—Nuwakáraꞌajeri, pilaꞌá nojló nakaje, ilaꞌaniña ikó tuꞌujné jaꞌapákaloje maáreya penaje. 4 Palani ilé numíchaje nakú pijló iꞌimajika ee, nujñaꞌajé ijló juni majó, jipakáloje jiꞌimá nakiyá raú. Rejomi iwatánaꞌaje maare meketánaja ipeꞌení chu aꞌawaná jaꞌapí. 5 Kaja iphicha nunaku maáreje, nuꞌumaká ejé. Ijwaꞌaté jápajeri nuká, ñakele meketana iꞌimajemi ajñaje aꞌajnewá itejmú iphachi, jaꞌapákaloje piño penaje.

—Je, ñaké riká —ke nemaká rijló.

6 E rimujlúkaꞌa ripajré chojé, rimá Sárajlo:

—Pijñaꞌá kiñaja veinte kilos harina palá nojé nakiyana, pilaꞌachí raú pan.

7-8 Rejomi rechoꞌó, rematena pirakana iꞌimaká ejo, e rikulá jémana pirakana yaní eꞌiyayá pajluwaja, ajopana chaje palaka iꞌimakare. Riká riwaꞌa rijwaꞌaté jápajeri ejo, rinókaloje riká penaje. Rejomi rimataꞌatá riꞌimi, rimothoꞌokáloje riká penaje. Riñapátakaja rimothoꞌokana ejomi, riꞌijnatá riká Abrahamjlo. Rejomi Abraham aꞌá riká richaje iphákañojlo. Wechi Abraham aꞌaká najló aꞌajnejí, keꞌiyapé nojé aꞌajnejí raꞌá najló. 9 Najñaka naꞌajnewá ejomi, nemá rijló:

—¿Mere chi piyajalo Sara?

—Aꞌajnare ruká wapajré chu.

10 Eyá pajluwaja nanakiyana kemari rijló:

—Nuká paꞌajero piño majó pamaje apú jarechí wakajé; riwakajé kaja re piyajalo Sara iꞌirí iꞌimajé rukapi.

Napajré numaná yámojo pumitá riyajalo Sara yáꞌayo napuraꞌakó jemaꞌakana nakú. 11 Kaja pheñawilana neꞌemaká ruyajná waꞌaté; kaja roꞌopá roná chiyá, ruyani iꞌimakáloje penaje. 12 Romaꞌaká rimaká: “Ruꞌurí iꞌimajeri”, ke aú unká méñoꞌojo rujñaꞌalá iꞌichakaje panaku. Raú ruꞌuchá kachuwa rokó, rupechu iꞌimá: “¿Meke chi rimaká nunaku: ‘Nuꞌurí iꞌimajeri’, ke? Kaja wani wajáchaꞌo nuyajná waꞌaté”, ke rupechu iꞌimaká.

13 E Tupana kemari Abrahamjlo:

—¿Naje chi Sara iꞌichá? ¿Meke chi rupechu runakuwá: “Kaja phíyuꞌukeru wani nuká, ¿meke laꞌajé chi nuꞌurí iꞌimajla?”, ke 14 Unká na iꞌimalá, unká méñoꞌojo nulaꞌalare kaje. Kaja numicha pijló: Apú jarechí iꞌimajika wakajé, nupaꞌajó piño majó, ke. Riwakajé kaja re ruꞌurí iꞌimajé rukapi —ke rimaká rijló.

15 Ilé ke rimaká aú Sara keroꞌoyó; rukeroꞌokó akuwaná rumá Tupánajlo:

—Unká nuꞌuchalacha.

—Nuweꞌepí piꞌichichaka —ke rimaká rojló.

16 E kaja iphaño richaje chiraꞌajó táraꞌaño, naꞌapákaloje reyá ají ke pajimila Sodoma, eyá Gomorra, kele ejo. E Abraham jaꞌapari reyá najwaꞌaté meketánaja, riꞌimakáloje riyukuno najló penaje. 17 E Tupana pechu iꞌimari Abraham nakú: “Unká meke laꞌajé numichoꞌotálajla riliyá nakaje nulaꞌajíkare meꞌetení. 18 Nuleꞌejena inaꞌukena jaraꞌapá penaje riꞌimajíkale, nuꞌumajé rijló riyukuna. Íkiꞌiruna rilakénami iꞌimajika, ajopana teꞌeré nakuwá, ajopana teꞌeré nakuwá, ke neꞌemajika. Ripalamane nulaꞌajé piyukeja inaꞌukena palá. 19 Kaja nuꞌuwapakare nujluwa riká, rewíñaꞌatakaloje riyani nunaku penaje, raꞌapátakaloje kaja nupurákaꞌalo riyánijlo. Ñaké kaja riyanimínami jaꞌapátajika riká nayánijlo, nayánijlo ke, neꞌemakáloje noꞌopiyá jemaꞌajeño wani, neꞌemakáloje palá laꞌajeñó raú. Nemaꞌajika ee nupurákaꞌalo jaꞌapiyá, nulaꞌajé nanaku palá, numaká nanaku iꞌimaká ke”. 20 Ilé ke ripechu iꞌimakale Abraham nakú, rimá rijló:

—Puꞌuwaré laꞌajeñó wani piyukeja pajimila Sodoma, eyá pajimila Gomorra, kele eyájena. Nalaꞌá namanaicho, ajopana unká naluna kalé iꞌimakaño waꞌaté; puꞌuwaré wani nayukuna jemaꞌakó rewá. 21 Ñakele nuꞌujnajé rejo namaje, nomákaloje kewaka kajrú nalaꞌaká puꞌuwaré, nemaká nanaku ke. Raú nuweꞌepeje riká —ke Tupana kemaká rijló.

22 Eyá ajopana iyamá jaꞌapáñaaño neká, neꞌejnakáloje pajimila Sodoma ejo. Re kaja joꞌó Abraham yuriko Tupana waꞌaté 23 ejéchami ratatako rawaꞌajé, e rimá Tupánajlo:

—¿E pikapichátajika piyukeja inaꞌukena, palá laꞌajeñó, puꞌuwaré laꞌajeñó waꞌaté? 24 Apala re kaꞌajná cincuenta palá laꞌajeñó iꞌimajika pajimila eyájena eꞌiyá. ¿E pikapichátajika neká, puꞌuwaré laꞌajeñó waꞌaté? ¿Unká chi pamálojla nachaje palá laꞌakaño palamane? 25 Unká naje pikapichátala palá laꞌajeñó, puꞌuwaré laꞌajeñó waꞌaté, unkale nalaꞌalá puꞌuwaré, ajopana laꞌaká ke. ¡Pilaꞌaniña ilé ke! Pikaja kalé kemájeri inaꞌuké nakú mékeka nalaꞌakana iꞌimajika, nakaje nalaꞌakare pachá. Palá laꞌajeñó nakú pilaꞌajé palá, palá nalaꞌakare lokópaꞌala —ke rimaká Tupánajlo.

26 E Tupana kemari rijló:

—Nomájika ee Sodoma eyájena eꞌiyá cincuenta palá laꞌajeñó, unká nukapichátalaje neká. Napalamane nomajo piyukeja rewá iꞌimakaño chaje.

27 E Abraham kemari piño rijló:

—Pamó nuchaje, nupuraꞌakole marí ke wani pijwaꞌaté. Tupana piká, eyá nuká ta inaꞌukeja, eꞌiyonaja kalé nulaꞌá kaphí nupéchuwa, nupuraꞌakóloje marí ke pijwaꞌaté penaje. 28 Eta cuarenta y cinco kaꞌajná palá laꞌajeñó iꞌimajika ee, ¿e pikapichátajika neká piyukeja, puꞌuwaré laꞌajeñó waꞌaté?

—Unká —ke Tupana kemaká rijló—. Unká nukapichátalaje neká, cuarenta y cinco palá laꞌajeñó iꞌimajika ee najwaꞌaté.

29 —Eta, cuaréntaja kaꞌajná neꞌemajika ee.

—Cuaréntaja kaꞌajná neꞌemajika ee, unká kaja nukapichátalaje riká pajimila.

30 Raú Abraham kemari piño rijló:

—Piyúchaꞌaniño nuchá, nupuraꞌakole pijwaꞌaté rikaja kaja nakú. Eta, ¿meke pilaꞌajika tréintaja kaꞌajná palá laꞌajeñó iꞌimajika ee?

Raú Tupana kemari piño rijló:

—Tréintaja kaꞌajná neꞌemajika ee, nomajo kaja riká pajimila eꞌiyowá iꞌimakaño chaje.

31 Abraham kemari piño rijló:

—Tupana, kaphí nupechu iꞌimakare chojé piká. Nuweꞌepí noyaꞌátaka piká marí kaje nakú puraꞌakano aú, eꞌiyonaja kaphí nupechu, nupuraꞌakóloje pijwaꞌaté rinaku penaje. ¿Meke pilaꞌajika véinteja kaꞌajná palá laꞌajeñó iꞌimajika ee?

Tupana kemari:

—Véinteja kaꞌajná neꞌemajika ee, unká kaja nukapichátalaje pajimila eyájena.

32 Abraham kemari piño rijló:

—Pilaꞌá nojló nakaje. Tupana, piyúchaꞌaniño nuchá, kaja penaje numá pijló chuwa, eyá kaja unká nukawílaꞌalaje pinaku. Eta, iyamá théꞌela keleja kaꞌajná palá laꞌajeñó iꞌimajika ee neꞌiyá, ¿meke pilaꞌajika neká?

Tupana kemari:

—Iyamá théꞌela kele kaꞌajná palá laꞌajeñó iꞌimajika ee neꞌiyá, unká kaja nukapichátalaje pajimila eyájena.

33 Ilé ke Tupana puraꞌakó rijwaꞌaté, rejomi raꞌapá reyá; lanakiya ke Abraham paꞌakó kaja ripajré iꞌimaká ejo.