Ɨɨn mil kuia kutnɨɨ kɨtɨ kuu dragón
20
Ijan dada n‑xini‑da ɨnka ángel vax juun andɨu.
Nundaʼa‑ia ɨɨn cadena kaʼnu xiʼin ndakaa najaan yuʼu nua ña xe ndɨʼɨ.
2 N‑tnɨɨ‑ia dragón jan,
te n‑tetnɨɨ‑ia‑tɨ cadena nundaʼa‑ia.
Ɨɨn mil kuia kutnɨɨ‑tɨ.
Kɨt ijan kuu koo kaʼnu xanaʼa,
te dani io‑t.
Dɨuni kuu‑t Kuiʼna.
Dɨuni kuu‑t Satanás.
3 N‑dakee‑ia‑tɨ nua ña xe ndɨʼɨ jan.
Vaʼa n‑xadɨ‑ia yuʼu‑i te n‑tenee‑ia sellu‑ia yuʼu‑i xa maxku kane‑tɨ xa kutuu‑t ɨɨn mil kuia te dandaʼu‑t ñayiu.
Ijan dada natava‑ia‑tɨ te dayaa‑ia‑tɨ xa kuikonuu‑t xaku nga kɨu.
4 Ijan dada n‑xini‑da ñayiu ka taxnuni xtuu nuu silla.
N‑kida Ianyuux xa dayaʼa‑i juxtixia ñayiu.
Dɨuni n‑xini‑da anu ñayiu n‑ka kendodo dɨkɨ xaxeʼe xa n‑ka kakuneʼe‑i xa n‑jaʼan Jesús xiʼin xa n‑jaʼan Ianyuux.
Ka kuu‑i ñayiu ña n‑ka xe juiin xiti nuu kɨt ndeʼe jan xiʼin nuu xa kaa ná kaa mee‑t jan xa nakuetu koio‑i.
Dɨuni ña n‑xejoon‑i xa nkondenee tnuni tnaʼa tnuni neʼe dragón jan teʼu‑i a ndaʼa‑i.
N‑xini‑da xa n‑ka nandoto ñayiu ijan,
te taxnuni koio‑i xiʼin Jesucristu ɨɨn mil kuia.
5 Ñayiu yaʼa ka kuu ñayiu kiʼna nuu kiʼna vii n‑ka nandoto.
Nandoto koio dava ka ñayiu n‑ka xiʼí,
ko hora na chitu ɨɨn mil kuia jan.
6 Taʼu n‑ka kuu ñayiu kiʼna nuu kiʼna vii n‑ka nandoto ya;
ma kuú ka‑i ɨnka vuelta.
Dutu junukuechi nuu Ianyuux xiʼin nuu Jesucristu ku kuu koio‑i.
Te taxnuni‑i xiʼin‑ia ɨɨn mil kuia.
N‑dajane niʼno Ianyuux Kuiʼna nuu koko azufri
7 Hora na chitu ɨɨn mil kuia kane Kuiʼna nua nuu yɨndiʼu‑i te yaa‑i.
8 Jɨn dandaʼu‑i ñayiu ntdaa nación ñuñayiu.
Nde ñayiu Gog xiʼin Magog jɨn dandaʼu‑i.
Dataka‑i ñayiu ijan xa jɨn jantnaʼa‑i xiʼin ñayiu ka kuu daʼya Ianyuux.
Ná kueʼe ñuʼu kuchi io yuʼu mar kueʼe ñayiu taka ijan.
9 Kandeka‑i ñayiu n‑dataka‑i nituʼu ñuñayiu jɨʼɨn ñuu nuu xndaxio ñayiu kuu daʼya Ianyuux,
te naduku nduu‑i xiʼin‑i ñuu ijan,
ko juun ñuʼú nde andɨu te kayu koio‑i.
Ñayiu ñuu ijan kuu ñayiu xemani Ianyuux.
10 Dajane niʼno Ianyuux Kuiʼna nuu koko azufri.
Ná kaʼnu ɨɨn laguna,
kaʼnu nuu koko azufri jan.
Xaxeʼe xa dandaʼu‑i ñayiu,
xijan kuu xa ijan keé‑i.
Keé‑i nuu n‑keé kɨt ndeʼe jan xiʼin se n‑ka jaʼan vete xa ka kuu‑s se jaʼan nuu ñayiu xa n‑jaʼan Ianyuux.
Nɨkava nɨkuita ndaʼu ku yaʼa koio‑i ntdaa‑i ijan.
N‑ndadandaa Ianyuux kuechi ñayiu n‑ka xiʼí
11 Ijan dada n‑xini‑da ɨɨn silla kuixi kaʼnu xiʼin Ia nukoo nuu‑tnu te hora ijan n‑ndoñuʼu ñuñayiu xiʼin andɨu.
N‑xo ndeʼa‑ia xa n‑ka ndoñuʼu xijan.
12 Te n‑xini‑da ñayiu n‑ka xiʼí xniñi yatni nuu nukoo silla kuixi kaʼnu jan.
Nandɨkaa nandituʼu ñayiu n‑ka xiʼí xyuku ijan.
Nani xyuku ñayiu dakuu nga dani xyuku ñayiu ndandɨʼɨ.
N‑ka nandɨka tutu xtuniʼno io andɨu nuu xyodotnuni nax n‑ka kida ñayiu,
te n‑ka kundaa kuechi‑i ná xyodotnuni nuu tutu jan.
Dɨuni nandɨka ɨnka ntuku tutu tuniʼno nuu xyodotnuni dɨu ñayiu kutuu xiʼin Ianyuux nɨkava nɨkuita.
13 N‑ka nane ñayiu n‑ka nduxi nuu mar.
N‑ka nane ndɨyɨ n‑ka yɨnduxi nuu ñuʼu.
Dɨuni n‑ka nane ndɨyɨ n‑ka keé andea.
Ntdaa‑i n‑ka nandoto,
te n‑ka kundaa kuechi‑i ná xyodotnuni nuu tutu jan.
14 Ijan dada n‑dakee daʼu ni‑ia xa kida xa xiʼí‑ro nuu nuʼu koko.
Na kaʼnu ɨɨn laguna kaʼnu nuu n‑dakee‑ia xijan.
Dani n‑dakee‑ia tnduu xiʼin ñuʼu nuu n‑ka kaa ndɨyɨ nuu nuʼu koko jan.
Ijan kuu nuu kuú koio ñayiu ɨnka vuelta.
15 Dɨuni dakee‑ia ñayiu ña tuu na dɨu xyodotnuni nuu tutu tuniʼno nuu xyodotnuni dɨu ñayiu kutuu xiʼin‑ia nɨkava nɨkuita.