—Naa ñuu kaʼnu Babilonia.

Naa ñuu kaʼnu Babilonia.

Kueʼe xaloko koo ijan.

Kutuu‑i ijan chi ijan ku kuu veʼe‑i.

Kueʼe kɨt ka ndava ka xini uʼu ñayiu koo ñuu ijan.

3 Naa Babilonia chi ñayiu ñuu ijan n‑daneʼe ñayiu ntdantuʼu nación ñuñayiu xa kava‑i xiʼin ñayiu ñatu kuu ñadɨʼɨ‑i a yɨɨ‑i.

Ná kuu anu ɨɨn se n‑xini ndɨdɨ́ xa koʼo‑s,

daa ka kuu anu‑i xa kada‑i xijan.

Ka kidakuechi se ka taxnuni ntaka dava nación xiʼin ñadɨʼɨ Babilonia jan.

Se ka xeen te ka nadiko‑s nituʼu ñuñayiu,

yo n‑ka kukuika‑s xa ka najueen‑s te ka nadiko‑s ndatniu nuu ñayiu ñuu Babilonia jan —kuu ángel,

n‑jaʼan‑ia.

4 N‑teku ntuku‑da xa n‑jaʼan andɨu.

N‑jaʼan:

—Ta kee koio ndoʼo,

ñayiu ka kuu daʼya Ianyuux,

ñuu dian na ñaʼa kada koio‑n kuechi ka kida‑i.

Ta kee koio xa maxku ndaʼu yaʼa koio‑n ná ndaʼu yaʼa ñayiu dian hora na kada uʼu Ianyuux‑yɨ.

5 Nde andɨu ndeʼa‑ia xa ka kida‑i.

Xini‑ia ntdaa xaloko ka kida‑i.

6 Kada uʼu koio‑n ñayiu n‑ka kida uʼu ñaʼa.

Ndeʼe ka kada uʼu‑n‑yɨ.

Ñayiu n‑ka kida uʼu ñaʼa ɨɨn vuelta,

uu vuelta kada uʼu‑n‑yɨ.

Dandenaa koio‑n xa n‑ka kida ñaʼa‑i.

7 Xaxeʼe xa ndeʼe n‑ka ku iʼni‑i xiʼin tvini‑i xiʼin xaxii‑i,

xijan kuu xa ndeʼe kada uʼu‑n‑yɨ.

Kada koio‑n xa ndaʼu na yaʼa‑i.

Dɨuni kada koio‑n xa na kukoʼyo ini‑i.

Xko jaʼan mee xko jaʼan ɨɨn ñá kuu kuenda kɨu ñuu Babilonia.

Duʼa xko jaʼan‑ña:

“Kuu‑ro ñá taxnuni.

Ndito yɨɨ‑ro,

ñatu n‑xiʼí‑te.

Ña kukoʼyo ini‑ro.”

8 Xaxeʼe xijan ndaʼu yaʼa ñayiu ñuu dian.

Kuu tnama.

Koo xa koʼyo ini.

Kayu ñuu dian.

Te kuú koio‑i.

Idii ni kɨu yaʼa koio‑i ntdaa xijan.

Dayaʼa ñaʼa Ianyuux juxtixia xaxeʼe xa taxnuni‑ia.

9 Na jini se ka taxnuni ntaka ñuu ñuñayiu n‑ka kidakuechi xiʼin ñadɨʼɨ kuu Babilonia jan xa kane ñuʼa ñuu‑ña xa kayu,

ndaʼi koio‑s.

Kueʼe tvini n‑ka xe juʼun‑s xiʼin‑ña xa n‑ka xo xeen‑s ndatniu yo yaʼu n‑ka xo nevaʼa‑s xiʼin‑ña.

10 Xika kunujuiin koio‑s xa na ñaʼa ndaʼu yaʼa koio‑s ná yaʼa ñayiu ñuu ijan,

te juñaʼa tnaʼa‑s:

—Naka ndaʼu n‑yaʼa ñayiu Babilonia.

Naka ndaʼu n‑yaʼa ñuu kaʼnu jan.

N‑xo taxnuni ñuu jan n‑kuu.

Idii ni hora ndaʼu n‑ka yaʼa‑i xa n‑ka yaʼa‑i juxtixia.

11 Hora na jini se ka xeen te ka nadiko‑s,

dɨuni kukoʼyo ini‑s te ndaʼi koio‑s xaxeʼe ñuu ijan chi mayo ka jueen xa ka diko‑s.

12 Xa ka diko‑s kuu oro,

plata,

yuú vili xndaa yo yaʼu,

perla,

daʼma linu,

daʼma seda,

daʼma tndee ndɨjɨn ndiʼi,

daʼma kueʼe yo yaʼu,

xiʼin ntdantuʼu nuu yutnu vili xeʼen,

yutnu yo yaʼu,

bronce,

hierro,

marmol,

ndatniu marfil du.

13 Ka diko‑s canela xiʼin ntaka xa keé nuu ndeyu,

duxa tnuu,

duxa kuixi,

yuchi vili xeʼen,

vinu,

aciti,

yuchi trɨu,

mee trɨu du.

Ka diko‑s ngutu,

tkachi,

caballu,

carreta du.

Dɨuni ka diko‑s se kadatniu duʼa.

14 Te jaʼan koio‑s nuu ñayiu ijan:

—Ma kaxi ka‑n xavidi daa n‑xo tna ini‑n.

Mayo ka‑n kunevaʼa xa yo yaʼu,

ni ma kukutu ka‑n xa yo yaʼu.

Ma uun ka niʼi‑n xijan.

15 N‑ka kukuika se ijan xaxeʼe xa yo n‑ka xo xeen ñayiu Babilonia ndatniu‑s jan.

Xika kunujuiin koio‑s xa na ñaʼa ndaʼu yaʼa koio‑s ná yaʼa ñayiu ñuu ijan.

Kukoʼyo ini koio‑s te ndaʼi‑s.

16 Na yaʼa xijan,

juñaʼa tnaʼa‑s:

—Ñayiu ijan n‑xo ndixi daʼma linu vaʼa,

daʼma tndee ndɨjɨn ndiʼi xiʼin daʼma kueʼe yo yaʼu.

N‑ka xo kukutu dujun‑i,

ndaʼa‑i,

dɨkɨ‑i dɨkɨ oro,

yuú vili xndaa te yaʼu xiʼin perla.

17-18 Idii ni hora n‑naa ntdandituʼu xa yo yaʼu jan te ña tuu ka.

Hora na jini se dakaka barcu xiʼin ñayiu ndido‑i xiʼin se ka xata daʼma xa kaka‑i xiʼin dava se ka kidatniu xiti barcu jan xa kane ñuʼa xa kayu ñuu jan,

xika kunujuiin koio‑s tuku te kana koio‑s:

—Ni ɨɨn ñuu ñatu n‑xo xee ñuu kaʼnu ijan.

19 Yo kukoʼyo ini‑s te ndaʼi‑s xaxeʼe ñuu ijan.

Te kodo koio‑s ñuʼu yuchi dɨkɨ‑s.

Kana koio‑s:

—Naka ndaʼu n‑yaʼa ñayiu Babilonia.

Naka ndaʼu n‑yaʼa ñuu kaʼnu jan.

Ntdaa se ka kuu xtoʼo barcu n‑ka kukuika xaxeʼe xa yo n‑ka xo xeen ñayiu ñuu kuika jan xa n‑ka diko‑s.

Idii ni hora n‑naa ntdandituʼu xa yo yaʼu n‑xio ijan te ña tuu ka —kachi koio‑s.

Te n‑jaʼan:

20 —Na kuvete ia xndaxio andɨu.

Na kuvete ñayiu n‑kida Ianyuux xa n‑ka nduu‑i ñayiu ii.

Na kuvete se n‑tundaʼa ñaʼa Jesús xa kada koio‑s tniu‑ia.

Na kuvete se n‑ka xo jaʼan tnuʼu Ianyuux nuu ñayiu.

Na kuvete koio‑s ntdaa‑s chi n‑dayaʼa Ianyuux juxtixia ñayiu ñuu ijan xa n‑dandenaa‑ia xa n‑ka kida ñaʼa‑i.

21 Ijan n‑ndoneʼe ɨɨn ángel ndaku ɨɨn toto kaʼnu longo kaa ná kaa yodo molino.

N‑dajane niʼno‑ia nuu mar te n‑jaʼan‑ia:

—Duʼa dajane Ianyuux ñuu kaʼnu Babilonia te ma uun ka jini ñayiu ñuñayiu ñuu ijan chi naa.

22 Ma uun ka teku ñayiu xa kande arpa ñuu ijan.

Mayo ka teku xa tɨu ñayiu flauta,

ni xa tɨu ñayiu strompeta.

Mayo ka teku xa kata ñayiu,

ni xa tɨu;

ni xa kande mayo ka‑i teku.

Ma koo ka ñayiu kadavaʼa ntaka ndatniu xetniu‑ro.

Ndondoo‑i naa.

Ma uun ka teku ñayiu xa ku kurrɨɨ molino.

23 Ma ku koko ka luz xiti ñuu,

ni xiti veʼe.

Mayo ka teku xa ku kuvaa viko tnundaʼa.

N‑ka xo kunuu ñayiu ñuu ijan xa n‑ka xo xeen‑i te yo n‑ka xo diko‑i ntaka ndatniu.

Yo n‑ka xo dandaʼu‑i dava ka ñayiu ñuñayiu,

te n‑ka xo chibruju‑i‑yɨ.

24 Ñayiu ñuu kaʼnu yaʼa n‑ka xaʼni ñayiu n‑kida Ianyuux xa n‑ka nduu‑i ñayiu ii.

Dava ñayiu n‑ka xaʼni‑i jan n‑ka xo jaʼan xa n‑xo jaʼan Ianyuux nuu‑i.

Te xaxeʼe‑i n‑ka xaʼni ñayiu ñuñayiu ndɨyɨ.