nuká, chapú kaje liyá nuꞌujnajika ewá; eyá paꞌajika ee nojló aꞌajnejí nojñákaloje penaje; paꞌajika ee kaja nojló aꞌarumakaji; 21 eyá nupaꞌajiko ee piño majó nuñakajela ejo palani peyajweni, e nupechu iꞌimajé pichojé kaphí. 22 Marí jipa nutáraꞌatiya, iná weꞌepíkaloje papukuna maare. Eyá, Tupana, piyukeja nakaje paꞌajíkare nojló nakiyana nupaꞌataje pijló. Pajluwaja noꞌojé pijló iyamá théꞌela kele nakaje iꞌimajíkare nojló nakiyana”, ke ripuraꞌakó Tupana waꞌaté.