—Nuká Tupana, weꞌepiri piyukeja nakaje laꞌakana. Pemaꞌá palá noꞌopiyá; pilaꞌá piyukeja nakaje palá nuwátaka ke, raú piꞌimakáloje palá nujwaꞌaté penaje. 2 Chuwaka walaꞌajika nakaje pajlokaka, riyuríkoloje ñaké penaje. Noꞌojé piñathé kajrú, nupalamane pilakénami iꞌimakáloje íkiꞌiruna penaje. ^a

3-5 Raú Abram lámaꞌaro teꞌerí jimaje. Ilé ke rijlámaꞌako teꞌerí eꞌiyajé ketana, Tupana puraꞌakó piño rijwaꞌaté, rimá rijló:

—Pijwaꞌaté nulaꞌajé nakaje, riyuríkoloje ñaké penaje. Kajrú wani pilakénami iꞌimajika, ñakele chuwa nopiyákajika pií. Maáreya aꞌajná ñoꞌojó pií iꞌimajé Abraham, kajrú wani pilakénami iꞌimajíkale. Íkiꞌiruna wani neꞌemajika, raú neꞌemajé ajopana teꞌeré nakuwá, ajopana teꞌeré nakuwá, ke.

6 Nupalamane neꞌemajé kajrú wani. Nanakiyánaja kaja iꞌimajeño nawakáraꞌajeño penaje. 7 Ñakele nakaje nulaꞌakare pijwaꞌaté iꞌimajé ñakeja kaja pilakénami waꞌaté, raú nuwata pipechu iꞌimaká nochojeja kalé kaphí. Ñaké kaja nuwátaka pilakénami pechu iꞌimaká nochojé kaphí, pipechu iꞌimajika nochojé kaphí ke kaja. 8 Marí Canaán teꞌeré piꞌimakare nakú meꞌetení, nuyureje pijló, pilakénamijlo waꞌaté, riꞌimakáloje nateꞌeré ñakeja wani penaje. Eyá neká iꞌimajeño nupalamane, nochojé napechu iꞌimajíkale kaphí —ke Tupana kemaká rijló.

9 E rimá piño rijló:

—Marí ke nuwátaka pilaꞌaká, ñaké kaja nuwátaka pilakénami, papumí chojé yuríjikaño laꞌaká: 10 Nuwata imataꞌaká piyukeja achiñana, ijwaꞌaté iꞌimajíkaño, chinuma. ^b 11-13 Imataꞌajé piyukeja achiñana, ijwaꞌaté jápajeño, ajopana teꞌeré eyájena waꞌató, yaní chinuma. Ilaꞌajé ilé ke, raú iweꞌepíkaloje ñakeja wani nujwaꞌatéjenaka iká. Ñakele iyani achiñana mothoꞌojika wakajé, imataꞌajé nachinuma, nephátajika pajluwa jápakaje, namothoꞌojika ejomi ee. Ñaké kaja imataꞌajika ijwaꞌaté jápajeño, ajopana teꞌeré eyájena, kerákoꞌopatena chinuma. Ilé ke ilaꞌajika, iyuríkoloje nupurákaꞌalo, numakare nakú ijló iꞌimaká jaꞌapiyá, iꞌimajika ketana. 14 Eyá mamataꞌakánaru chinúmari unká iꞌimalaje ijwaꞌaté, unkale riphala nupurákaꞌalo, numakare nakú ijló iꞌimaká jaꞌapí.

15 Rejomi Tupana kemari piño rijló:

—Ilé piyajalo Sarai ií nopiyákaje kaja chuwa. Maáreya aꞌajná ñoꞌojó ruí iꞌimajé Sara. 16 Palá nulaꞌajika runaku, piꞌirí iꞌimakáloje rujwaꞌaté penaje. Palá wani nulaꞌajika ruká, kajrú rulakénami iꞌimajika ajopana teꞌeré nakuwá, ajopana teꞌeré nakuwá, ke. Nanakiyánaja kaja iꞌimajeño nawakáraꞌajeño penájena.

17 Raú Abraham lámaꞌaro teꞌerí jimaje. Riꞌichakó riꞌijnataka ripéchuwa: “Kaja cien jarechí cha nuká. ¿Meke laꞌajé chi nuꞌurí iꞌimajla? Ñaké kaja nuyajalo, phíyuꞌukeru ruká, noventa jarechí cha ruká. ¿Meke laꞌajé kaꞌajná ruwáꞌajla ruꞌurí?” 18 Raú rimá piño Tupánajlo:

—Apala Ismael nakú kaꞌajná pilaꞌajé palá, ripalamane nulakénami iꞌimakáloje kajrú penaje.

19 —Unká. Piyajalo waꞌaté piꞌirí iꞌimajé, paꞌajé rií Isaac. Piyuke nakaje, numakare nakú pijló, iꞌimajeri numaká rinaku keja. Ñakele nakaje wapuraꞌakaro nakú pajwaꞌatéchaka iꞌimaká, riꞌimakáloje ñakeja penaje, jaꞌapiyá riꞌimajé. Riyani, rilakénami, kele waꞌató iꞌimajeño kaja raꞌapiyá. 20 Eyá ilé Ismael, pimíchaje nakú, nulaꞌajé kaja riká palá, kajrú wani kaja rilakénami iꞌimakáloje penaje. Iyamá iphata jiꞌimaji nakojé kele riyani nakiyana iꞌimajika nawakáraꞌajeño penájena. 21 Eꞌiyonaja nakaje, numakare nakú pijló iꞌimaká, riꞌimakáloje ñakeja penaje, yuréjero Sara iꞌirí Isaacjlo. Pajluwa jarechí iꞌimajemi ruꞌurí iꞌimajeri, meꞌetení ke cha.

22 Tupana ñapátakaja rijwaꞌaté puraꞌakano ejomi, raꞌapá riliyá.

23-27 Riká weꞌechú kaꞌalá jápija Abraham laꞌarí Tupana wakáraꞌaka rilaꞌaká ke. Rimataꞌá riꞌirí Ismael chinuma, ñaké kaja rimataꞌataka rijwaꞌaté jápajeño chinuma. Nanakiyana mothoꞌoñó re iꞌimaká, ajopana riwarúwaꞌakarena neꞌemaká. Piyuke riñakaré chiyájena achiñana chinuma namataꞌá, Tupana wakáraꞌaka riꞌimaká ke. Noventa y nueve jarechí cha Abraham iꞌimaká wakajé, namataꞌatá nachinuma iꞌimaká. Eyá riꞌirí Ismael iꞌimari weji kele iphata jiꞌimaji nakojé kele jarechí cha riwakajé.