Abram iꞌijnaká Lot paꞌataje yukuna marí
14
8-9 Pajimila Sodoma, eyá Gomorra, kele eyájena wakáraꞌajeño iꞌimaño pajluwa théꞌela kele. Neká iꞌijnaño naleꞌejena suráana waꞌaté, ajopana inaꞌukena waꞌaté nókajo. 11 Eꞌiyonaja ajopana, nenókakarona waꞌaté iꞌimaká, cháꞌataño neꞌemaká, raú neꞌejná pajimila Sodoma ejo. Nawáꞌata najwaꞌató Sodoma eyájena, napirana, nanane, kaje maká waꞌató. Neꞌejná kaja pajimila Gomorra ejo; ñaké kaja nawáꞌataka najwaꞌató reyájena; najñaꞌatá kaja nanane, rejomi naꞌapá reyá. 12 Lot, Abram éjeꞌerimi, iꞌimari kaja nawáꞌatakarena najwaꞌató eꞌiyá. Kaja ranúkaꞌo pajimila Sodoma ejo iꞌimaká, raú nawaꞌa kaja riꞌimaká najwaꞌató, ripirana waꞌató.14 Abram jemaꞌarí nawáꞌaka tejmuji aú réjeꞌerimi Lot yukuna, raú rawakata rijwaꞌaté jápajeño nakiyana, palá ripechu iꞌimajíkarena nakú. Trescientos dieciocho achiñana, rawaꞌá waja mothoꞌokaño neꞌemaká. Najwaꞌaté rechoꞌota neká, kaja ewaja nephata neká pajimila Dan e. 15 E lapí, manaꞌí chiyó nawajlaꞌá neká, nenókakoloje najwaꞌaté penaje. E neñaó reyá, raú nechoꞌota neká ají ke pajimila Hobá ejo. Damasco awaꞌá riká pajimila, yenojo nakojó. 16 Re nacháꞌata neká nókakajo aú, rejomi napaꞌatá piyukeja nawáꞌatakarena najwaꞌató iꞌimaká; napaꞌatá kaja nanane, napirana, kajémaka najwaꞌató. Ilé ke Abram iꞌimataka réjeꞌerimi Lot, riyajalo, riyani, rijwaꞌatéjena, kele piyukeja iꞌimaká.
Melquisedec kemari Tupánajlo, rilaꞌakáloje Abram palá penaje. Riyukuna marí
17 Kaja nacháꞌata neꞌemakánana, naleꞌejena suráana waꞌaté, e Abram paꞌaró nókajomi. Pajluwa teꞌerí, ipuré jiwami chuwá iꞌimakare, ií iꞌimari Savé, rinákuja kaja nemaké: “Neꞌemakánana leꞌejé teꞌerí”, ke. Rejé riphá. Pajimila Sodoma eyájena wakáraꞌajeri iꞌimari riwátakana nakú. 18 Melquisedec iphari kaja rinaku rejé; pajimila Salem eyájena iꞌimakana riꞌimaká. Tupana, ajopana chaje wani iꞌimaká, waꞌaté rilamáꞌatake purákaꞌaloji inaꞌukena chaya. Riká iphari rinaku; rijñaꞌá rijwaꞌató rejo pan, kajmú jalá amúraꞌatakanami waꞌaté. 19 Re ripuraꞌó palá Abram nakú marí ke:
“Tupana, ajopana chaje wani iꞌimaká,
keñoꞌótari jeꞌechú, ejaꞌawá waꞌaté iꞌimaká.
Nuwata rilaꞌaká piká palá.
20 Palani iná puraꞌakó palá wani Tupana nakú,
raꞌakale piñathé chapú, ajopana laꞌajeño cháꞌatakana aú”.
E Abram aꞌá rijló nakaje, rijñaꞌakare richáꞌatakarena liyá nakiyana. Iyamá théꞌela kele nakaje rijñaꞌakare nakiyana, raꞌá rijló pajluwaja. 21 Rejomi neꞌemakana, pajimila Sodoma eyaje, kemari Abramjlo:
—Eko pipaꞌatá nojló nuleꞌejena inaꞌukena, eyá nanane yuréjero pijló.
22 Eꞌiyonaja Abram kemari rijló:
—Tupana, ajopana chaje wani iꞌimaká, keñoꞌótari jeꞌechú, ejaꞌawá waꞌaté iꞌimaká, ií aꞌakana aú numá pijló: 23 Unká nakaje, pileꞌejé iꞌimakare nakiyana, yurílajo nojló, unká wani. Apala pimá nunaku: “Nupalamane kajrú Abram leꞌejepelá”, ke. 24 Unká na nuwátala nujluwa piliyá, rikaja kalé nuwata: aꞌajnejí, nujwaꞌatéjena ajñakare iꞌimaká apumí chojé, ke ñóꞌopeka kaja. Eyá nujwaꞌaté iꞌimakaño: Aner, Escol, Mamré, kélejlo paꞌajé nakaje najluwa penaje —ke Abram kemaká rijló.