—Noꞌochí inaté, eko ikamato nuñakaré chu. Re jipaje jiꞌimá nakiyá, eyá muní lapiyámiko jaꞌapá iwátajika ejo.

Nemá rijló:

—Unká, mapeja wakamátajiko pajimila eꞌiyowá iñeꞌepú turenawa.

3 Eꞌiyonaja unká Lot laꞌaló ujwí naꞌatakana nakú, riwátakale nakamátako rijwaꞌaté riñakaré chu. Kaja ewaja nemaꞌá raꞌapiyá, raú neꞌejná rijwaꞌaté ají ke riñakaré chojé. Rejomi riwakáraꞌa rijwaꞌaté jápajeño laꞌaká najló aꞌajnejí palá nojé. Nalaꞌá pan mamúraꞌatakanaru najló. Nañapátakaja rilaꞌakana ejomi, najñá naꞌajnewá.

4 Yewíchaja riphaka kamátakajo jená chojé ejéchami, kajrú wani walijímakana, pajimila Sodoma eyájena, iphaka Lot ñakaré kópeje. Ñaké kaja pheñawilana iphaka rejé najwaꞌaté; achiñana waja neꞌemaká iphaño rejé. 5 Rejéchami nawíyoꞌoka Lotjlo, nemá rijló:

—¿Mere chi keleruna achiñana iphíchaño majó pinaku iꞌimichaka? Páchoꞌota neká ta majó wakaꞌapojo, walaꞌachí najwaꞌaté wamanáicho.

6 Raú Lot mujlúkaꞌari wakaꞌapojo najwaꞌaté puraꞌajó. Rimujlúkaꞌaka riñakaré chiyá yámona, ritá palá rinumaná kamachá, 7 e rimá najló:

—Nutelona, ilaꞌá nojló nakaje: ilaꞌaniña ilé ke imanaicho puꞌuwaré wani najwaꞌaté maare. 8 Re maare nuyani, iyamá inaana nujwaꞌaté, unká joꞌó yaꞌatalaño nekó achiñánajlo. Neká kaꞌajná nuwáꞌaje majó ijló, ilaꞌakáloje najwaꞌaté iwátaka ke penaje. Eyá ileruna achiñana iphíchaño majó, waꞌaté unká ilaꞌalaje imanaicho puꞌuwaré wani, noꞌotíyakale neká maáreje.

9 Eꞌiyonaja nemá rijló:

—Patató aꞌajná ñoꞌojó, wamujlúkaꞌachi richojé. Chuwa ajopana teꞌeré eyájeri ta wátaka rinakuwá laꞌakana wajló wawakáraꞌajeri ke wani. ¡Unká wawakáraꞌajeri kalé piká ta! ¡Chuwa pamájika ta, walaꞌajika neká ta puꞌuwaré, chaje walaꞌajika piká ta puꞌuwaré!

Eja nakeñoꞌó Lot laꞌakana chapú, waꞌató ke natatako riñakaré numanaje, reyá nakaꞌakáloje riká kawakajo penaje. 10 Eꞌiyonaja jeꞌechú chiyájena, richu iꞌimakaño, meꞌetaño riñakaré numaná. E nachíraꞌa Lot, napaꞌatákaloje riká pachojo penaje, rejomi netá piño rinumaná. 11 E neká noño wakaꞌapé iꞌimakaño mejlukaji aú, raú mejluruna neꞌemaká piyukeja. Nakulajla Lot ñakaré numaná, eꞌiyonaja unká nephátala riká; kaja ewaja nayaꞌó rinumaná kulákana nakú. 12 Rejomi jeꞌechú chiyájena, Lot waꞌaté iꞌimakaño, kemaño rijló:

—Re kaꞌajná pejena, ajopana piyani waꞌaté, marí pajimila eꞌiyowá. Pimicha najló, náchoꞌokoloje pijwaꞌaté maáreya penaje, 13 wakapichátajikale marí pajimila. Kaja neꞌemá puꞌuwaré wani nalaꞌakare yukuna Tupánajlo iꞌimaká, raú riwakáraꞌa weká majó marí pajimila kapichátaje.

14 Raú Lot iꞌijnari ají ke wátaño riyani inaana waꞌaté wáꞌakakano ejo. Riphaka nanaku ee, rimá najló:

—Jáchoꞌo kiñaja maáreya, chuwa Tupana kapichátajika marí pajimila.

Eꞌiyonaja unká nemaꞌalá raꞌapiyá, kaja napechu iꞌimá rinaku: “Mapeja kaꞌajná rilaꞌaká ta riꞌichajnó wajwaꞌaté”, ke. 15 Kaja yewíchaja najmeꞌetaka ee, jeꞌechú chiyájena kemaño Lotjlo:

—¡Páchoꞌo kiñaja maáreya! Piwaꞌa pijwaꞌató piyajalo, piyani iyamá inaana waꞌaté. Kéchami jáchoꞌoko maáreya kiñaja, ikapichako piyá najwaꞌaté, wakapichátajika marí pajimila ejéchami.

16 Eꞌiyonaja Lot maláraꞌatari rikó júpija rewá, raú Tupana waꞌatéjena, jeꞌechú chiyájena, patañó neká nayátheꞌela nakiyá. Kéchami nawáꞌaka neká ají ke pajimila yámojo, nakapichako piyá ajopana waꞌaté. Tupana weꞌepiri Lot muꞌují, raú rijwaꞌatéjena aꞌañó nañathé, náchoꞌokoloje reyá penaje. 17 Pajimila yámojo neꞌemaká ee, pajluwaja jeꞌechú chiyaje kemari najló:

—Chuwa, maáreya iꞌijnajé jechoꞌokelo ají ke ipuré ejo, ikapichako piyá najwaꞌaté. Puꞌukuja iꞌijnajika rejo, iyakáꞌaniño iyámojo, itajnániño iñeꞌepú chojé. Ilé ke ilaꞌajika, iwátajika ee kapichákajo liyá iꞌimakano.

18-19 Raú Lot kemari najló:

—Unká paala rejo iꞌijnakana. Kaja iliꞌichá nuká palá wani, iꞌimatíyakale nuká kapichákajo liyá, eꞌiyonaja jukaje wani ilé ipuré. Unká chiyó wephá rejo, wakapichajo kaꞌajná iñeꞌepú chuwá. 20 Re apú pajimila kamuꞌujini maáreja kemachi; rejo wephajla nuweꞌepika; rejo kaꞌajná weꞌejnajla, wakapichako piyá.

21 Pajluwaja nanakiyana kemari rijló.

—Nomaꞌá paꞌapiyá, ñakele riká pajimila pimíchaje nakú nojló, unká nukapichátalaje, re piꞌimajíkale. 22 Ñakele, ¡iꞌijná rejo chuwa kiñaja! Unká meke laꞌajé nukapichátala marí pajimila, unká chiyó iphá ilé pajimila ejo.

Ilé ke riꞌimakale, naꞌá riká pajimila ií Sóar.

23-24 Kaja ewaja nephá pajimila Sóar ejo. Wajé wani kamú jeñoꞌoká ee, manaꞌí chiyó Tupana wakáraꞌa keraꞌathani jaꞌakó jeꞌechú chiyá, azufre kaje waꞌaté, ají ke pajimila chaje. Riká aú pajimila Sodoma, pajimila Gomorra, piyuke riyámojo iꞌimakare waꞌató lukúnaꞌo. 25 Piyuke wani nakaje kapichako raú: inaꞌuké, namena, aꞌawaná, kaje maká kapicharo raú piyukeja. 26 Ilé ke Lot yajalo jemaꞌaká nakaje káraꞌatako mejé aú, rupajnoꞌó ruyámojo yakáꞌajo. Kaja rikaja ruyuriko yukira takaꞌátakanami ke penaje.

27 Muní ke Abraham iꞌijnaká aꞌajná, ripuraꞌakó Tupana waꞌaté iꞌimaká ejo. 28 Riphaka rejo ee, riyakaꞌo yaꞌajnaya pajimila chaje, amari kajrú wani ija jáchoꞌoko reyá. Teꞌerí eꞌiyayá waꞌató ija jeñoꞌó; keraꞌathani, kajrú wani lukúnaꞌako ke, rewá iꞌimaká. 29 Ilé ke Tupana kapichátaka iyamá pajimila iꞌimaká, riyámojo iꞌimakare waꞌató. Abraham chojé kalé Tupana iꞌimatá Lot, riyani, kele, kapichákajo liyá iꞌimaká.