N‑ka xita ɨɨn cientu uu diko koon mil ñayiu
14
Ijan dada n‑xini ntuku‑da xa nujuiin tkolelu jan Yuku Sión.
Ɨɨn cientu uu diko koon mil ñayiu xyuku nuu nujuiin‑tɨ.
Ntdaa ñayiu ijan xndenee tnee‑i dɨu‑t xiʼin dɨu Taa‑ro Ianyuux.
2 N‑teku‑da xa ndeʼe kayu andɨu.
Ná kuu xa junkoio ndute xika ɨɨn deʼva kaʼnu ɨɨn nuu dujun kuu.
Ná kuu xa kaʼndɨ hora ndeʼe kana dau kuu.
Dɨuni kuu ná kuu xa kande tɨtnɨ arpa.
3 N‑teku‑da xa ka nakuetu ñayiu ɨɨn ndudu xee nuu nukoo Ianyuux silla kaʼnu nuu xtuu nkoon kɨtɨ dana xndaa jan xiʼin nuu xyuku oko koon sexaʼnu ka kunxaʼu jan.
Mee ni se n‑xeen ñaʼa Ianyuux xa ku kuu‑s daʼya‑ia kutuu koio xiʼin‑ia.
Mee ni‑s ka kuaʼa xa nakuetu koio‑s ndudu xee ijan.
Ɨɨn cientu uu diko koon mil‑sɨ xa ntdaa‑s.
4 Ñatu n‑ka xini se xyuku ijan ñadɨʼɨ.
Xndaxio nini‑s.
Ndeka ñaʼa tkolelu jan nuu xeʼen‑tɨ.
N‑ka kaku‑s xa ku kuu koio‑s kuenda kɨu trɨu a ndeʼa ketuu neʼe xa kiʼna ka‑s nakueka ñaʼa Taa‑ro Ianyuux xiʼin tkolelu jan.
5 Ñayo se yaʼa ka xini xa jaʼan koio‑s tnuʼu vete chi xndaxio nini‑s.
N‑teku Sua xa n‑ka jaʼan uni ángel
6 Te n‑xini ntuku‑da ɨnka ángel xiko nde dava andɨu.
Juñaʼa‑ia nuu nandɨkaa nandituʼu ñayiu xndaxio ñuñayiu nax kada‑i xa nanitaʼu‑i.
Ná n‑jaʼan Ianyuux xa dananitaʼu‑ia ñayiu,
daa yaʼa,
te kutuu koio‑i xiʼin‑ia nɨkava nɨkuita.
7 Xee xa xee n‑jaʼan ángel.
Duʼa n‑jaʼan‑ia:
—Koo koio‑n xañuʼu nuu Ianyuux.
Ndadakaʼnu koio‑ia chi n‑xee hora ndadandaa‑ia kuechi‑n.
Mee‑ia n‑kidavaʼa andɨu,
ñuñayiu,
mar.
Dɨuni n‑xani ini‑ia xa kane ndute nuu ñuʼu.
8 Nu n‑yaʼa n‑jaʼan ángel yaʼa,
te n‑jaʼan ɨnka ángel:
—N‑naa Babilonia.
N‑naa Babilonia.
Ñuu kaʼnu n‑kuu.
Xaxeʼe ñayiu Babilonia n‑ka kida ñayiu ñuñayiu kuechi.
9-10 Ijan dada n‑jaʼan ángel kuu uni.
N‑jaʼan‑ia:
—Ñayiu na juejoon xa kuneʼe tnuni teʼu‑i a ndaʼa‑i tnaʼa tnuni neʼe kɨt ndeʼe n‑kane nuu mar jan te ndadakaʼnu‑i‑tɨ xiʼin xa kaa ná kaa mee‑t jan,
kiti ini Ianyuux nuu‑i te kada uʼu‑ia‑i.
Vichi ndaʼu yaʼa koio‑i.
Dakee‑ia‑i nuu azufri koko te kundeʼa ñaʼa ángel,
ia ka xinokuechi nuu‑ia.
Ii‑ia.
Dɨuni kundeʼa ñaʼa tkolelu jan.
11 Nduu xakuaa ndaʼu yaʼa koio‑i chi n‑ka ndadakaʼnu‑i kɨt ndeʼe n‑kane nuu mar jan xiʼin xa kaa ná kaa kɨt ijan xiʼin xaxeʼe xa n‑xe kondenee teʼu‑i a ndaʼa‑i tnuni tnaʼa tnuni neʼe kɨt n‑kane nuu mar jan.
Nɨkava nɨkuita ndaʼu yaʼa koio‑i.
12 Ñayiu n‑kida Ianyuux xa n‑ka nduu‑i ñayiu ii te ka jandixa‑i xa n‑taʼu tniu‑ia te ka kukanu ini‑i Jesús,
na kukanu ini naʼi‑i‑ia xa maxku duʼa yaʼa koio‑i.
13 Ijan dada n‑teku‑da xa n‑jaʼan ntuku nde andɨu.
Duʼa n‑jaʼan:
—Chidotnuni xaʼa:
“Ñayiu n‑ka kunduu xiʼin Ianyuux,
te n‑ka xiʼí‑i xaxeʼe xa n‑ka kukanu ini‑i Jesucristu,
naka taʼu kuu‑i” —kuu xa n‑jaʼan.
Te n‑jaʼan Espíritu Ianyuux:
—Joon,
ndaa.
Ndetatu koio‑i;
ma kada ka‑i tniu Ianyuux chi xá naʼa‑ia xa yo n‑ka kidatniu‑i xaxeʼe‑ia.
Taʼnde trɨu xiʼin uva
14 N‑xini ntuku‑da ɨɨn vikó kuixi.
Nuu vikó jan nukoo Ia kaa ná kaa ñayiu.
Ñuʼu corona oro dɨkɨ‑ia,
te neʼe‑ia ɨɨn yuchi uxu deen.
15 N‑xini ntuku‑da ɨnka ángel n‑kee veñuʼu andɨu.
Xee n‑kana‑ia nuu Ia nukoo nuu vikó jan.
Duʼa xiaʼan‑ia:
—Juan kaʼnde‑n trɨu kaa ñuñayiu xiʼin yuchi uxu‑n,
te nakueka‑n chi xa n‑yichi —kuu‑ia,
xiaʼan‑ia.
16 Te n‑xe kaʼnde Ia nukoo nuu vikó jan trɨu kaa ñuñayiu xiʼin yuchi uxu nundaʼa‑ia jan.
17 N‑kee ɨnka ángel veñuʼu io andɨu jan,
te dɨuni ɨɨn yuchi uxu deen neʼe‑ia.
18 Ijan dada n‑kee ɨnka ángel nuu io altar veñuʼu jan.
Ia ijan ñunuu ñuʼú koko nuu altar io andɨu,
te xee n‑kana‑ia nuu ɨnka ángel neʼe yuchi uxu deen jan.
Duʼa xiaʼan‑ia:
—Juan kaʼnde uva io ñuñayiu xiʼin yuchi uxu‑n chi xá n‑xichi.
19 Te n‑xe kaʼnde ángel neʼe yuchi uxu jan uva io ñuñayiu te n‑nataxnaʼa‑ia.
N‑dakee‑ia uva jan nuu kiʼni ñayiu xijan.
Xa n‑kiʼni‑ia uva jan kuu xa kiti ini Ianyuux nuu ñayiu.
20 N‑kiʼni‑ia uva jan yuʼu ñuu,
te n‑kee nɨñɨ nuu kiʼni ñayiu ñuu jan uva.
N‑nundodo nɨñɨ jan nuu ñuʼu,
te n‑xe xee nde yuʼu caballu nuu xkɨʼɨ freno.
Uni cientu kilómetro xakani n‑nundodo nɨñɨ jan.