—Na kachitnuʼu ñaʼa‑r xa kada Ianyuux ñá n‑xo diko mee‑ña hora na dayaʼa ñaʼa‑ia juxtixia.

Nuu mar xiʼin nuu ndute xika deʼva nukoo‑ña.

2 N‑ka xo kaa ñayiu xiʼin ñayiu ña n‑tnundaʼa xiʼin‑i xaxeʼe xa daa n‑dakuaʼa ñaʼa ñá yaʼa.

N‑xo kidakuechi‑ña xiʼin se ka taxnuni nuu ñayiu ñuñayiu —kuu‑ia.

3 Ijan dada ndeka‑ia anu‑da juaʼan nuu ñayo ñayiu io te ñatu nga juun dau.

Ijan n‑xini‑da ɨɨn ñá yodotuu ɨɨn kɨt ndeʼe.

Kueʼe‑tɨ,

te kueʼe dɨu‑tɨ io.

Ñɨɨ‑tɨ xndeyuku dɨu‑tɨ.

Tnuʼu ka jaʼan ñayiu hora ka jan kuiʼa‑i Ianyuux yodotnuni ñɨɨ‑tɨ.

Xijan kuu dɨu‑t.

Uxa dɨkɨ‑t io,

te uxi ndɨkɨ‑t.

4 Daʼma kueʼe ndɨjɨn ndiʼi xiʼin daʼma kueʼe niʼno ñá ijan.

N‑kukutu‑ña dɨkɨ oro,

dɨkɨ yuú yo yaʼu xiʼin dɨkɨ perla.

Dɨuni tnaʼa xijan ñuʼu dujun ndaʼa‑ña.

Ndaʼa kuaʼa‑ña neʼe ɨɨn koʼo oro ñuʼu xa kuiʼa kaa.

Kuenda kɨu yɨka kuechi n‑kida‑ña xiʼin seyɨɨ kuu xa ñuʼu koʼo oro nundaʼa‑ña.

Yo kueʼe kuechi n‑kida‑ña.

Ɨɨn xa januu kuu xijan.

5 Teʼu‑ña ndenee dɨu‑ña.

Duʼa yodotnuni:

“Ñayo kutnuni ini nax kuu xa yodotnuni teʼu‑ña.

Kuenda kɨu ñayiu ñuu kaʼnu Babilonia n‑ka daneʼe ntaka dava ka ñadɨʼɨ xa diko‑ña mee‑ña kuu‑ña.

Ijan kuu nuu vaxi ntdantuʼu xaloko xaduʼa xanee xayichi kuu ñuñayiu.”

6 N‑xaʼni ñá ijan ñayiu n‑kida Ianyuux xa n‑ka nduu‑i ñayiu ii xaxeʼe xa n‑kukanu ini‑i Jesús.

N‑xiʼi‑ña nɨñɨ‑i,

te n‑xini‑ña.

Yo ndeʼe n‑yuʼu anu‑da xa n‑xini‑da‑ña.

7 Ijan n‑jaʼan ángel jan nuu‑da:

—¿Nakuenda yuʼu‑n?

Na kachitnuʼu ñaʼa‑r nax kuu ñadɨʼɨ xiʼin kɨt ndeʼe ndido ñaʼa,

kɨt io uxa dɨkɨ‑t te io uxi ndɨkɨ‑tɨ n‑xini‑n jan.

8 N‑xio kɨt ndeʼe ijan,

ko ña yoo ka‑t io vitna.

Xa kuyatni kane ntuku‑t nua,

te ijan nga naa‑t xa ma kundito ka‑t.

Ñayiu ñatu yodotnuni dɨu‑i nuu libru yodotnuni dɨu ñayiu kundito nɨkava nɨkuita nde na n‑xe kavatuu ñuñayiu,

kueʼe xa kani ini koio‑i hora na jini ntuku‑i kɨt n‑xio antes,

kɨt ña yoo ka tuu,

kɨt kixi ɨnka vuelta jan.

9 ʼDiko ni ñayiu kaxi ini kutnuni ini xaʼa.

Uxa dɨkɨ kɨt ndeʼe jan kuu uxa tnduu nuu nukoo ñá ijan.

Dɨuni ka kuu uxa seyɨɨ.

10 Oʼon‑s xá n‑ka taxnuni,

te ñatuka ka taxnuni‑s.

Ɨɨn‑s taxnuni vitna te ɨnka‑s ta kixi ka xa taxnuni‑s.

Kixi‑s xa taxnuni‑s,

ko xaku ni tiempo taxnuni‑s.

11 Kɨt ndeʼe n‑xo tuu te ña yoo ka‑t tuu,

kandijun nga taxnuni‑t na yaʼa xa taxnuni nduu se ijan.

Xiʼin nde kɨt yaʼa n‑ka kuu una tnaʼa se ijan.

Kixi ntuku‑t,

ko xa ijan nga naa‑t kixi ntuku‑tɨ.

12 Uxi ndɨkɨ kɨt n‑xini‑n kuu uxi se taxnuni koio,

ko ta taxnuni ka‑s.

Taxnuni koio‑s xiʼin kɨt ndeʼe,

ko ɨɨn hora ni.

13 Kada ɨnuu uxi se taxnuni koio xa tetutniu‑s kɨt ndeʼe jan xa taxnuni‑tɨ.

14 Nujuiin xiʼin koio se yaʼa xiʼin kɨt ijan te jantnaʼa koio‑s xiʼin tkolelu jan xiʼin ñayiu ka kukanu ini ñaʼa.

N‑kaxi Ianyuux ñayiu yaʼa,

te n‑kida‑ia xa n‑ka teku‑i nax kada koio‑i xa nanitaʼu‑i.

N‑ndaku tkolelu jan nuu‑s chi taxnuni‑tɨ nuu ntdaa se ka taxnuni,

te dɨuni kunxaʼnu‑tɨ nuu ntdaa‑s.

15 Ijan te n‑jaʼan ka ángel nuu‑da:

—Mar n‑xini‑n,

nuu nukoo ñadɨʼɨ n‑xo diko mee‑ña kuu nandɨkaa nandituʼu ñayiu ñuñayiu.

16 Jini uʼu ntdaa ndɨkɨ kɨt ndeʼe xiʼin mee kɨtɨ n‑xini‑n jan ñadɨʼɨ n‑xo diko mee‑ña.

Jendee koio xijan xiʼin kɨt ijan ntdaa xa nevaʼa‑ña.

Dɨuni taxvichi ñaʼa koio xijan xiʼin kɨt ijan,

te kaxi koio xijan dava kuñu‑ña,

te dava teñuʼu‑t.

17 Daa n‑juini Ianyuux xa kada koio ñaʼa xijan xiʼin kɨt ijan.

Dɨuni n‑juini‑ia xa kada ɨnuu koio xijan xa tetutniu‑i kɨt ndeʼe jan xa taxnuni‑tɨ.

Taxnuni‑t.

Ndena jɨn tnaʼa ntdaa xa n‑jaʼan Ianyuux xa yaʼa;

ijan dada ma taxnuni ka‑tɨ.

18 Ñá n‑xini‑n jan kuu ñuu kaʼnu ka taxnuni nuu ntdantuʼu ñuu ñuñayiu.