—Tuu Ianyuux xiʼin ñayiu ñuñayiu vitna.

Kutuu kaʼnu‑ia xiʼin‑i.

Ku kuu‑i daʼya‑ia,

te Ianyuux‑yɨ kuu‑ia.

4 Mayo ka‑i ndaʼi.

Mayo ka‑i kuú,

ni mayo ka‑i kukoʼyo ini.

Ma kaxiaʼan ka ɨɨn nuu xaxiaʼan.

Ma ku kuu ka na n‑xo kuu ñuñayiu.

5 N‑jaʼan Ia nukoo nuu silla kaʼnu nuu‑da:

—Kundeʼa xa ndadavaʼa xee‑r ntdaa xa io.

Chidotnuni xa na jaʼan‑r chi xandaa kuu.

Io xa jandixa‑n xaʼa chi jɨn tnaʼa ná n‑jaʼan‑r.

6 Ijan dada n‑jaʼan ka‑ia:

—Xa io vitna.

Ruʼu kuu Ia daa nga io,

te kutuu‑r nɨkava nɨkuita.

Ñayiu yichi ndute,

juñaʼa nga‑r ndute koʼo‑i xa na kutuu‑i nɨkava nɨkuita.

Kane mee ndute ijan.

7 Ñayiu na ndaku nuu Kuiʼna,

koʼo‑i nte yaʼa chi nte yaʼa kuu taʼu‑i.

Ianyuux‑yɨ ku kuu ñaʼa te ku kudaʼya‑r‑yɨ.

8 Dakee‑r ñayiu yuʼu xa jaʼan‑i xa kukanu ini ñaʼa‑i xiʼin ñayiu ñatu ka kukanu ini ñaʼa xiʼin ñayiu kida xaloko xaduʼa nuu koko azufri.

Dɨuni dakee‑r ñayiu ka xaʼni ndɨyɨ xiʼin ñayiu xndaa xiʼin ñayiu ñatu n‑tnundaʼa xiʼin‑i,

ñayiu ka kuu brujo,

ñayiu ka nakuetu nuu ianyuux n‑ka kidavaʼa mee‑i xiʼin ñayiu vete nuu koko xijan.

Ná kaʼnu ɨɨn laguna kaʼnu nuu koko ñuʼu jan.

Ijan kuu nuu kuú‑i ɨnka vuelta.

9 Ɨnka ntuku vuelta n‑xini‑da ɨɨn ángel nundaʼa koʼo n‑ñuʼu xa n‑kida uʼu ñayiu ñuñayiu jan.

N‑jaʼan‑ia nuu‑da:

—Neʼe na dandeʼa ñaʼa‑r novia tnundaʼa xiʼin tkolelu.

10 Ijan dada n‑tu ini‑da xa ndeka ñaʼa‑ia juaʼan ɨɨn yuku kaʼnu te dujun.

Te n‑dandeʼa ñaʼa‑ia ñuu ii Jerusalén.

N‑xini‑da xa vax juun xijan andɨu nuu tuu Ianyuux.

11 Ndii Ianyuux ñuu jan.

Ná diñu yuú yo yaʼu diñu ñuu jan.

Ná diñu yuú kuu jaspe xiʼin cristal diñu.

12 Naduku nduu ɨɨn nama kaʼnu te dujun ñuu jan.

Io uxi uu yeʼe‑i.

Ntnaʼa yeʼe jan ndenee dɨu ɨɨn daʼya yɨɨ Israel,

se ka kuu xixitna‑ro.

Dɨuni xnii ɨɨn ɨɨn ángel ntnaʼa yeʼe jan.

13 Uni yeʼe jan ndeʼa do nuu kane ngandii,

te uni ndeʼa do norte.

Uni ka ntuku ndeʼa do sur te uni ka ndeʼa do nuu keé ngandii.

14 Io uxi uu cimientu nama ñuu jan.

Ntnaʼa cimientu jan xndenee dɨu ɨɨn se n‑tundaʼa ñaʼa Jesús,

Ia kuu tkolelu.

15 Neʼe ángel n‑ndatnuʼu xiʼin‑da ɨɨn vara oro xa chikuʼa‑ia nama naduku nduu ñuu jan.

16 N‑chikuʼa‑ia ñuu jan xiʼin vara neʼe‑ia,

te n‑xini‑da xa uu mil uu cientu kilómetro neʼe xa kani.

Nani neʼe xa kani neʼe xa ndɨka xiʼin xa dujun.

17 Ijan dada n‑chikuʼa ntuku‑ia ɨnka vuelta nama jan,

te n‑xini‑da xa uni diko oʼon metro neʼe xa kojon.

Ná chikuʼa roo xa kuu‑ro ñayiu ɨɨn xa chikuʼa‑ro daa n‑kida‑ia.

18 Yuú kuu jaspe kuu nama ñuu jan,

te mee ni oro nini kuu ñuu jan.

Ná kaa vidriu kaa nama jan.

19 Nandɨkaa nandituʼu yuú yo yaʼu xndeyuku cimientu nama jan.

Ɨɨn cimientu jan xndeyuku jaspe.

Ɨnka cimientu xndeyuku yuú kuu zafiro.

Ɨnka ntuku cimientu jan xndeyuku yuú kuu ágata.

Xa kuu koon xndeyuku yuú kuu esmeralda.

20 Xa kuu oʼon xndeyuku yuú kuu sardónice.

Xa kuu iñu xndeyuku yuú kuu cornalina.

Xa kuu uxa xndeyuku yuú kuu crisólito.

Xa kuu una xndeyuku yuú kuu berilo.

Xa kuu ɨɨ́n xndeyuku yuú kuu topacio.

Xa kuu uxi xndeyuku yuú kuu crisopraso.

Xa kuu uxi ɨɨn xndeyuku yuú kuu jacinto.

Cimientu kuu uxi uu xndeyuku yuú kuu amatista.

21 Naa ɨɨn ɨɨn yutnu yeʼe jan kuu ɨɨn ɨɨn perla,

te mee ni oro nini kuu ichi kaʼnu katuu xiti ñuu jan.

Ná kaa vidriu kaa.

22 Ni ɨɨn veñuʼu ña n‑xini‑da xiti ñuu jan.

Ñatuka ka ndoñuʼu ñayiu veñuʼu xaxeʼe xa xtuu‑i xiʼin Ianyuux,

Ia kuu Xtoʼo‑ro Ia taxnuni nuu ntdaa xa io.

Dɨuni xtuu‑i xiʼin tkolelu jan.

23 Ña tuu nax juun ñuu ijan ngandii,

ni yoo xa kukanda ñuu jan chi Taa‑ro Ianyuux xiʼin tkolelu ndii ijan.

24 Kanda nuu kuikonuu koio ñayiu ntaka nación kutuu ijan chi ndii‑ia ñuu jan.

Nakuetu koio se ka taxnuni xiʼin ñayiu yaʼa nuu Ianyuux xiʼin nuu tkolelu jan ijan.

25 Ni ɨɨn yeʼe nama naduku nduu ñuu jan ma kundiʼu chi nuncas ñatu kunee ñuu ijan.

26 Ná ka najuen tnuʼu ñayiu ñuñayiu Ianyuux yaʼa,

daa najuen tnuʼu koio‑i‑ia ijan.

Ná ka nakuetu‑i nuu‑ia ñuñayiu yaʼa,

daa nakuetu‑i nuu‑ia ijan.

27 Ma kɨu ñayiu ñatu n‑ku ii ijan.

Ni ñayiu vete,

ni ñayiu kida xaloko xaduʼa,

ma kɨu ijan.

Diko ni ñayiu xyodotnuni dɨu libru tkolelu jan kɨu koio ñuu xee jan.