Isaac puraꞌakó Tupana waꞌaté Jacob, Esaú, kele nakú, rilaꞌakáloje nanaku palá penaje yukuna marí
27
E kaja phíyuꞌuke wani naraꞌapá Isaac iꞌimaká, unká méñoꞌojo ramala. Raú riwaꞌa riꞌirí pheꞌejrí Esaú maná, e riphá rinaku, rimá rijló:—Nuꞌurí.
—¿Meke pimájika nojló?, paꞌayú.
2 Rimá rijló:
—Kaja pamá chuwa phíyuꞌuke wani nuká, ñakele chuwa manaꞌí chiyó kaꞌajná nutakaꞌajé. 3 Raú chuwa, pijñaꞌá piwiraꞌapare, ijijila waꞌaté, pinókaloje nojló kamejeri penaje. 4 Pinójika riká ejomi, pimothoꞌó nojló riká palá, ralá waꞌaté, poꞌomá nuwátaka ke. Rejomi paꞌachá nojló riká majó, nojñákaloje penaje, nutakaꞌajika yámona nupuraꞌakóloje Tupana waꞌaté pinaku, rilaꞌakáloje piká palá penaje.
5 —Je —ke rimaká.
E riꞌijná kamejeri noje rijló. Rebeca jemaꞌayó mékeka rimaká raraꞌapajlo, raú rochoꞌota riyukuna ruꞌurí Jacobjlo. 6 Rumá rijmerémijlo:
—Marí ke paraꞌapá kemíchaka peꞌewejlo: 7 “Chuwa pinocha nojló kamejeri. Pinójikaja riká ejomi, pimothoꞌó nojló riká palá, ralá waꞌaté, poꞌomá nuwátaka ke. Rejomi paꞌachá nojló riká majó, nojñákaloje penaje, rejomi nupuraꞌakóloje Tupana waꞌaté pinaku, rilaꞌakáloje piká palá penaje nutakaꞌajika yámona”, ke nomiꞌichaka rimaká peꞌewejlo. 8 Ñakele chuwa, nuꞌurí, pemaꞌá palá mékeka numájika pijló meꞌetení: 9 Piꞌijná, pinocha wapirana nakiyana, iyamá kawayana pirakana. Nukako mothoꞌó rijló riká palá wani, riwátaka ke. 10 Rejomi piꞌijnataje pikó rijló riká, rajñákaloje penaje. Raú ripuraꞌajó Tupana waꞌaté pinaku, rilaꞌakáloje piká palá penaje ritakaꞌajika yámona.
11 —Unká paala, amí. Kajrú wani noꞌowé Esaú chijné, eyá nuká unká nuchijné iꞌimalá. 12 Apala rijápaje nunaku, e kaꞌajná rimaje nojló: “Unká Esaú kalé piká”, ke. Raú ripechu iꞌimajla nunaku: “¿Ramákaja chi rilaꞌaká nuká?”, ke. Ilé ke nupajlákela rijwaꞌaté, unká rimalajla Tupánajlo, rilaꞌakáloje nuká palá penaje. Lanakiya rimajla rijló, riwajákaloje nuká ilé kaje pachá —ke Jacob kemaká rojló.
13 —Unká, nuꞌurí. Nukako riwajá ilé kaje pachá, ñakele pemaꞌá noꞌopiyá. Pijiꞌichá nojló majó iyamá kawayana pirakana yaní.
14 —Je —ke rimaká ralojlo.
E riꞌijná najñaꞌajé. Rinó iyamá, rejomi riꞌijnatá natami raló ejo. Rejomi romothoꞌó riꞌimi, ralá waꞌaté, poꞌomá Isaac wátaka ke. 15 Rejomi roꞌó Jacobjlo Esaú aꞌarumaká nakiyana palá nojé, nañakaré chu iꞌimakare nakiyana, raꞌakáloje riká rinakuwá penaje. 16 Ropoꞌó kaja kawayá pirakana ímami raꞌanapitá nakojé, rinúrupi nakojé waꞌató. 17 Rejomi roꞌó rijló riꞌimi romothoꞌokare, pan waꞌaté, raꞌakáloje riká raraꞌapajlo penaje.
18 E riꞌijnatá rijló riká riꞌimaká ejo, rimá rijló:
—Paꞌayú.
—Maare nuká, nuꞌurí. Iyamá nuyani, ¿mékaje chi piká?
19 —Esaú nuká, piꞌirí pheꞌejrí. Kaja nuliꞌichá pimíchaka nojló iꞌimichaka ke, ñakele páchoꞌo chuwa yáꞌajo, paꞌayú, pajñachi nujwánaꞌapa nakiyana. Rejomi pipuraꞌachó Tupana waꞌaté nunaku, rilaꞌakáloje nuká palá penaje.
20 —Eta, ¡meke laꞌajé chi pinocha kiñaja wani kamejeri, nuꞌurí!
Raú rimá rijló:
—Tupana, pipechu iꞌimakare chojé kaphí, aꞌachari nuñathé, nuphátakaloje kamejeri kiñaja penaje.
21 —Majó piꞌijná nowaꞌajé, nujápachi pinaku, nuweꞌepíkaloje Esaú wánika piká.
22 Raú Jacob jatataro rawaꞌajé, rijápakaloje rinaku penaje, rimá rijló:
—Meke Jacob núrupi ke wani pinúrupi mejé, eꞌiyonaja paꞌanapitá, Esaú aꞌanapitá ke.
23 Kachijneni raꞌanapitá iꞌimaká, Esaú aꞌanapitá ke kaja, raú unká riweꞌepila Jacob ka riꞌimaká. Kaja riwata Tupánajlo kemakana, rilaꞌakáloje riká palá penaje. Eꞌiyonaja rimá piño rijló:
—¿Kewaka wani chi, Esaú piká?
—Aꞌa.
Raú rimá rijló:
25 —Chuwata paꞌá nojló riꞌimi, nojñachi pijwánaꞌapa nakiyana. Rejomi nupuraꞌajó Tupana waꞌaté pinaku, rilaꞌakáloje piká palá penaje.
E raꞌá rijló riká; rajñá raꞌapiyá riká; raꞌá kaja rijló kajmú jalá amúraꞌatakanami riꞌirakáloje. 26 Rejomi raraꞌapá kemari rijló:
—Chuwa, nuꞌurí, majó piꞌijná, pichiñoꞌochá nujimá chiyá.
27 Raú riꞌijná rawaꞌajé, richiñoꞌokáloje raraꞌapá jimá chiyá. Waꞌató ke raraꞌapá jamaꞌaká raꞌarumaká ama, jamaꞌarí Esaú aꞌarumaká mela riꞌimaká, raú ripechu iꞌimá: “Nuꞌurí Esaú joꞌó riká”, ke. Ilé kaje aú ripuraꞌó Tupana waꞌaté rinaku, rilaꞌakáloje riká palá penaje, rimá rinaku:
“Aꞌa, nuꞌurí aꞌarumaká mela joꞌó marí.
Ejaꞌawá, Tupana laꞌakare palá, ke mela rama.
28 Nuwata Tupana wakáraꞌaka juni pijló jeꞌechú chiyá,
pijñaꞌakáloje palá nojé nakaje pejátajikare icha penaje.
Kajrú pijñaꞌajika trigo icha, kecha kajmú icha.
29 Nuwata kajrú inaꞌukena laꞌaká pijló nakaje.
Nuwata kaja kajrú inaꞌukena iphaka paꞌapí.
Pejena wakáraꞌajeri piꞌimajika, nephaje paꞌapí.
Eyá laꞌajeño piká chapú, amájeño kaja chapú kaje yajwé.
Eyá laꞌajeño piká palá, nakú Tupana laꞌajé kaja palá”,
ke rimaká rinaku, Tupana laꞌakáloje riká palá penaje.
30 Kaja Isaac puraꞌó Tupana waꞌaté, rilaꞌakáloje Jacob nakú palá penaje. Rejomi ripaꞌó raraꞌapá iꞌimaká eyá, rejéchami Esaú iphaka kamejeri nójemi. 31 Rimothoꞌó kaja rijló riꞌimi, ralá waꞌaté poꞌomá. Rejomi riꞌijnatá riká raraꞌapá iꞌimaká ejo, rimá rijló:
—Paꞌayú, páchoꞌo chuwa, pajñachi nujwánaꞌapa nakiyana, rejomi pipuraꞌachó Tupana waꞌaté nunaku, rilaꞌakáloje nuká palá penaje.
32 Raú raraꞌapá kemari rijló:
—¿Na inaꞌukeka chi piká?
—Nuká Esaú, piꞌirí pheꞌejrí.
33 Ujwí raraꞌapá pechu laꞌakó raú, rikurúkako rimaká rijló:
—Eta, ¿na ta chi kele nóchari kamejeri, iꞌimatíyari nojló riꞌimi, ralá waꞌaté, paineko pipiyá? Piphíchaka piyá, nojicha raꞌapiyá riká. Rinaku numicha Tupánajlo, rilaꞌakáloje riká palá penaje. Kaja keja riꞌimajika rijló chuwaka.
34 Ilé ke rimaká aú, kajrú Esaú iyaka, rawíyoꞌoko rimaká rijló:
—Paꞌayú, pipuraꞌó kaja Tupana waꞌaté nunaku, rilaꞌakáloje kaja nuká palá penaje.
35 Eꞌiyonaja raraꞌapá kemari rijló:
—Kaja peꞌewé pajlicha nujwaꞌaté. Riká iphíchari paineko majó, numakáloje Tupánajlo rinaku, rilaꞌakáloje riká palá penaje. Pijló penaje ilé nakaje palá Tupana laꞌajíkare iꞌimajla.
36 E Esaú kemari:
—Ilé kaje ta riꞌimakale, rií Jacob. ¡Kaja iyaampe cha rilaꞌaká ta nuká ramákaja! —ke Esaú kemaká raraꞌapajlo—. Paineko rikejaꞌa nuliyá rinakojé, nuyuriko piyá pinánemi jaꞌapiyá, riká yuríkoloje nopumí chojé pheꞌejrí ke penaje, piyuke pinánemi yuríkoloje rijló penaje. Eyá chuwa rikiꞌichá piño nuliyá, nuꞌumaká piyá nakaje jaꞌapiyá, pimíchaje nakú Tupánajlo nojló penaje iꞌimakárejla.
Rimá piño raraꞌapajlo:
—¿E pimakajla kaja nunaku Tupánajlo, rilaꞌakáloje palá nunaku penaje?
37 Eꞌiyonaja raraꞌapá kemari piño rijló:
—Kaja noꞌochá Jacob, riꞌimakáloje piwakáraꞌajeri penaje. Nuyuricha kaja rejena rijló, neꞌemakáloje rijwaꞌaté jápajeño penaje. Numicha kaja Tupánajlo, raꞌakáloje rijló kajrú trigo, kajmú icha waꞌaté. Eta, ¿meke chi numakajla piño rijló, rilaꞌakáloje pijló nakaje penaje?
38 E Esaú kemari piño rijló:
—Paꞌayú, ¿pajluwaja nakuja kalé chi pimajla Tupánajlo, rilaꞌakáloje riká palá penaje? Pimá kaja nunaku Tupánajlo, ñaké kaja rilaꞌakáloje nuká palá penaje.
Rejomi kajrú riyako rawíyoꞌoka piño.
39 E raraꞌapá kemari rinaku:
“Piká iꞌimajeri juká palani teꞌerí liyá,
unká kaja juni jaꞌalajo palá piꞌimajika ewá.
40 Pikoja pimejñátajika pikó pilekare aú.
Pijmeremi waꞌaté jápajeri ke piꞌimajika.
Pikeñoꞌojika ejéchami nakaje laꞌakana pipechu keja ee,
kaja unká pijmeremi wakáraꞌalaje piká”,
ke Isaac kemaká Esaú nakú.
Jacob ñaakó reꞌewé Esaú liyá yukuna marí
41 E kaja ilé kaje ejomi, chapú Esaú amájika reꞌewé, raraꞌapá kemakale rinaku Tupánajlo, rilaꞌakáloje riká palá rapumí chojé penaje. Raú riꞌijnatá ripéchuwa: “Paꞌayú tajnájiko ejomi, nonótaje riká ta”.
42 Raló weꞌepiyo mékeka ripechu iꞌimaká rinaku, raú ruwaꞌa Jacob maná. Riphaka runaku ee, rumá rijló:
—Ilé peꞌewé puraꞌajero rileꞌejé jaꞌakumi nakú. 43 Ñakele pemaꞌá noꞌopiyá: chuwa piñaó Harán ejo, noꞌowé Labán, pikú ñakaré ejo. 44 Najwaꞌaté piyurejo, aꞌajná peꞌewé yuchá jaꞌapájika riliyá ketana. 45 Ripalaꞌajiko ee, nuwakáraꞌaje pipaꞌatákana majó. Unká nuwátala nuyani iyamá kapichako pajñakani, rikaja kaja weꞌechú kaꞌalá japi.
46 Rejomi rumá naraꞌapajlo:
—Kaja wani noyaꞌó Esaú luna hitítana waꞌaté iꞌimakana nakú. Jacob wáꞌakakelo kaja pajluwájaru maárowajeru waꞌaté, unká méñoꞌojo nujñaꞌalajla panaku. Ilé kaje akuwanaja nuwátajla takaꞌakaje.