11
Resumen: Ejaꞌawá jaꞌakó junápeje ejomi, Noé, riyajalo, riyani, riꞌirínuna, keleja iꞌimaño teꞌerí nakú piño. Ewá richaje, richaje ke, íkiꞌirunaka Noé lakénami iꞌimajika. Kaja ewaja kajrú inaꞌukena iꞌimaká piño ejaꞌawá chu rewá; kaja kajrú cha inaꞌuké ñathé aꞌajíkono aú, íkiꞌiruna neꞌemajika.Mékeka inaꞌuké keñoꞌoká keꞌiyapejé wani napuraꞌakó chu puraꞌakano yukuna marí
1 Riwakajé pajluwaja purákaꞌaloji chu waja napuraꞌakono piyukeja. 2 Kaja kamú jeñoꞌoká ejo pumitá iꞌimakaño jáchoꞌoño reyá iꞌimaká, iphaño Sinar teꞌeré ejo. Kajruni phuꞌuteni iꞌimaká rewá, rejé nayuró iꞌimaká. 3 Rejéchami nemaká piyukeja pajlokaka: “Chuwaka walaꞌajika teꞌerí takaꞌátakanami, rejomi wakáraꞌataje riká”, ke. E kaja nakeñoꞌó pají laꞌakana teꞌerí takaꞌátakanami aú, unká jipa aú kalé. Mapa kaje aú nachútaꞌatake riká. Ilé kaje aú nalaꞌá pají. 4 Rejomi napuraꞌó piño pajwaꞌatéchaka pajimila laꞌakana nakú, nemá pajlokaka: “Iꞌijná walaꞌachí pajimila; reꞌiyá walaꞌajé pajluwaja pají yenoje wani, riphákaloje jeꞌechú chojé penaje. Ajopana amájika ee riká, kajrú nemájika wanaku: ‘¡Meke palá wani nalaꞌaká pají yenoje!’ Ilé ke walaꞌajika, watamákaꞌatako piyá paliyáaka”, ke nemaká pajlokaka.
5 E kaja nakeñoꞌó pajimila laꞌakana; nakeñoꞌó kaja riká yenoje pají laꞌakana re. Tupana amaka mékeka najápaka palá pajwaꞌatéchaka aú, 6 ripechu iꞌimá: “Pajluwaja keja neká pajwaꞌatéchaka. Pajluwa napurákaꞌalo iꞌimakale, ñaké iꞌimakale najapa ñaké pajwaꞌatéchaka; unká meke laꞌajé iná kemalajla najló, nalaꞌaká piyá napechu nakú riꞌimaká ke. 7 Palani wephaka nanaku, wakechíraꞌakaloje najló napurákaꞌalo paliyáaka penaje, nemaꞌaká piyá papurákaꞌalochaka”, ke Tupana iꞌijnataka ripéchuwa.
8-9 E kaja riká pajimila e Tupana kechíraꞌari piyuke inaꞌukena, ejaꞌawá chu iꞌimakaño purákaꞌalo. Rejomi natamákaꞌato paliyáaka, neꞌejnakáloje piyuke ejaꞌawá chuwá penaje. Raú nayurí pajimila laꞌakana. Ilé ke riꞌimakale najló, naꞌá riká pajimila ií Babel, ke. (Kechíraꞌakejami, ke kemakánaka rií iꞌimaká napuraꞌakó chu.)
Abram yukuna marí
Noé yaní iꞌimaño weji kele iꞌimaká. Pajluwaja neꞌewé pheꞌejrí ií iꞌimari Sem; pajluwa rilakénami nakiyana ií iꞌimari Térah. 27 Térah yaní iꞌimaño weji kele: Abram, Nahor, Harán, kele riyani iꞌimaká. Harán iꞌimari Lot jaraꞌapá. 28 Harán takaꞌañáari paineko raraꞌapá. Pajimila Ur de Caldea e neꞌemaká wakajé, ritakaꞌañáa riꞌimaká; re kaja rimothoꞌó iꞌimaká.
29 Abram wáꞌakaro Sarai waꞌaté, eyá Nahor wáꞌakaro Milcá, Harán itu waꞌaté. Iscá eꞌeweló ruꞌumaká. 30 Unká meke laꞌajé Sarai yaní iꞌimaké, mewakú ruꞌumajíkale. 31 E kaja Térah jáchoꞌoro pajimila Ur, Caldea teꞌeré nakú iꞌimakare eyá, riꞌijnakáloje Canaán teꞌeré ejo penaje. Riwaꞌa rijwaꞌató riꞌirí Abram, riyajalo Sarai, rilaké Lot, kele. Naꞌapá reyá, iphaño ají ke pajimila Harán ejo, rejé nayuró. 32 Re neꞌemaká wakajé, Térah takaꞌarí. Doscientos cinco jarechí ketana riꞌimaká ejaꞌawá chu.