Tupana kemaká Noejlo mékeka neꞌemajika pajwaꞌatéchaka yukuna marí
9
E kaja Tupana kemari Noé, riyani, kele nakú, neꞌemakáloje palá penaje. Rimá najló: “Kajrú iyani iꞌimajika, ilakénami iꞌimakáloje piyuke ejaꞌawá chuwá penaje. 2 Piyukeja kamejérina, kupiraꞌaphana waꞌaté, keroꞌojiko ipiyá. Piyukeja makaꞌaphana kayuphéruna, eyá kamejérina teꞌerí nakuwá chiraꞌajeño, juni yajné, juni jalomi jakuwá iꞌimakaño, piyukeja neká iꞌimajeño inaꞌuké jaꞌapejé waja. 3 Ajñakaje penaje neꞌemajika ijló; nakaje icha iꞌimajeri kaja ijló, ajñákaloje riká penaje, iwátaka ke. Ilé kaje noꞌó ijló aꞌajnewá penaje. 4 Riꞌimi, re joꞌó kaja jirá iꞌimajíkare eꞌiyá, unká ajñálaje, iná ira palamane iná iꞌimakale. 5 Nójeri inaꞌuké, nókana iꞌimajeri kaja. Kamejeri nójeri inaꞌuké, nókana iꞌimajeri kaja.6 “Nójeri inaꞌuké, penájemi inoje, nonámiwa nakojé nulaꞌakale inaꞌuké iꞌimaká.
7 Nuwata iyani iꞌimaká kajrú, ilakénami iꞌimakáloje piyuke ejaꞌawá chuwá penaje”,
ke Tupana kemaká najló iꞌimaká.
8 Tupana kemari piño Noé, riyani, kélejlo: 9 “Ilé ke numaká inaꞌuké nakú, ñaké kaja riꞌimakáloje ijló, ilakénamijlo waꞌaté penaje. 10 Ñaké kaja numaká kamejérina, jáchoꞌoño wapuru chiyá pijwaꞌaté iꞌimaká nakú. Kupiraꞌaphana, pirájina, kamejérina, piyuke ejaꞌawá chu iꞌimakaño, nakú numá ñaké kaja riꞌimakáloje najló penaje. 11 Unká nopiyákalaje nakaje numakare nakú. Unká nukapichátalaje piño inaꞌuké, kamejérina waꞌaté, juni aú. 12 Piyukeja inaꞌukena weꞌepíkaloje kewaka numakare nakú, penaje nuyureje ijló noná keꞌená ke: yurijiri, mawá waꞌaté, juni juwákaꞌala eꞌiyá. 13 Riká namájika wakajé, piyukeja weꞌepéjeño marí numakare nakú”, ke Tupana kemaká najló.