Kɨtɨ ndeʼe n‑kane nuu mar xiʼin kɨtɨ ndeʼe n‑kane nuu ñuʼu
13
N‑xini ntuku‑da xa vax kane ɨɨn kɨtɨ ndeʼe nuu mar.
Uxa dɨkɨ‑t io,
te xndenee dɨu‑t ntdaa dɨkɨ‑t jan.
Tnuʼu ka xko jaʼan ñayiu xa jan kuiʼa‑i Ianyuux xiʼin xa kuiʼa jaʼan‑i‑ia yodotnuni dɨkɨ‑tɨ jan,
te xijan kuu dɨu‑t.
Dɨuni io uxi ndɨkɨ‑t,
te ntdaa ndɨkɨ‑t ñuʼu corona.
2 Ná kaa yɨʼɨ kaa kɨt ijan.
Ná kaa xeʼe oso kaa xeʼe‑t,
te kaa yuʼu‑t ná kaa yuʼu ngaʼa.
N‑kida dragón jan xa kada‑t ná kida mee‑t.
Dɨuni n‑kida dragón jan xa taxnuni kɨt ndeʼe n‑kane nuu mar jan nuu ntaka ñuu ñuñayiu.
3 Kaa ɨɨn dɨkɨ‑t jan xa yo ndeʼe n‑tnukueʼe,
ko ndvaʼa.
Nu n‑ka xini ñayiu ñuñayiu xa daa n‑yaʼa‑tɨ n‑ka yuʼu‑i,
te n‑ka xe kuitandijun‑i kɨt ijan.
4 N‑ka nakuetu ñayiu jan nuu dragón jan chi n‑kida‑t xa taxnuni kɨt ndeʼe n‑kane nuu mar jan.
Dɨuni n‑ka nakuetu‑i nuu kɨt n‑kane nuu mar jan.
N‑ka xiaʼan tnaʼa‑i:
—Ñayo ndaku ná ndaku‑t.
Mayo ndaku xa jantnaʼa‑i xiʼin‑t —ka kuu ñayiu jan.
5 Xaxeʼe dragón jan n‑jan kuiʼa kɨt ndeʼe n‑kane nuu mar jan Ianyuux.
Dɨuni kuiʼa n‑jaʼan‑t‑ia.
Dɨuni n‑taʼu tniu dragón jan xa taxnuni‑t ñuñayiu uu diko uu yoo.
6 N‑nukuita‑t jan kuiʼa‑t Ianyuux xiʼin nuu tuu‑ia.
Dɨuni kuiʼa n‑jaʼan‑t ntdaa xa xndaxio andɨu.
7 N‑taʼu tniu nuu‑t xa jantnaʼa‑t xiʼin ñayiu n‑kida Ianyuux xa n‑ka nduu‑i ñayiu ii,
te n‑ndaku‑t nuu‑i.
N‑kida dragón jan xa nandɨkaa nandituʼu ñayiu ñuñayiu taxnuni‑t nuu‑i.
8 N‑ka xe juiin xiti dava ñayiu xndaxio ñuñayiu nuu kɨtɨ n‑kane nuu mar jan,
te n‑ka nakuetu‑i nuu‑t.
Ñatu yodotnuni dɨu ñayiu ijan nuu libru yodotnuni dɨu ñayiu kutuu nɨkava nɨkuita.
Ñayiu xyodotnuni dɨu‑i nuu libru‑ia,
xyodotnuni dɨu‑i nde na n‑tuu ñuñayiu.
Libru tkolelu luchi n‑xiʼí yuchi kuu.
9 Xaxeʼe xa xnini‑n xa jaʼan‑r kunini vaʼa koio xa na kutnuni ini‑n.
10 Ñayiu taʼu xa kɨndiʼu‑i vekaa,
vekaa kɨndiʼu‑i.
Ñayiu taʼu xa kuú‑i yuchi,
yuchi kuú‑i.
Juini ndaʼu na yaʼa ñayiu ka kukanu ini Jesucristu,
na kukanu ini naʼi‑ia.
11 Ijan dada n‑xini ntuku‑da ɨnka kɨt ndeʼe vax kane nuu ñuʼu.
Uu ndɨkɨ‑t io te xndaa ndɨkɨ‑t ná xndaa ndɨkɨ carneru.
Tachi dragón jan neʼe‑t.
12 Kɨt ndeʼe n‑kane nuu mar jan kida xa taxnuni kɨt ndeʼe n‑kane nuu ñuʼu jan ná taxnuni mee‑t,
te kɨt ndeʼe n‑kane nuu ñuʼu jan n‑taʼu tniu xa ndadakaʼnu ñayiu ñuñayiu xiʼin ntdaa xa xndaxio ñuñayiu kɨt n‑kane nuu mar jan.
Kuu‑t kɨt ndvaʼa dɨkɨ‑t xa kaʼu n‑tnukueʼe.
13 N‑kida kɨt ndeʼe n‑kane nuu ñuʼu kueʼe milagru.
Nde xa dajuun‑t ñuʼú andɨu te xino nuu ñuʼu n‑kida‑t.
N‑ka xo ndeʼa ñayiu ñuñayiu xa n‑kida‑t xijan.
14 N‑kida‑tɨ milagru xa n‑dandaʼu‑t ñayiu ñuñayiu.
Te n‑xo ndeʼa kɨt ndeʼe n‑kane nuu mar jan.
N‑taʼu tniu kɨt ndeʼe n‑kane nuu ñuʼu jan nuu ñayiu ñuñayiu xa na kadavaʼa koio‑i ɨɨn xa kaa ná kaa kɨt ndeʼe n‑kane nuu mar jan.
Kɨt ndeʼe n‑kane nuu mar jan,
kaʼu n‑tnukueʼe ɨɨn dɨkɨ‑t,
ko ndito naʼi‑tɨ.
15 N‑taʼu tniu‑t nuu kɨt ndeʼe n‑kane nuu ñuʼu jan xa juñaʼa‑tɨ tachi xa n‑ka kidavaʼa ñayiu jan na kuaʼa na jaʼan xijan.
Dɨuni kɨt ndeʼe n‑kane nuu mar jan n‑taʼu tniu nuu kɨt ndeʼe n‑kane nuu ñuʼu jan xa na kaʼni‑t ntdaa ñayiu ña ndadakaʼnu xa kaa ná kaa mee‑t.
16 N‑taʼu tniu kɨt ndeʼe n‑kane nuu ñuʼu jan nuu ñayiu dakuu nga,
nuu ñayiu ndandɨʼɨ,
nuu ñayiu kuika,
nuu ñayiu ka kundaʼu,
nuu ñayiu ña yoo na xtoʼo,
nuu ñayiu kidatniu duʼa nuu xtoʼo‑i du xa na keé tnuni ndaʼa kuaʼa‑i a teʼu‑i tnaʼa tnuni neʼe‑t
17 xa na kuaʼa na jueen koio‑i xa ka ndoñuʼu‑i a xa diko‑i.
Mee ni ñayiu neʼe tnuni‑t jueen koio xa ka ndoñuʼu‑i a xa diko‑i.
Tnuni‑t kuu número.
Dɨuni kuu dɨu‑tɨ.
18 Diko ni ñayiu tuʼa tnuʼu ndichi te kaxi ini‑i kuaʼa kada‑i cuenta número kɨt ndeʼe n‑kane nuu mar jan chi numero ijan kuu número ñayiu.
Número‑tɨ kuu iñu cientu uni diko iñu.