Rollo luchi tutu yodotnuni nundaʼa ángel
10
N‑xini‑da ɨnka ángel kaa xa yo ndaku‑ia vax juun andɨu.
Ndido tkoyaʼnde dɨkɨ‑ia.
Koko nuu‑ia ná koko ngandii te xndaa xeʼe‑ia xiʼin kajan‑ia ná kaa ñuʼú koko.
2 Nundaʼa‑ia rollo luchi tutu n‑nandɨka.
N‑xino‑ia ñuñayiu,
te n‑xani‑ia xeʼe kuaʼa‑ia nuu mar,
te n‑xani‑ia xeʼe datni‑ia nuu ñuʼu yichi.
3 Xee n‑kana‑ia.
Ná kuu xa kau ngaʼa kuu xa n‑kana‑ia.
Nu n‑kana‑ia,
te uxa vuelta n‑kana dau.
4 Nu n‑teku‑da xijan,
n‑juini‑da xa chidotnuni‑da xa yaʼa,
ko ña n‑kuu chi n‑teku‑da xa n‑jaʼan andɨu.
Duʼa n‑jaʼan:
—Maxku chidotnuni‑n tnuʼu n‑teku‑n.
Anu ni mee‑n kunaʼa —kuu xijan.
5 N‑ndoneʼe ángel n‑xini‑da nujuiin nuu ndute xiʼin nuu ñuʼu jan ndaʼa kuaʼa‑ia andɨu.
6 N‑chinaa‑ia Ianyuux xa ma kukuee ka xa yaʼa xa io xa yaʼa.
N‑chinaa‑ia mee Ianyuux xa kuu‑ia Ia daa nga io,
Ia nɨkava nɨkuita kutuu,
Ia n‑kidavaʼa andɨu,
ñuñayiu,
mar xiʼin ntdaa xa io andɨu,
ntdaa xa io ñuñayiu,
ntdaa xa io mar du.
7 Ma kukuee ka chi na xee hora tɨu ángel kuu uxa strompeta‑ia,
jɨn tnaʼa xa ñu ini Ianyuux xa kada‑ia.
Idii mee‑ia xini xa yaʼa.
Jɨn tnaʼa xa n‑jaʼan‑ia nuu se n‑ka jaʼan xa n‑jaʼan‑ia nuu ñayiu xa n‑ka xinokuechi‑s nuu‑ia.
8 N‑teku ntuku‑da xa n‑jaʼan nde andɨu ɨnka vuelta.
Dɨuni xa n‑jaʼan xa kiʼna nuu n‑jaʼan ntuku.
Duʼa n‑jaʼan:
—Juan jeʼen rollo luchi nandɨka nundaʼa ángel nujuiin nuu mar xiʼin nuu ñuʼu jan —kuu xijan.
9 N‑xetuʼa‑da nuu nujuiin ángel jan te n‑xijan‑da rollo luchi tutu n‑nandɨka jan,
te n‑jaʼan‑ia nuu‑da:
—Kaxi rollo ya.
Ná vidi ndudi ñuñu vidi hora na kɨu yuʼu‑n,
ko hora na xino xiti‑n ndu ua —kuu‑ia.
10 N‑tnɨɨ‑da rollo luchi n‑nandɨka nundaʼa ángel jan te n‑xaxi‑da.
Hora n‑xadi‑da vidi ná vidi ndudi ñuñu,
ko nuu n‑xino xiti‑da,
n‑ndu ua.
11 Te n‑ka jaʼan ángel jan nuu‑da:
—Kidayɨka‑i xa jaʼan ntuku‑n tnuʼu Ianyuux nuu ntaka ñayiu ñuñayiu.
Jaʼan‑n nuu nandɨkaa nandituʼu ñayiu tnuʼu‑ia.
Nani jaʼan‑n nuu ñayiu ñatu taxnuni,
dani jaʼan‑n nuu se ka taxnuni.