19
Nu n‑yaʼa xa n‑teku‑da xaʼa,
n‑teku‑da xa kueʼe ñayiu ka kuvaa andɨu.
Duʼa ka jaʼan‑i:
Na nakuetu‑ro nuu Ianyuux,
chi mee‑ia n‑dakaku ñaʼa.
Io vaʼa ni xa taxnuni‑ia nuu ntdaa ñayiu ñuñayiu.
Io vaʼa ni xa yɨndaʼa‑ia ntdaa xa io.
2 Io vaʼa xa n‑dayaʼa‑ia juxtixia ñadɨʼɨ n‑xo diko mee‑ña.
Dɨu ñá yaʼa n‑dakuaʼa ñayiu ñuñayiu xa kava koio‑i xiʼin ñayiu ñatu n‑tnundaʼa xiʼin‑i.
N‑danaa Ianyuux ñayiu ñuu ijan xa n‑dandenaa‑ia xa n‑ka xaʼni ñayiu jan ñayiu n‑ka xinokuechi nuu‑ia.
3 N‑kuvaa ntuku ñayiu ɨnka vuelta andɨu.
Ka jaʼan‑i:
Na nakuetu‑ro nuu Ianyuux.
Nɨkava nɨkuita ku junu ñuʼa ñuu Babilonia.
4 N‑ka xe juiin xiti ntuku oko koon sexaʼnu ka kunxaʼnu xiʼin nkoon kɨt dana xndaa jan nuu nukoo Ianyuux xaxeʼe xa taxnuni‑ia te n‑ka ndadakaʼnu koio‑s xiʼin‑tɨ‑ia.
Te ka jaʼan‑s xiʼin‑tɨ:
—Daa na koo.
Na nakuetu‑ro nuu Ianyuux.
5 Te nde nuu nukoo Ianyuux nuu silla‑ia n‑teku‑da n‑jaʼan:
Ndoʼo ñayiu ka xinokuechi nuu Ianyuux te ka yuʼu‑n nuu‑ia,
ndadakaʼnu koio‑ia.
Ka kuu‑n ñayiu dakuu nga a ka kuu‑n ñayiu ndandɨʼɨ,
ndadakaʼnu koio‑ia.
Viko tnundaʼa tkolelu
6 Dɨuni n‑teku‑da xa ná nga kuu xa kueʼe ñayiu kuvaa.
Ná nga kuu xa kayu ndute kaʼnu junkoio niʼno ɨɨn nuu dujun a ná kuu xa ndeʼe nɨʼɨ dondaʼa juan nuʼu hora kana dau kuu.
N‑jaʼan ntdaa xijan:
Na ndadakaʼnu‑ro Ianyuux,
chi taxnuni‑ia nuu ntdandituʼu ñayiu,
te yɨndaʼa‑ia ntdaa xa io.
7 Na kudɨ ini‑ro.
Na kuvete‑ro.
Na nakuetu‑ro nuu‑ia chi n‑xee hora tnundaʼa tkolelu.
Xa n‑kida tuʼa dichi koo xiʼin‑tɨ mee‑i xa tnundaʼa‑i xiʼin‑tɨ.
8 N‑xejoon Ianyuux xa kukutu dichi jan daʼma linu vaʼa io ndoo,
te diñu.
Daʼma linu io ndoo kuu xavaʼa n‑ka kida ñayiu ka kuu daʼya Ianyuux.
Ka kuu xijan.
9 Ijan te n‑jaʼan ángel jan nuu‑da:
—Chidotnuni tnuʼu yaʼa:
“Naka taʼu ñayiu n‑jaʼan ñaʼa Ianyuux xa kixi‑i viko kada‑ia chi tnundaʼa tkolelu.
Tuu nga n‑kida tuʼa‑ia xa kaxdini koio‑i xiʼin‑ia.
Ñadu tnuʼu vete kuu chi ɨɨn xa ndaa kuu;
tnuʼu Ianyuux kuu.”
10 Te n‑xe juiin xiti‑da nuu‑ia xa nakuetu‑da nuu‑ia,
te n‑jaʼan‑ia:
—Ñaʼa,
maxku daa kada‑n chi dɨuni xinokuechi‑r nuu Ianyuux ná ka xinokuechi ndoʼo xiʼin ntaka ñani‑n nuu‑ia.
Ka najani ñayiu ijan xa n‑kida Jesús xiʼin xa n‑jaʼan‑ia nuu ñayiu.
Nakuetu nuu Ianyuux.
Nani n‑kida Espíritu‑ia xa n‑ka jaʼan se n‑ka jaʼan nuu ñayiu xa n‑jaʼan Ianyuux,
dani kida‑ia vitna xa kakuneʼe ñayiu xa n‑jaʼan Jesús.
Ia yodo ɨɨn caballu kuixi
11 Ijan dada n‑xini‑da xa nune ntuku andɨu,
te dɨuni n‑xini‑da ɨɨn caballu kuixi.
Ná kaa ɨɨn seyɨɨ kaa Ia yodo‑tɨ.
Xa n‑jaʼan‑ia xa kada‑ia,
xijan kada‑ia;
ñatu vete‑ia.
Kida ndaa‑ia hora ndadandaa‑ia kuechi ñayiu.
Ñadu nax kuu xa jantnaʼa‑ia xiʼin Kuiʼna chi xaxeʼe xa kida‑i kuechi.
12 Ná kuu yañuʼu kuu nduchi nuu‑ia.
Tɨtnɨ corona ñuʼu dɨkɨ‑ia,
te ndenee dɨu‑ia corona jan.
Ñayo xini nax nani‑ia.
Mee ni‑ia xini.
13 Dɨuni niʼno‑ia daʼma n‑kendaxi nuu nɨñɨ.
Dɨu‑ia kuu Tnuʼu Ianyuux.
14 Xndijun ñaʼa ia ka kuu soldado io andɨu xyodo caballu kuixi.
Xniʼno‑ia daʼma kuixi linu io ndoo te vaʼa.
15 Kee ɨɨn espada deen yuʼu Ia niʼno daʼma n‑kendaxi nuu nɨñɨ jan,
te xijan juetniu‑ia xa datnukueʼe‑ia ñayiu ñatu ka kuu daʼya‑ia.
Ndeʼe kundeka‑ia‑i hora na taxnuni‑ia nuu‑i.
Ná kida‑ro hora ka xadi‑ro uva xa kee ndudi,
daa kada Ia taxnuni nuu ntdaa xa io andɨu xiʼin ñuñayiu ñayiu ijan xaxeʼe xa yo kiti ini‑ia nuu‑i.
16 Daʼma‑ia xiʼin nuu tkajan‑ia ndenee dɨu‑ia.
Duʼa yodotnuni:
“Ia taxnuni nuu ntdaa se ka taxnuni.
Ia kunxaʼnu nuu ntdandituʼu se ka kunxaʼnu.”
17 Dɨuni n‑xini‑da xa nujuiin ɨɨn ángel nuu ngandii.
Xee kana‑ia nuu ntdaa kɨtɨ ka ndava andɨu.
Duʼa xiaʼan‑ia:
—Nataka koio chi kaxdini‑n xa n‑kida tuʼa Ianyuux.
Tuu nga n‑kida tuʼa‑ia xa kaxdini koio‑n.
18 Neʼe.
Kaxi koio‑n kuñu se n‑ka taxnuni,
kuñu soldado,
kuñu se unu ndeʼe xa jantnaʼa‑s,
kuñu caballu,
kuñu se n‑ka xo yodo‑tɨ du.
Kaxi koio‑n kuñu ñayiu ña yoo na xtoʼo,
kuñu ñayiu n‑kidatniu duʼa nuu xtoʼo‑i,
kuñu ñayiu dakuu nga,
kuñu ñayiu ndandɨʼɨ du.
19 Te n‑xini‑da xa n‑ka nataka kɨt ndeʼe jan xiʼin se ka taxnuni ñuñayiu xiʼin se ka kuu soldado‑s xa jantnaʼa koio‑s xiʼin Ia yodo caballu jan xiʼin ia xndeka tnaʼa xiʼin‑ia.
20 N‑ka tnɨɨ‑ia kɨt ndeʼe jan xiʼin se n‑ka jaʼan vete xa ka kuu‑s se ka jaʼan nuu ñayiu xa n‑jaʼan Ianyuux,
te n‑ka chindiʼu‑ia‑s.
N‑xo kida se n‑ka xo jaʼan vete jan milagru n‑xo ndeʼa kɨt ndeʼe jan.
Xaxeʼe xa n‑xo kida‑s milagru n‑xo dandaʼu‑s ñayiu xneʼe tnuni kɨt ndeʼe jan,
te n‑ka xe juiin xiti‑i nuu xa kaa ná kaa kɨt ndeʼe jan.
N‑dakee ndito Ianyuux kɨt ndeʼe jan xiʼin se n‑ka xo jaʼan vete xa ka kuu‑s se n‑jaʼan nuu ñayiu xa n‑jaʼan Ianyuux nuu kayu azufri.
Ná kaʼnu ɨɨn laguna kaʼnu ñuʼu jan.
21 Xiʼin espada kee yuʼu Ia yodo caballu jan n‑xaʼni‑ia dava ka se n‑ka kendoo xiʼin espada kee yuʼu‑ia,
te n‑ka xaxi kɨt ka ndava kuñu se ijan xa nde n‑ka chitu xiti‑tɨ.