Tupana puraꞌakó Abram waꞌaté, ráchoꞌokoloje reyá yukuna marí
12
E apú wakajé Tupana puraꞌaró Abram waꞌaté, rimá rijló: “Chuwa páchoꞌo maáreya; piyurí piñakajela, pejena, paraꞌapá ñakaremi, kaje maká, piꞌijnakáloje teꞌerí nuyaꞌatájikare pijló ejo. 2 Rejo kajrú pilakénami iꞌimajika, íkiꞌiruna neꞌemajíkale. Nulaꞌajé kaja piká palá, kajrú inaꞌukena jemaꞌajika piyukuna, pipalamane aú ajopana iꞌimajé kaja palá. 3 Palá nulaꞌajika laꞌajeño piká palá, pilakénami waꞌaté nakú; eyá laꞌajeño chapú piká, pilakénami waꞌaté, nulaꞌajé kaja ñaké chapú. Pilakénami palamane piyukeja inaꞌukena, marí ejaꞌawá chu iꞌimajíkaño, iꞌimajé palá”, ke Tupana kemaká Abramjlo.4 Raú Abram jáchoꞌoro pajimila Harán eyá, Tupana wakáraꞌaka riꞌimaká ke, riꞌijnakáloje Canaán teꞌeré ejo penaje. 5 Riwaꞌa rijwaꞌató riyajalo, réjeꞌerimi Lot waꞌaté, eyá rijwaꞌaté jápajeño iꞌijnaño kaja rijwaꞌaté. Najñaꞌatá piyuke nanane najwaꞌató, napirana, kaje maká rijñaꞌakare rijluwa, pajimila Harán e riꞌimaké wakajé. Riwaꞌa kaja rijwaꞌató rijwaꞌatéjena, riphátakarena, re riꞌimaké wakajé. Neká iꞌijnaño rijwaꞌaté piyuke Canaán teꞌeré ejo. 6 E naꞌapá reꞌiyowá, iphaño pajimila Siquem ejo. Re pukunaji iꞌimari, rií iꞌimari Moré. Rewájena pechu iꞌimakeri rinaku: “Wachiꞌinárikana pukuna riká”, ke. 7 Re Tupana kemari Abramjlo: “Marí teꞌerí noꞌojé pilakénamijlo nateꞌerewa penaje”.
Rejé Abram pitari jipa altar penaje, riphákale Tupana jaꞌapí. Ilé ke rilaꞌaká, Tupana puraꞌakole rijwaꞌaté re. 8 Rejomi naꞌapá piño, iphaño iyamá pajimila jiwami chojé ipuré eꞌiyowá, rejé nayuró. Pajimila Betel iꞌimari kamú jaꞌakó ejo pitá nakojó, eyá pajimila Ai iꞌimari kamú jáchoꞌoko ejo pitá. Rejé ripitá piño jipa altar penaje, nalaꞌakáloje piño puꞌují napéchuwa Tupánajlo. Re kaja Abram puraꞌaró Tupana waꞌaté. 9 Reyá naꞌapá piño kachuwa nakuwaja, ají ke kawakajo Négueb teꞌeré nakojó.
Abram iꞌijnaká Egipto teꞌeré ejo yukuna marí
10 Riwakajé kajrú najñaꞌajika meꞌepijí panaku rewá iꞌimajika, raú neꞌejná Egipto teꞌeré ejo, unkale na iꞌimalá teꞌerí neꞌemakare nakú ewá najñákaloje penaje. 11 Raú neꞌejná kawakajo ají ke Egipto teꞌeré ejo. Yewicha nephaka Egipto ejo ee, Abram kemari riyajalo Saraijlo: “Palaru wani piká. 12 Puꞌuwaká Egipto eyájena amájika ee piká, nemaje kaꞌajná nunaku: ‘Riyajalo kaꞌajná ruká’, ke, raú kaꞌajná nenoje nuká, piꞌimakáloje najwaꞌaté penaje. 13 Ñaké iꞌimakale, nuꞌumakáloje palá rewá penaje, pimaje najló pinakuwá: ‘Reꞌeweló nuká’, ke”, ke rimaká rojló.
14 E kaja nephá nanaku. Egipto eyájena yakáꞌaño Sarai chaje, amaño palaru wani ruꞌumaká. 15 Neꞌemakana waꞌaté jápajeño amaño kaja ruká. (Neꞌemakana nakú nemaké “faraón”, ke.) Namaka aú ruká, neꞌejná ramaje, neꞌemakáloje rijló ruyukuna penaje. E kaja nawaꞌa ruká najwaꞌató neꞌemakana ñakaré chojé.
16 Sarai iꞌimajíkale neꞌemakana ñakaré chu najwaꞌaté aú, neꞌemakana laꞌaké palá Abram nakú. Rilamáꞌatake riká kajrú nakaje aú. Raꞌá rijló ovéjana, jémana pirakana, kawaruna, caméllona, kele. Raꞌá kaja rijló inaꞌuké, rijwaꞌaté jápajeño penaje: achiñana, inaana waꞌaté. 17 Eꞌiyonaja re Sarai iꞌimajíkale najwaꞌaté, Tupana wajari neꞌemakana, riyajalo, riyani, kele, raú natámina nalaꞌakó piyukeja. 18 Ilé kaje aú neꞌemakana wáꞌari Abram maná. Riphaka rinaku ee, rimá rijló: “¿Na penaje chi pilaꞌá nuká marí ke wani? ¿Naje chi unká pimalá nojló iꞌimaká: ‘Nuyajalo ruká’, ke? 19 Pimá nojló iꞌimaká: ‘Noꞌoweló ruká’, ke, raú nuwáꞌajla ruꞌumaká nuyajálowa penaje. Chuwa paꞌapá ta maáreya, piwaꞌa kaja piyajalo pijwaꞌató”, ke rimaká rijló. 20 Raú faraón wakáraꞌa rijwaꞌaté jápajeño jáchoꞌotaka Abram, riyajalo Sarai waꞌaté, nateꞌeré eyá, piyukeja nakaje rileꞌejé iꞌimakare waꞌató. Raú napaꞌó piño napumí chuwá ají ke Canaán teꞌeré ejo.