—Abraham.

—Maare nuká —ke raꞌajipaká rijló.

2 E Tupana kemari rijló:

—Chuwa piwaꞌa piꞌirí Isaac, riká pajluwaja piꞌirí, kajrú wani piwátakare. Piwáꞌaje riká ají ke Moria teꞌeré ejo, re pinoje nojló riká, puꞌuwaré ilaꞌakare chaya, kéchami pikáraꞌatajika rinapónami. Iphájika penájeja, jáchoꞌojiko ipuré nuyaꞌatájikare pijló jiꞌiwátaje, re pinókaloje riká nojló penaje.

3 E muní ke lapiyami, Abraham wapaꞌataka jiyá, rijñaꞌakáloje riká rijwaꞌató penaje. Riyáꞌata kaja ñákaꞌajori kaje rikawarute wajlé nakojé. Rejomi náchoꞌo reyá, neꞌejnakáloje teꞌerí, Tupana kemakare nakú rijló ejo penaje. Riwaꞌa Isaac rijwaꞌató, eyá iyamá rijwaꞌaté jápajeño. 4 Jaꞌapákaje nakuja neꞌemá, weji ke kala iꞌimaká wakajé, Abraham amari yaꞌajnaya pukunaji, Tupana kemakare nakú rijló iꞌimaká. 5 Raú rimá rijwaꞌaté jápajeñojlo:

—Kaja, maáreja iyuró kawarú waꞌaté, eyá weká jaꞌapájeño Isaac waꞌaté rejo, walaꞌakáloje puꞌují wapéchuwa Tupánajlo. Rejomi wapaꞌajó piño majó, wapaꞌakóloje wañakaré ejo.

6 Rejomi Abraham ñaꞌarí rikápojo jiyá rijñaꞌakare rijwaꞌató iꞌimaká, ritoꞌotákaloje riká Isaac wakúlaꞌapaje penaje. Eyá riká ñaꞌarí rijwaꞌató jiyá iꞌipá, irajú waꞌaté. Rejomi ráchoꞌo ipuré nakuwá riꞌirí waꞌaté. 7 Júpichami riꞌirí kemaká rijló:

—Paꞌayú.

—¿Na piwata, nuꞌurí?

—Paꞌayú, wajiꞌichá wajwaꞌató jiyá, jiyá iꞌipá, kaje maká. Eta ¿mere chi oveja iꞌirí, wenójikare Tupánajlo, puꞌuwaré walaꞌakare chaya?

8 —Nuꞌurí, Tupana aꞌajeri wañathé, oveja iꞌirí iꞌimakáloje wajló, wenókaloje rijló riká penaje.

Reyá naꞌapá manaꞌija riꞌirí waꞌaté. 9 Kaja ewaja nephá pukunaji, Tupana kemakare nakú Abrahamjlo iꞌimaká ejo. Rejé ripitá jipa altar penaje. Palá ripitaka jiyá rinakojé ejéchami, repoꞌotaka riꞌirí Isaac, ritoꞌotákaloje riká jiyá chaje. 10 Rejéchami rijñaꞌaká irajú rikápojo, rijoꞌokáloje reꞌiyajé raú, rinókaloje riká Tupánajlo penaje. 11 Wajé rijoꞌokajla reꞌiyajé ejéchami, Tupana waꞌatéjeri, jeꞌechú chiyaje, awíyoꞌoka rijló jeꞌechú chiyá, rimá rijló:

—¡Abraham! ¡Abraham!

—Maare nuká.

12 —Pilaꞌaniña chapú piꞌirí, pinóniña riká, chuwa nuweꞌepíchaka kewaka pipechu kaphí Tupana chojé. Raꞌapiyá jemaꞌajeri wani piká. Pajluwaja piꞌirí, eꞌiyonaja unká pimejñátala riká Tupana liyá.

13 E Abraham yakáꞌaro rawaꞌó, amari aꞌajnare ke oveja achiñá táraꞌako. Kaja riꞌiwawi jepoꞌotó kawichini kaje eꞌiyajé, raú patakéjami ke riꞌimaká. Riká ripatá, rinókaloje riká Tupánajlo riꞌirí apumí chojé. 14 Rejomi raꞌá riká pukunaji ií: “Tupana aꞌarí inajlo nakaje kamuꞌují iná laꞌakare nakú”, ke. Ñakele re joꞌó kaja nemaká ñaké riká pukunaji nakú. 15 Rejomi Tupana waꞌatéjeri, jeꞌechú chiyaje, kemari piño rijló jeꞌechú chiyá:

16 —Marí ke Tupana kemaká pinaku. “Pajluwaja piꞌirí, eꞌiyonaja unká pimejñátalacha riká nuliyá, ñakele numá nunakuwaja ke: 17 Nulaꞌajé piká palá wani, kajrú wani pilakénami iꞌimakáloje penaje, iwijrina ke kaja íkiꞌika. Keꞌepé juni jalomi turenawa iꞌimakare, ke kaja íkiꞌika neꞌemajika. Ñakeja pilakénami cháꞌatajika chapú pechu iꞌimajíkaño nanaku. 18 Pilakénami palamane piyukeja, ajopana ejaꞌawá chuwá iꞌimakaño, iꞌimajika palá. Ilé ke riꞌimajika najló, pemaꞌakale noꞌopiyá” —ke rimaká Abrahamjlo.

19 Rejomi napaꞌó piño rijwaꞌaté jápajeño yuriko iꞌimaká ejo. Reyá napaꞌó najwaꞌaté pajñakani ají ke pajimila Beerseba ejo. Rejo ranúkaꞌo iꞌimaká, re riꞌimakáloje penaje.