Uu se ka kuu testiu
11
N‑niʼi‑da ɨɨn vara kaa ná kaa vara xetniu‑ro xa tnɨɨ‑ro medida te n‑jaʼan ɨɨn xa n‑jaʼan:
—Ndojuiin.
Juan chikuʼa veñuʼu Ianyuux xiʼin altar,
te kaʼu‑n ñayiu ka xe kajan taʼu ijan,
2 ko maxku chikuʼa‑n nukeñuʼu chi ijan kuu kuenda ñayiu ña ka jandixa Ianyuux.
Ñayiu ña ka jandixa‑ia jan kada uʼu ñayiu io ñuu ii Ianyuux uu diko uu yoo.
3 Tundaʼa‑r uu seyɨɨ xa na jaʼan‑s xa n‑jaʼan‑ia nuu ñayiu ɨɨn mil uu cientu uni diko kɨu.
Kuiʼno‑s nduu‑s daʼma ndayu xkuiʼno ñayiu hora kukoʼyo ini‑i.
4 Kuenda kɨu nduu tnu olivo xiʼin nduu candrelu xtuu nuu tuu ruʼu,
Ia kuu xtoʼo ñuñayiu kuu nduu se yaʼa.
5 Ñayiu na jini uʼu nduu se yaʼa te ku kuu‑i xa kada uʼu‑i‑sɨ,
kee yañuʼu yuʼu‑s te teñuʼu‑s‑yɨ,
te kuú‑i.
Duʼa yaʼa ñayiu na kani ini xa kada uʼu‑i‑sɨ.
6 Kada‑s nduu‑s xa mee ni xa ndii ntdaa kɨu jaʼan‑s tnuʼu Ianyuux nuu ñayiu.
Ma juun dau ntdaa kɨu ijan.
Dɨuni ndada‑s ndute nɨñɨ́.
Hora kuu anu‑s nduu‑s xa kada‑s xa ndaʼu yaʼa ñayiu ñuñayiu,
hora ijan daa kada‑s.
7 Hora na daxinokava‑s xa jaʼan‑s nuu ñayiu xa n‑jaʼan Ianyuux,
kane ɨɨn kɨt ndeʼe nua nuu n‑kane Apolión te jantnaʼa‑tɨ xiʼin‑s.
Ndaku‑tɨ nuu‑s te nduu‑s kaʼni ñaʼa‑tɨ.
8 Kavatuu yɨkɨ kuñu‑s ichi kaʼnu ñuu kaʼnu nuu n‑ka xatakaa dika‑s Jesús,
Ia kuu xtoʼo‑ro.
Ñuu ijan ka dandee ñayiu Sodoma xiʼin Egipto.
9 Uni yodo kɨu kavatuu yɨkɨ kuñu‑s ijan,
te nandɨkaa ñayiu ñuñayiu kundeʼa ñaʼa.
Mayo‑i juejoon xa nkonduxi‑s.
10 Hora na kuú nduu se ijan yo kuvete koio‑i.
Yo kudɨ ini koio‑i chi ma kuu ka xa kada uʼu ñaʼa nduu se ijan.
Juña tnaʼa koio nga‑i ɨɨn xa juña tnaʼa nga‑i xaxeʼe xa n‑ka xiʼí‑s.
11 Kɨu kuu koon nadandoto Ianyuux nduu se ijan.
Ndokoo koio‑s te ñayiu kundeʼa ñaʼa yo yuʼu koio‑i.
12 Ijan dada n‑kida Ianyuux xa n‑teku ntuku‑da xa n‑jaʼan ɨɨn xa n‑jaʼan nde andɨu nuu nduu se ijan:
—Ta ki kaa koio yaʼa.
Te ndeka ñaʼa vikó juan ndaa andɨu te n‑ka xo ndeʼa ñaʼa se ka xini uʼu ñaʼa.
13 Ndeʼe n‑tnaa hora ijan.
Xaxeʼe xa ndeʼe n‑kɨdɨ ñutnaa jan ñuu ijan n‑naa ɨɨn parti‑i.
Uxa mil ñayiu n‑xiʼí.
Yo n‑ka yuʼu ñayiu ña n‑ka xiʼí xa daa n‑kuu,
te n‑ka najaʼan‑i Ia tuu andɨu.
14 N‑yaʼa xa ndaʼu n‑ka yaʼa ñayiu vuelta kuu uu,
te ma kukuee xa ndaʼu yaʼa koio‑i ɨnka ntuku vuelta.
Strompeta kuu uxa
15 N‑tɨu ángel kuu uxa strompeta‑ia,
te n‑teku‑da xa xee n‑ka jaʼan andɨu.
Duʼa ka jaʼan:
Ñatuka taxnuni se n‑ka taxnuni,
chi Ianyuux xiʼin Jesucristu taxnuni ñuñayiu vitna.
Nɨkava nɨkuita taxnuni koio‑ia.
16 N‑ka xe juiin xiti oko koon sexaʼnu ka kunxaʼnu xtuu nuu silla‑s yatni nuu nukoo silla Ianyuux jan,
te n‑ka nakuetu‑s nuu‑ia.
17 Duʼa n‑ka jaʼan‑s xa n‑ka nakuetu‑s nuu‑ia:
Taa‑ro Ianyuux,
Xtoʼo‑da ntdaa‑da kuu ñaʼa.
Na kutaʼu‑da xa taxnuni‑n nuu ntdandituʼu xa io.
Ñayo taxnuni nuu‑n.
Daa nga io‑n.
N‑kixeʼe‑n xa taxnuni‑n nuu ñayiu jandixa ñaʼa vitna.
18 N‑xee hora ndadandaa‑n kuechi dava ñayiu nación ñuñayiu ka kiti ini nuu‑n,
chi kiti ini‑n nuu‑i tuku.
Dɨuni n‑xee hora ndadandaa‑n kuechi ñayiu n‑ka xiʼí te n‑ka nandoto‑i.
N‑xee kɨu dananitaʼu‑n se n‑ka xinokuechi nuu‑n,
se n‑ka xo jaʼan xa n‑jaʼan‑n nuu ñayiu.
N‑xee kɨu nanitaʼu ñayiu n‑kida‑n xa n‑ka nduu‑i ñayiu ii.
Xndaxio ñayiu yaʼa xañuʼu nuu‑n.
Dava‑i ndandɨʼɨ,
te dava‑i ka kuu ñayiu dakuu nga.
Te danaa‑n ñayiu n‑ka danaa ntaka ñuu io ñuñayiu.
Ka kuu sexaʼnu ka kunxaʼnu jan.
19 Ijan dada n‑xini‑da xa nune veñuʼu Ianyuux io andɨu,
te xiti veñuʼu jan n‑xini‑da xatnu n‑kidavaʼa Moisés.
Xatnu ijan kaa niʼno tutu n‑kidakutu Ianyuux xiʼin ñayiu Israel xa n‑kida‑ia xiʼin‑i ɨɨn tratu.
N‑xeyeʼe te ndeʼe n‑kee taxa.
Ndeʼe n‑kaʼndɨ.
Dɨuni n‑kana dau.
Ndeʼe n‑tnaa te ndeʼe n‑juun ñɨñɨ.