—Kaja piweꞌepí unká Tupana yurila nuyani iꞌimaká pijwaꞌaté. Ñakele numá pijló, piꞌimakáloje nujwaꞌaté jápajeyo waꞌaté, raú kaꞌajná nuyani iꞌimajé rupalamane aú.

3 Remaꞌá roꞌopiyá, rumakare nakú rijló, raú Sarai yuriyo rijló Agar. Riwakajé kaja iyamá théꞌela kele jarechí ketana cha neꞌemaká Canaán teꞌeré nakú. 4 E kaja Abram iꞌimari Agar waꞌaté, raú rumanoꞌó. Ruweꞌepika kanupá ruꞌumaká aú, ruphake roꞌopiwá Saraijlo, 5 raú Sarai kemayo Abramjlo:

—Kaja chuwa unká Agar iphala noꞌopí, pipachá riká. Nuká yuriyo pijló ruꞌumaká, eyá chuwa ruꞌurí iꞌimajika, raú rulaꞌá rokó cháꞌatajeyo ke wani nojló. Tupana kemájeri na pachaka unká ruphala noꞌopí: nupachá kaꞌajná, pipachá kaꞌajná.

6 E Abram kemari rojló:

—Pijwaꞌaté jápajeyo ruká, ñakele pilaꞌá ruká piwátaka ke.

Ilé kaje aú Sarai keñoꞌoyó rulaꞌakana chapú. Raú Agar ñaayó reyá, ají ke yaꞌajnaje desierto eꞌiyowá, 7 tajnayo muthú awaꞌajé. Iñeꞌepú Shur ejo iꞌijnaká turená muthú iꞌimá. Rejé rutajnó, e manaꞌí chiyó Tupana waꞌatéjeri, jeꞌechú chiyaje, iphari runaku. 8 Rimá rojló:

—Agar, Sarai waꞌaté jápajeyo, ¿méreya chi piphicha majó; méñoꞌojo chi piꞌijná?

—Nukariwáteru eyá nuicho majó.

9 Raú rimá piño rojló:

—Pipaꞌó piño papumí chuwá rejo, eko pemaꞌá palá pikariwáteru jaꞌapiyá.

10-11 Rimá kaja rojló:

—Kanupá piká, ñakele piꞌirí iꞌimajeri. Rimothoꞌojika wakajé paꞌajé rií Ismael, ke, Tupana jemaꞌakale chapú pilaꞌaká yukuna. Kajrú pilakénami iꞌimajika; unká méñoꞌojo iná lapaꞌatálaje neꞌemajika, íkiꞌiruna wani neꞌemajíkale. 12 Kawarú, ejaꞌawá eꞌiyowaje, ke puꞌupejluka piꞌirí iꞌimajika. Yurí riꞌimajika ajopana inaꞌukena waꞌaté; ñaké kaja neꞌemajika yuriná rijwaꞌaté. Unká riꞌimalaje rejena waꞌaté, apoꞌojó riꞌimajé naliyá —ke Tupana waꞌatéjeri kemaká rojló.

13 Rejomi ruká kemayo Tupana nakú: “Palá ramaka piyukeja”, ke, rupechu iꞌimá: “Nomicha riká, amákare kaja nuká, eꞌiyonaja unká nutakaꞌalacha raú”.

15 Raú rupaꞌó piño ropumí chuwá, ají ke rukariwáteru ejo. Júpichami ruꞌurí mothoꞌoká, rejomi Abram aꞌá rií Ismael. Ochenta y seis jarechí cha Abram iꞌimaká riwakajé.