Ñá nukoo andɨu xiʼin kɨtɨ kuu dragón
12
Ɨnka ntuku vuelta n‑dandeʼa ñaʼa Ianyuux ɨɨn xa n‑dandeʼa ñaʼa‑ia.
N‑xini‑da ɨɨn ñadɨʼɨ nukoo andɨu duku niʼno ñaʼa ngandii.
Vestido‑ña kuu‑ia.
Ñuʼu dɨkɨ‑ña ɨɨn corona ndenee uxi uu chudini,
te neñi ndodo‑ña yoo.
2 Xee kanaxiin‑ña xa xaxiaʼan xiti‑ña chi n‑xee hora kaku daʼya‑ña.
3 N‑kida ntuku Ianyuux xa n‑xini‑da ɨɨn xa io kaa.
N‑xini‑da xa nukoo ɨɨn dragón kaʼnu andɨu.
Kueʼe‑tɨ.
Uxa dɨkɨ‑t io te uxi ndɨkɨ‑t jan ñuʼu corona.
4 Io duʼan‑t te duʼan‑t jan n‑dataka dava chudini io andɨu.
N‑dajunkoio‑t chudini n‑dataka‑t jan ñuñayiu.
Yatni nuu nukoo ñadɨʼɨ jan nujuiin‑tɨ xa kaxi‑t daʼya‑ña hora na kaku‑i.
5 N‑kaku daʼya‑ña te seyɨɨ kuu‑s.
Ijan dada ndeka ángel daʼya‑ña juaʼan nuu nukoo Ianyuux nuu silla‑ia xa taxnuni‑s.
Ndeʼe kundeka‑s ñayiu ntdandituʼu nación ñuñayiu.
6 Nu n‑yaʼa n‑xajan‑ña daʼya‑ña n‑xino‑ña.
Juaʼan‑ña ɨɨn nuu ñayo io te ñatu nga juun dau.
Ijan kuu nuu n‑kida tuʼa Ianyuux xa kutuu‑ña.
Ijan juñaʼa ñayiu xa kax xa koʼo‑ña ɨɨn mil uu cientu uni diko kɨu.
7 Ijan dada n‑xini ntuku‑da xa jantnaʼa ángel nani Miguel xiʼin Kuiʼna n‑nduu dragón.
Dɨuni ka jantnaʼa ángel‑ia xiʼin ángel‑tɨ.
8 N‑ndaku Miguel xiʼin ángel‑ia nuu dragón xiʼin nuu ángel‑tɨ,
te ña n‑kuaʼa ka xa ndɨu‑tɨ xiʼin ángel‑tɨ andɨu.
9 N‑dajunkoio Miguel dragón jan xiʼin ángel‑tɨ ñuñayiu.
Dragón ijan kuu koo io nde tiempo xanaʼa nani Kuiʼna.
Dandaʼu‑tɨ ntdaa ñayiu io ñuñayiu.
10 N‑teku‑da xa xee n‑jaʼan andɨu.
Duʼa n‑jaʼan:
—N‑xee kɨu dananitaʼu Taa‑ro Ianyuux ñayiu.
Dɨuni n‑xee kɨu taxnuni‑ia xiʼin Cristu.
N‑xee kɨu taxnuni‑ia chi n‑dajungava Miguel kɨt kuu dragón n‑xo jaʼan nuu Ianyuux ndɨkɨu ndɨñuu xa n‑ka kida ñani‑ro kuechi.
11 Ña ndaku Kuiʼna xa dadaʼan‑i xa jɨʼɨn ñayiu ka kukanu ini Cristu andɨu xaxeʼe xa n‑xatu nɨñɨ tkolelu jan xiʼin xaxeʼe xa n‑ka jaʼan‑i xa n‑jaʼan‑ia nuu ñayiu.
N‑ka kukanu ini naʼi‑i Cristu juini n‑ka xaʼni ñaʼa ñayiu xaxeʼe‑ia.
Ña tuu nax n‑juun‑i vida‑i.
12 Na kudɨ ini ntdaa xa xndaxio andɨu vitna.
Naka ndaʼu yaʼa ñayiu xndaxio ñuñayiu xiʼin kɨtɨ xndaxio nuu mar chi n‑xino Kuiʼna ijan.
Yo kiti ini Kuiʼna chi xaku nga kɨu kada‑i xa kida‑i vaxi —kuu xa n‑jaʼan.
13 Nu n‑xini dragón jan xa n‑xino‑t ñuñayiu,
n‑chidonuu‑t ñá n‑xajan daʼya yɨɨ jan.
14 N‑xiaʼan Ianyuux nduu ndixi ɨɨn ñau kaʼnu ñá ijan xa na ndava‑ña xa na kuaʼa jɨʼɨn‑ña nuu ñayo io te ñatu nga juun dau nuu n‑kida tuʼa‑ia xa kutuu‑ña.
Ijan n‑kaku‑ña nuu dragón jan.
Ijan niʼi‑ña xa kaxi xa koʼo‑ña uni yodo kuia.
15 N‑kee ndute yuʼu dragón jan,
te n‑chitu‑té ɨɨn deʼva kaʼnu xa na tnene‑ña,
16 ko ña n‑tnene‑ña chi n‑ndata nuu ñuʼu te ijan juan keé nte n‑kee yuʼu dragón jan.
17 Xaxeʼe xa daa n‑kuu yo n‑kiti ini dragón nuu‑ña,
te n‑kee‑t.
Juaʼan‑t xa kada uʼu‑t dava ka daʼya‑ña xiʼin daʼya dana‑ña.
Ka kuu‑i ñayiu ka jandixa xa taʼu tniu Ianyuux,
te n‑ka jaʼan‑i nuu dava ka ñayiu xa n‑jaʼan Jesús.
18 N‑xee‑t nuu ñuʼu kuchi yuʼu mar te n‑xe juiin‑t ijan.