8
Tupana weꞌepiri Noé, eyá piyukeja kamejérina rijwaꞌaté iꞌimakaño wapuru chu. Ñakele riwakáraꞌa karená aphoꞌoká, rejéchami juni keñoꞌoká iꞌiwakaje, 2 waꞌató ke kaja juni jalomi, teꞌerí eꞌiyá iꞌimakare, yurika jeñoꞌokaje. Juni yurí kaja jaꞌakajo rejéchami. 3 Wejápajano, wejápajano ke, juni keñoꞌoká iꞌiwakaje, pajluwa théꞌela keta keri ketana. 4 Iyamá kuwáꞌata keta keri iꞌimaká wakajé, diecisiete cha rilapaꞌatako iꞌimaká wakajé, wapuru yáꞌaro ipuré Ararat jiꞌiwátaje. 5 Re joꞌó kaja juni iꞌimaká iꞌiwakaje nakú. Iyamá théꞌela keta keri keñoꞌokó wakajé, nakeñoꞌó ipuré jiꞌiwata amákana.6 Iyamá inaꞌuké leꞌejé ke kala neꞌemaká wapuru chu ipuré jiꞌiwata nakú. Rejéchami Noé meꞌetaka rinumaná kamuꞌujini, riꞌiwata chu iꞌimakare. 7 Richiyá riyurí pajluwaja majárami jáchoꞌoko; reyá rajá ají ñoꞌojó, ají ñoꞌojó ke. Juni iꞌiwaká wátakana nakú riꞌimá. 8 Meketana iꞌimajemi, Noé yurí piño pajluwaja túkuꞌuchi jáchoꞌoko, riweꞌepíkaloje raú e kaꞌajná teꞌerí amako. 9 Unká túkuꞌuchi iphátala na, ripatoꞌokóloje rinakojé penaje, raú ripaꞌó piño rapumí chuwá, re joꞌó kaja juni iꞌimakale teꞌerí jimawa. Riphaka piño ee, Noé aꞌarí rijló riyátheꞌela; rinakojé ripatoꞌó; ripaꞌatá piño riká wapuru chojé.
10 Riwata piño pajluwa jápakaje ketana, rejomi riyurí piño túkuꞌuchi jáchoꞌoko. 11 Kaja najúwaꞌaka ee, riphá. Aꞌawaná olivo iꞌiché ñani iꞌimari rinuma chu, raú Noé weꞌepiri teꞌerí keñoꞌoká amákajo. 12 Riwata piño pajluwa jápakaje ketana, rejéchami riyurika piño túkuꞌuchi jáchoꞌoko. Riká unká paꞌaló piño rapumí chuwá. 13-14 Noé iphátaka seiscientos uno jarechí iꞌimaká wakajé, kaja makajreni teꞌerí jimá iꞌimaká. Wajé jarechí keñoꞌokó wakajé, Noé kaꞌarí wapuru pajré nakiyana richaya, richiyá ramá kaja teꞌerí makáraꞌako.
15 Rejéchami Tupana kemaká Noejlo: 16 “Chuwa páchoꞌo majó wapuru chiyá piyajalo, piyani, piꞌirínuna, kele waꞌaté. 17 Eyá kamejérina, pirájina, kupiraꞌaphana, jeína, kajena richu iꞌimakaño pijwaꞌaté, jáchoꞌojeño kaja richiyá, natamákaꞌatakoloje piyukeja ejaꞌawá chuwá penaje, nayani iꞌimakáloje piño kajrú napumí chojé”.
18 Raú Noé, riyani jaló, riyani, riꞌirínuna, kele mujlúkaꞌaño richiyá. 19 Rejomi kamejérina, pirájina, kupiraꞌaphana, jeína, kajena jáchoꞌoño kaja richiyá. 20 Rejomi Noé pitari jipa altar penaje, rinakojé rinó Tupánajlo ripirana nakiyana, puꞌuwaré nalaꞌakare chaya. Rikáraꞌata natami Tupánajlo. 21 Palani rama iꞌimaká Tupánajlo, raú rimá inaꞌuké nakú: “Ejaꞌawá iꞌimajika ketana, unká nuyerúkaꞌalaje piño teꞌerí chaje, puꞌuwaré inaꞌuké laꞌakare pachá. Najyuwako eyaja nakeñoꞌó napéchuwa iꞌijnatákana puꞌuwaré, aꞌajná pheñawilá neꞌemaká ejená. Unká nukapichátalaje piño kamejérina napachá, nukapichátaka neꞌemaká ke kaja”, ke rimaká. 22 Rimá kaja:
“Ejaꞌawá iꞌimajika ketana, inaꞌuké ejátajika najluwa nakaje icha ijí, najñaꞌakáloje richa penaje.
Re jarechí iꞌimajé; re kaja yawijá iꞌimajé;
re kaja weꞌechú kaꞌalá iꞌimajé; lapí iꞌimajeri kaja,
ke nakaje iꞌimajika ejaꞌawá iꞌimajika ketana”,
ke Tupana kemaká.