5 Tupana amákeri kajrú wani inaꞌuké laꞌajika chapú pekowáaka; kaja chapú pekowáaka laꞌakana nakuja neꞌejnatake napéchuwa. 6 Ilé ke neꞌemajika pachá, kamuꞌují Tupana pechu laꞌakó, rikeñoꞌótakale inaꞌuké iꞌimaká. Rimá: “¿Na penaje kaꞌajná nukeñoꞌota inaꞌuké iꞌimaká?” Kewini riꞌimaká rijló, eꞌiyonaja rimá: “Chuwa nukapichátajika inaꞌuké, kamejérina, kupiraꞌaphana, kajena waꞌató. Kaja kamuꞌují wani nupechu nunakuwá, nukeñoꞌótakale neꞌemaká”, ke riꞌijnataka ripéchuwa.

9 Marí Noé yukuna. Palájneꞌeke wani Noé iꞌimaká; palá remaꞌajíkano Tupana jaꞌapiyá. Piyukeja inaꞌukena eꞌiyayá rikaja kalé laꞌakeri Tupana wátajika ke.

(Quinientos jarechí cha riꞌimaká wakajé, weji kele riyani iꞌimaká.) 11 Pheꞌejrí ií iꞌimari Sem, raꞌapejé ií iꞌimari Cam, eyá najmeremi ií iꞌimari Jafet. Unká wani paala Tupánajlo inaꞌuké laꞌajika chapú wani pekowáaka ejaꞌawá chu iꞌimajika; 12 kaja apú kajena wani piyukeja inaꞌukena iꞌimaká. Ilé ke nakaje iꞌimajíkale ejaꞌawá chu aú, Tupana kemari Noejlo: 13 “Kaja nuweꞌepí mékeka nulaꞌajika inaꞌuké chuwaka: nukapichátaje piyukeja neká, chapú wani nalaꞌakale pekowáaka. Ilé kaje pachá nukapichátaje piyukeja ejaꞌawá chu iꞌimakaño. 14 Ñakele pilaꞌajé pajlúwaꞌaku wapuru ñópoꞌojlo; mirapewa nakiyana pilaꞌajé riká; kajrú pilaꞌajika ukapú richu. Rejomi pitépaꞌaje riká mapa aú richuwá, riyámojo pitá nakuwá waꞌató, juni iꞌijnaká piyá richojé. 15 Ñópoꞌojlo wani pilaꞌajika riká, marí ketana rená iꞌimajika: ciento treinta y cinco metros ketana riwapherecha iꞌimajika; veintidós metros, eyá peꞌiyojé ketana richítaka iꞌimajika; trece metros, eyá peꞌiyojé ketana yenuka riꞌimajika. 16 Weji kele ukapú iꞌimajika pacháaka. Yenoje riꞌiwata eyá pajluwaja metros pilaꞌajé rinumaná kamuꞌujini, pamákaloje richiyá penaje; kawaká pilaꞌajé kaja rinumaná kajruni. 17 Piñapátajikaja riká ejomi, nuwakáraꞌaje kajrú juni jaꞌakó, ejaꞌawá jaꞌakóloje juni jakojé penaje, inaꞌuké, eyá ejaꞌawá yajné kajena, kapichákoloje rakojé penaje. 18 Eꞌiyonaja pijwaꞌateja kalé nulaꞌajé nakaje palá, riyuríkoloje ñaké penaje. Piká, eyá piyajalo, piyani, piꞌirínuna, keleja kalé mujlúkaꞌajeño pijwaꞌaté piwapúrune chojé. 19-21 Piwáꞌaje kaja pijwaꞌató richojé keꞌiyapejena kamejérina, kupiraꞌaphana, pirájina, kajena, ejaꞌawá chu iꞌimakaño nakiyana. Iyamano keno piwáꞌajika nanakiyana: achiñá, inanaru waꞌaté. Nekaja kalé iꞌimajeño kapichákajo liyá pijwaꞌaté. Pipitaje kaja kajrú aꞌajnejí ijluwa wapuru chojé aꞌajnewá penaje; ñaké kaja kamejérinajlo, pirájinajlo waꞌaté, najñákaloje naꞌajnewá penaje”, ke Tupana kemaká Noejlo.

22 E kaja Noé laꞌarí Tupana kemaká rijló ke.