Abram, réjeꞌerimi waꞌaté, anúkaꞌako paliyáaka yukuna marí
13
E kaja Abram paꞌaró reyá piyuke rijwaꞌatéjena waꞌaté; najñaꞌá kaja piyukeja nanane najwaꞌató. E nephá piño napumí chuwá Négueb teꞌeré ejo. Réjeꞌerimi Lot iꞌimari kaja najwaꞌaté re. 2 Kajrú leꞌejepelari Abram iꞌimaká, kajrú kaja riliñérute iꞌimajika, ñaké kaja ripirana iꞌimajika kajrú. 3 Kachuwa nakuja raꞌapaka Négueb ewá, kaja ewaja riphá piño pajimila Betel ejé. Eyá raꞌapá piño, iphari júpimi ke riꞌimaká ejo. Pajimila Ai, pajimila Betel waꞌaté, jiwami ejé riphá paineko chiyó iꞌimaká. Rejo nephá piño. 4 Rejé ripitá jipa altar ke, Tupana weꞌepéjona penaje; re kaja ripuraꞌó Tupana waꞌaté iꞌimaká.5 Abram nane iꞌimaká lokópaꞌala ejé, kaja réjeꞌerimi Lot nane iꞌimaká. Kajrú Lot leꞌejena ovéjana, jémana pirakana, kajena iꞌimajika; kajrú kaja rijwaꞌaté jápajeño iꞌimajika. 6 Abram pirana chiraꞌakeño phuꞌuteni chuwá, Lot pirana waꞌaté. Íkiꞌiruna wani napirana iꞌimajíkale, unká napukuna iphake palá najló, 7 rijimaje napirana lamáraꞌajeño akhaꞌákakeño pajwaꞌatéchaka. Riwakajé re joꞌó kaja ajopana inaꞌukena iꞌimajika rewá; Cananéona, ferezéona waꞌaté, iꞌimakeño rewá. 8 Raú Abram kemari réjeꞌerimijlo: “Pajluwaja yaní weká, ñakele unká paala wakhaꞌákakojla pajwaꞌatéchaka; unká kaja paala wajwaꞌaté jápajeño akhaꞌákakojla pajwaꞌatéchaka wapirana pukuna jimaje. 9 Kajrú teꞌerí maárowa, ñakele pikulá chuwa pijluwa teꞌerí pipirana pukunawa penaje. Piꞌiwapá pijluwa teꞌerí piwátajikare, piꞌimakáloje rewá penaje. Piꞌijnajika ee yenojo pitá nakojó, nuká iꞌijnajeri kawakajo; eyá piꞌijnajika ee kaꞌajná kawakajo nakojó, nuká iꞌijnajeri yenojo”, ke rimaká rijló.
10 Raú Lot yakáꞌaro rewá. Reyá ramá teꞌerí toꞌokó ipuré jiwami eꞌiyowá, ají ke juni Jordán lokoꞌopánejo. Reyá kawakajo, ají ke pajimila Sóar ejo nakojó, palani wani teꞌerí iꞌimaká, kajrú juni iꞌimaká reꞌiyowá, palá nakaje ejátakejami iꞌimakare eꞌiyowá. Nakaje iꞌimaká Egipto teꞌeré eꞌiyowá iꞌimaká, ke kaja nakaje iꞌimaká rewá. (Ilé ke riꞌimaká rewá riwakajé, unká chiyó Tupana kapichata pajimila Sodoma, Gomorra waꞌaté iꞌimaká.) 11 Ilé ke ramaka riꞌimaká aú, Lot iꞌiwapá rijluwa Jordán teꞌeré, e ranúkaꞌo kamú jeñoꞌoká ejo pitá nakojó. Ilé ke Abram, Lot waꞌaté, anúkaꞌako paliyáaka. 12 Abram yuriro Canaán teꞌeré nakuja, eyá Lot anúkaꞌaro, riꞌimakáloje pajimila awaꞌá penaje. Pajimila Sodoma awaꞌajé ritáraꞌata ripajrewa. 13 Unká wani inaꞌukélaruna rewájena iꞌimajika; chapú laꞌajeñó, namanaicho laꞌajeñó, unká naluna kalé iꞌimajíkaño waꞌaté neꞌemajika; nakaje, unká wani Tupana wátalare, kaje nalaꞌaké.
14 Kaja Lot anúkaꞌo Abram liyá iꞌimaká, rejomi Tupana kemari Abramjlo: “Piyakaꞌo pawaꞌó. Teꞌerí, pamákare meꞌetení kawakajo nakojó pumitá, eyá yenojo pumitá, kamú jeñoꞌoká ejo pumitá, eyá kamú jaꞌakó ejo pumitá, riká teꞌerí piyukeja noꞌojé pijló. Pilakénamijlo penaje riꞌimajé. 15 Piyuke teꞌerí pamákare meꞌetení, iꞌimajeri ñakeja wani nateꞌeré. 16 Íkiꞌiruna wani pilakénami iꞌimajika nupalamane; unká méñoꞌojo iná lapaꞌatálaje neꞌemajika. 17 Ñakele chuwa pichiraꞌó piyukeja reꞌiyowá, pitajátakaloje ramákana palá penaje, noꞌojíkale riká piteꞌerewa penaje”, ke rimaká rijló.
18 Raú Abram witúkaꞌata ripajré, riꞌijnakáloje wejápaja kemachi ejaꞌawá iꞌimaká ejo. Mamré leꞌejé teꞌerí riꞌimaká. Pajimila Hebrón awaꞌajé riphá, rejé riyuró. Rejé ripitá piño jipa, altar ke, Tupana weꞌepéjona penaje.