—Juaʼan koio te kodo‑n xa xñuʼu uxa koʼo de ñuñayiu chi yo kiti ini Ianyuux nuu ñayiu.

2 N‑xoyo ɨɨn ángel xa uʼu ñuʼu koʼo neʼe‑ia ñuñayiu,

te n‑xe juiñi ndɨʼyɨ ñɨɨ ntdaa ñayiu xneʼe tnuni kɨt n‑kane nuu mar jan.

Dɨuni ñayiu yaʼa ka kuu ñayiu n‑ka xe juiin xiti nuu xa kaa ná kaa mee kɨt yaʼa te n‑ka nakuetu‑i nuu‑tɨ.

Ndeʼe xatu ndɨʼyɨ jan.

3 N‑xodo ɨnka‑ia xa ñuʼu koʼo neʼe‑ia nuu mar te nduu mar jan nɨñɨ.

Ná kaa nɨñɨ ñayiu n‑xiʼí kaa ndute jan,

te ntdaa kɨt io mar jan n‑ka xiʼí.

4 N‑xodo ángel kuu uni xa ñuʼu koʼo neʼe‑ia deʼva nuu xika ndute xiʼin nuu kane‑té,

te n‑nduu‑té nɨñɨ.

5 Ijan te n‑teku‑da xa jaʼan ángel yɨndaʼa ndute:

—Taa‑ro Ianyuux,

Ia daa nga io.

Ii‑n.

Kidandaa‑n hora ndadandaa‑n kuechi ñayiu.

6 Ñayiu yaʼa n‑ka xaʼni ñayiu n‑kida‑n xa n‑ka nduu‑i ñayiu ii xiʼin se n‑ka jaʼan xa n‑jaʼan‑n nuu ñayiu.

Te n‑ka xatu nɨñɨ‑i.

Xijan kuu xa n‑kida‑n xa nɨñɨ ijan na koʼo koio‑i vitna chi xijan kuu taʼu‑i.

7 Te dɨuni n‑teku‑da xa n‑jaʼan nuu io altar veñuʼu jan.

Duʼa n‑jaʼan:

—Io vaʼa xa daa kida‑n,

Taa‑ro Ianyuux chi ndixi kuu Ia taxnuni.

Vaʼa n‑kida‑n xa n‑dayaʼa‑n ñayiu juxtixia chi io kuechi‑i.

8-9 Ijan te n‑xodo ángel kuu koon xa ñuʼú koʼo neʼe‑ia nuu ngandii,

te n‑kida Ianyuux xa n‑teñuʼu ngandii ntdaa ñayiu loko.

Xaxeʼe xa n‑kayu ñɨɨ‑i n‑ka jan kuiʼa‑i Ianyuux,

Ia tuu andɨu chi mee‑ia n‑kida xa kada uʼu ñaʼa ntdaa xaʼa.

Dɨuni kuiʼa n‑ka jaʼan‑i‑ia.

Juini daa n‑yaʼa‑i,

ko ña n‑ka natu ini‑i xa ka kida‑i kuechi,

ni ña n‑ka ndadakaʼnu‑i‑ia.

10 N‑xodo ángel kuu oʼon xa ñuʼu koʼo neʼe‑ia nuu silla kɨt n‑kane nuu mar jan,

te n‑kunee ntdantuʼu ñuu taxnuni‑tɨ.

Diko n‑ka kanaxiin ñayiu io ntaka ñuu taxnuni‑tɨ xaxeʼe xa yo xaxiaʼan ñɨɨ‑i.

11 Dɨuni n‑ka jan kuiʼa‑i Ianyuux xaxeʼe xa yo ndeʼe xatu ñɨɨ‑i nuu iñi ndɨʼyɨ.

Dɨuni kuiʼa n‑ka jaʼan‑i‑ia.

Juini daa n‑yaʼa‑i,

ko ña n‑ka natu ini‑i xa n‑kida‑i kuechi.

12 N‑xodo ángel kuu iñu xa ñuʼu koʼo neʼe‑ia nuu ndute xika deʼva kaʼnu nani Éufrates,

te n‑yichi ndute xika deʼva jan xa na kuaʼa yaʼa koio se ka taxnuni xa kixi‑s.

N‑ka kee‑s do nuu kane ngandii.

13 N‑xini‑da xa n‑ka kee ɨɨn xaloko yuʼu dragón jan xiʼin yuʼu kɨt n‑kane nuu mar jan xiʼin yuʼu se n‑ka jaʼan xa n‑jaʼan‑s tnuʼu Ianyuux nuu ñayiu,

ko ña ndaa.

Na xndaa nrraka xndaa xaloko jan.

14 Xaloko ijan kida milagru te nadataka koio‑i se ka taxnuni nituʼu ñuñayiu xa jantnaʼa‑s kɨu ndadandaa Ianyuux kuechi ñayiu.

15 Te danaa n‑jaʼan Jesús:

—Kunaʼa koio xa dana ini naxee‑r.

Kada‑r ná kida ɨɨn ñaduʼu chi dana ini naxee‑r.

Na kada tuʼa ñayiu mee‑i te na koo tuʼa‑i ná io tuʼa ɨɨn ñayiu xa nakueka‑i xtoʼo‑i hora naxee‑s veʼe‑s.

Xko ndito‑i xakuaa,

te ña tava‑i daʼma‑i.

Naka taʼu ñayiu duʼa kida,

chi ma kujanuu‑i chi ma kee vichi‑i hora na xe kueka‑r‑yɨ.

16 N‑ka nadataka xaloko jan se ka taxnuni ɨɨn nuu dandee ñayiu jaʼan hebreu Armagedón.

17 N‑xodo ángel kuu uxa xa ñuʼu koʼo neʼe‑ia nuu tachi.

Hora ijan ni xee n‑jaʼan do nuu katuu veñuʼu nuu nukoo Taa‑ro Ianyuux.

Duʼa n‑jaʼan:

—N‑kuu vitna.

18 Ijan te n‑xeyeʼe,

n‑kayu,

n‑kaʼndɨ,

n‑kana dau,

te ndeʼe n‑tnaa ñuñayiu.

Nde na n‑xe kavatuu ñuñayiu xiʼin nde vitna ña uun ña dii duʼa tnaa.

19 N‑ndata nuu ñuʼu ñuu ndandɨʼɨ ka.

Uni pedazo n‑kuu.

Dɨuni n‑kida uʼu Ianyuux ñuu kaʼnu nani Babilonia ná n‑xani ini‑ia,

chi yo kiti ini‑ia nuu ñayiu ijan.

Te n‑naa dava ka ñuu ñuñayiu.

20 N‑ndoñuʼu ntdantuʼu isla xiʼin ntdantuʼu yuku.

21 N‑juun ñɨñɨ naʼnu ñuñayiu te n‑ka ñani ñayiu.

Vaa na uu diko oʼon kilo vee ɨɨn ɨɨn ñɨñɨ n‑juun.

Kuiʼa n‑ka jaʼan ñayiu ñuñayiu Ianyuux xaxeʼe xa n‑dajuun‑ia ñɨñɨ naʼnu.

Dɨuni n‑ka jan kuiʼa‑i‑ia.

N‑ka jan kuiʼa‑i‑ia chi yo ndeʼe ndaʼu n‑ka yaʼa‑i.

Ñuu ndandɨʼɨ ka kuu Jerusalén.