Uxa ángel kada uʼu ñayiu xiʼin xa io ñuñayiu
15
1-2 N‑xini ntuku‑da ɨnka vuelta ɨɨn xa n‑xini‑da andɨu.
N‑xini‑da uxa ángel,
ia ka xinokuechi nuu Ianyuux.
Ia yaʼa kada uʼu koio ñayiu uxa ka vuelta xaxeʼe xa kiti ini Ianyuux nuu‑i,
te ma kada uʼu koio ka‑ia‑i.
N‑xini ntuku‑da ɨnka xa n‑xini‑da.
Ña kutnuni nax nga kuu xa n‑xini‑da jan.
Nanga kaa mar kaa.
Nanga kaa vidriu kaa,
te daka xijan xiʼin ñuʼú.
Yuʼu xa ná kaa mar jan xniñi ñayiu ka dakande arpa n‑xiaʼan Ianyuux.
Ñayiu n‑ka ndaku nuu kɨt n‑kane nuu mar jan ka kuu‑i.
N‑ndaku‑i xa ñatu n‑ka nakuetu‑i nuu xa kaa ná kaa mee‑t.
N‑ndaku‑i xa ña n‑xe kondenee número kuu dɨu‑t teʼu‑i.
3 Ka xita‑i canción n‑chidotnuni Moisés,
se n‑xinokuechi nuu Ianyuux xiʼin canción kakuneʼe tkolelu.
Duʼa ka xita‑i:
Taa‑ro Ianyuux,
Ia kuu Xtoʼo‑da,
mee ni xa vaʼa kida‑n.
Kidandaa‑n ntdandituʼu xa kida‑n.
Xaxa mee‑n ntdandituʼu xa ñatu kuaʼa ñayiu xa kada‑i kida‑n.
Taxnuni‑n nuu ntdaa nación ñuñayiu.
Taxnuni‑n nuu ntdandituʼu xa io.
4 Xaxeʼe xa ii‑n xee kɨu yuʼu ñaʼa ntdaa ñayiu.
Te mayo‑i jaʼan xa ma ndadakaʼnu ñaʼa‑i.
Njuiin xiti ñayiu ntdantuʼu nación nuu‑n te nakuetu koio‑i,
chi jini koio‑i xa mee ni xa ndaa kada‑n kɨu na ndadandaa‑n kuechi‑i.
Ka kuu‑i,
ka xita‑i.
5 Nu n‑yaʼa xa n‑xini‑da xaʼa te n‑xini‑da xa nune veñuʼu andɨu.
Xiti veñuʼu jan n‑xini ntuku‑da xatnu n‑kidavaʼa Moisés.
Xatnu ijan ñuʼu tutu n‑kidakutu Ianyuux xiʼin ñayiu Israel na n‑kida tratu‑ia xiʼin‑i.
6 Veñuʼu ijan n‑ka kee uxa ángel kada uʼu ñayiu xiʼin xa io ñuñayiu.
Xniʼno‑ia daʼma linu io ndoo te diñu.
Duku pechu‑ia cinturón oro.
7 N‑xiaʼan ɨɨn kɨt dana kaa jan n‑uxa ángel ɨɨn ɨɨn koʼo oro.
Dajunkoio koio ángel,
ia xinokuechi nuu Ianyuux,
xa uʼu xñuʼu koʼo jan ñuñayiu xaxeʼe xa yo kiti ini Ianyuux,
Ia daa nga io te nɨkava nɨkuita kutuu‑ia.
8 Xaxeʼe xa ndii‑ia n‑kee ñuʼa nuu tuu‑ia xa taxnuni‑ia,
te n‑chitu ñuʼa jan xiti veñuʼu.
Ni ɨɨn mayo ndaku xa kɨu‑i veñuʼu jan.
Ndena xinokava xa kada uʼu uxa ángel jan ñayiu xiʼin xa io ñuñayiu,
ijan dada kɨu ñayiu.