Ejaꞌawá jaꞌakó junápeje yukuna marí
7
Júpija wani Noé jápaka wapuru laꞌakana nakú riyani waꞌaté. Nañapátaka rilaꞌakana ejéchami Tupana kemaká Noejlo: “Piyukeja wani inaꞌukena, meꞌetení iꞌimakaño ejaꞌawá chu, laꞌaká chapú pekowáaka; pikaja kalé laꞌarí nuwátaka ke neꞌiyayá. Ñakele pimujlúkaꞌa chuwa wapuru chojé piyajalo, piyani, piꞌirínuna, kele waꞌaté. 2 Piwáꞌaje kaja pirájina, ajñakaje penájena iꞌimakárena nakiyana richojé. Ajopana, ajopana nakiyana ke, piwáꞌajika neká marí ke: iyamá kuwáꞌata kele achiñana piwáꞌaje, iyamá kuwáꞌata kele kaja inaana; eyá, unká ajñakaje penaje kalé iꞌimakaño nakiyana, piwáꞌaje iyamá achiñana, iyamá kaja inaana waꞌaté richojé. 3 Piwáꞌaje kaja keꞌiyapejena kupiraꞌaphana nakiyana richojé: iyamá kuwáꞌata kele achiñana, iyamá kuwáꞌata kele kaja inaana waꞌaté. Ilé ke waja piwáꞌajika nanakiyana, nayani iꞌimakáloje piño rejomi ejaꞌawá chuwá. 4 Iyamá kuwáꞌata ke kala iꞌimajemi nuwakáraꞌaje kajrú juni jaꞌakó. Iyamá inaꞌuké leꞌejé ke kala ketana juni jaꞌajiko weꞌechú, eyá lapí waꞌató. Juni aú nukapichátaje piyukeja kajmuruna nukeñoꞌótakarena, meꞌetení iꞌimakaño”, ke Tupana kemaká Noejlo. 5 E kaja Noé laꞌarí piyuke nakaje Tupana wakáraꞌaka ke.6 Ejaꞌawá jaꞌakó junápeje wakajé, Noé iꞌimari seiscientos jarechí ketana cha. 7 E kaja Noé, riyajalo, riyani, riꞌirínuna, kele mujlúkaꞌaño wapuru chojé, juni kapichátaka piyá neká. 8 Kamejérina keꞌiyapejena, eyá kamejérina pirájina penájena iꞌimakaño, kamejérina ajñakaje penaje iꞌimakaño, eyá unká ajñakaje penaje kalé iꞌimakaño, piyukeja neká 9 mujlúkaꞌaño kaja wapuru chojé Noé waꞌaté, iyamano ke, achiñá, inanaru waꞌaté, Tupana wakáraꞌaka namujlúkaꞌaka ke.
10 Iyamá kuwáꞌata ke kala neꞌemaká wapuru chu ejéchami, juni keñoꞌoká jaꞌakajo, teꞌerí jaꞌakóloje junápeje penaje. 11 Riwakajé Noé iꞌimari seiscientos jarechí ketana cha ejaꞌawá chu. Riwakajé iyamata cha keri lapaꞌatako, diecisiete weꞌechú kaꞌalá iꞌimaká riwakajé, rejéchami juni jalomi, teꞌerí eꞌiyá iꞌimakare, majákaꞌako. Raú ráchoꞌo kajrú teꞌerí eꞌiyayá, waꞌató ke juni jaꞌakó jeꞌechú chiyá. 12 Iyamá inaꞌuké leꞌejé ke kala ketana juni jaꞌakó weꞌechú, eyá lapí waꞌató. 17 Raú teꞌerí jaꞌaró junápeje, waꞌató ke wapuru jáchoꞌoko teꞌerí nakiyá, kúwaꞌaro junápeje. 18 Ewá richaje, richaje ke juni ñaká, wapuru chu iꞌimakáñoja kalé iꞌimaño palá. 19 Kajrú juni ñaká; ipuré jiꞌiwata yenoje wani iꞌimaká waꞌató jaꞌaró kaja rakojé. 20 Iyamá kuwáꞌata kele metros ketana juni jaꞌapáñaaka ipuré jiꞌiwata.
21-22 Juni jakojé inaꞌukena, ejaꞌawá chu iꞌimakaño, kapichaño iꞌimaká. Piyukeja teꞌerí nakú iꞌimakaño kapichaño kaja najwaꞌaté: kamejérina, jeína, kupiraꞌaphana, kajena kapichaño kaja najwaꞌaté. 23 Nekaja kalé, wapuru chu iꞌimakaño Noé waꞌaté, iꞌimañó iꞌimaká; eyá piyukeja, unká iꞌimalaño richu, kapichaño iꞌimaká. Inaꞌuké, napirana, kamejérina, kupiraꞌaphana, jeína, kajena piyukeja kapichaño iꞌimaká, 24 teꞌerí yuríkole junapi pajluwa théꞌela keta keri ketana iꞌimaká.