—Pikeroꞌoniño, palá nomaka piká chapú kaje liyá. Nulaꞌajé piká palá wani, kajrú nakaje yuríkoloje pijló penaje.

2-3 Raú Abram kemari rijló:

—Tupana, nuwakáraꞌajeri, unká na penaje kele nakaje paꞌajíkare nojló iꞌimalaje, unkale nuyani iꞌimalá. Kaja unká piyurila nuyani iꞌimaká, ñakele nutakaꞌajika wakajé, pajluwaja nujwaꞌaté jápajerijlo nunane yurejo. Eliezer, pajimila Damasco eyájejlo riyurejo.

4 E Tupana kemari rijló:

—Unká pijwaꞌaté jápajeri, ajopana teꞌeré eyájerijlo kalé riyurejo. Piꞌirijlo riyurejo.

5 E Tupana wáꞌari riká wakaꞌapojo, re rimá rijló:

—Piyakaꞌo jeꞌechú chojé, kéchami pilapaꞌatájika iwijrina, wamáijla pilapaꞌatákajla neká. Iwijrina ke kaja íkiꞌirunaka pilakénami iꞌimajika.

6 Kewaka Abram laꞌaká rijluwa nakaje Tupana kemakare nakú rijló, raú rilaꞌá ripéchuwa kaphí richojé. Palá Tupana pechu iꞌimaká rinaku, kaphí ripechu iꞌimakale richojé, raú rilaꞌá rijluwa riká: unká japi laꞌalá puꞌuwaré, ke. Kaja lamáꞌatakejami ke riꞌimaká Tupánajlo raú. 7 Tupana kemari rijló:

—Piyukeja nakaje miná nuká. Numá pijló iꞌimaká, páchoꞌokoloje Ur teꞌeré eyá iꞌimaká, piꞌijnakáloje majó penaje, noꞌokáloje pijló marí teꞌerí piteꞌerewa penaje.

8 Raú Abram kemari rijló:

—¿Na aú chi nuweꞌepeje riyuriko nuteꞌerewa penaje?

9 Tupana kemari rijló:

—Piwaꞌa majó pajluwaja jema pirakana iꞌirí, pajluwaja kawayá pirakana, eyá pajluwaja oveja achiñá. Weji kele jarechí kéchajena piwaꞌa majó, eyá piwaꞌa kaja majó ukuꞌukuri, túkuꞌuchi pirakana, kele.

10 Raú Abram wáꞌari neká rejo; rinó neká Tupánajlo. Riwapaꞌatá neká peꞌiyowá, rejomi rijlámaꞌata natami pawaꞌáchaka majó pitá nakojó, apoꞌojó pitá nakojó, ke, teꞌerí eꞌiyajé. Eyá neká ukuꞌukuri, túkuꞌuchi, kele unká riwapaꞌatala. 11 Re natami pitó teꞌerí eꞌiyá, rejéchami wayuna witúkaꞌaka natami nakojé, Abram jaꞌapari nanaku. 12 E kaja najúwaꞌa, rejéchami tapú cháꞌataka riká, raú rikamato matámiru. E ritapú ramá kalajeruni wani, raú kajrú rikeroꞌokó. 13 E Tupana kemari rijló:

—Piweꞌepí marí: Pilakénami iꞌimajeño ajopana teꞌeré nakú cuatrocientos jarechí ketana. Mapeja najápajika ajopánajlo rewá, unká naꞌalaje najló riwemí. Chapú wani ajopana teꞌeré eyájena laꞌajika neká. 14 Ilé kaje pachá nuwajaje wakáraꞌajeño najápaka najló mapeja, rejomi nóchoꞌotaje pilakénami reyá. Unká ajopana waꞌaté jápajeño ke kalé neꞌemajika, reyá aꞌajná ñoꞌojó, kajrú naneruna neꞌemajika. 15 Eyá piká iꞌimajeri júpija ejaꞌawá chu; phíyuꞌuke wani piꞌimajika wakajé, pitakaꞌajé manaꞌija, piꞌimakáloje paꞌajútaya waꞌaté rejomi. 16 Paineko iꞌijnajíkaño ajopana teꞌeré ejo yaní iꞌimajeño, eyá nayanimínami yaní iꞌimajeño ñaké kaja piño, eyá nalakénami yaní iꞌimajeño ñaké kaja. Rejéchami pilakénami iꞌijnajika majó, Canaán teꞌeré ejo, riꞌimakáloje nateꞌeré wani penaje. Meꞌetení unká joꞌó wani amorréona nakiyana laꞌalá puꞌuwaré wani, nukapichátakaloje neká ripachá penaje. Pilakénami iphájika majó wakajé, riphaje rená chojé, nukapichátakaloje neká penaje, puꞌuwaré wani laꞌajeñó neꞌemajíkale riwakajé —ke Tupana kemaká Abramjlo.

17 Kaja lapí iꞌimá richá kalajeruni wani iꞌimaká, rejéchami jiyá lukúnaꞌatakejami yaꞌatakó rijló, richiyá kajrú ija jeñoꞌoká. Kéchami jepé, lukúnaꞌatakejami ke, jaꞌapaka peꞌiyowá natami chawa. 18 Ilé ke Tupana laꞌaká, Abram weꞌepíkaloje kewaka nakaje rimakare nakú iꞌimajika. Rejéchami Tupana kemaká rijló:

—Marí teꞌerí noꞌojé pilakénamijlo, juni Egipto teꞌeré eꞌiyowá toꞌokó, eyá ají ke yenojo, juni Éufrates ejé. 19 Mariruna teꞌeré nukaꞌajé naliyá: quenítana, kenezítana, cadmonéona, 20 hitítana, ferezéona, refaítana, 21 amorréona, cananéona, gergeséona, jebuséona, kele teꞌeré nukaꞌajé naliyá.