9
N‑tɨu ángel kuu oʼon strompeta‑ia te n‑xini ntuku‑da xa jungava ɨɨn chudini ñuñayiu.
Nundaʼa‑tɨ ndakaa xa najaan‑tɨ yuʼu nua ña xe ndɨʼɨ.
2 N‑najaan‑tɨ yuʼu nua jan te n‑kane ñuʼa yuʼu‑i.
Xaku kuu xa nuñuʼa ɨɨn xitnu kaʼnu.
Ñuʼa ijan n‑kida xa n‑kunee nuu ngandii.
Dɨuni n‑kida‑i xa n‑kunee ñuñayiu.
3 Nuu ñuʼa jan n‑ka kee langosta,
te n‑ka xitendodo‑tɨ nituʼu ñuñayiu.
Ná ndeʼe tduʼan io ñuñayiu xa tuu ñaʼa‑t,
daa ndeʼe langosta jan xa kaxiaʼan‑t.
4 N‑taʼu tniu nuu‑tɨ xa ma kaxi‑tɨ yua,
ni ite,
ni kuʼu,
ni yutnu.
Ni ɨɨn xa kuii io ñuñayiu ma kaxi‑tɨ.
Diko ni ñayiu ñatu xndenee sellu Ianyuux tnee‑i kada uʼu‑t.
5 Dɨuni n‑taʼu tniu nuu‑t xa ma kaʼni‑tɨ ñayiu ijan,
diko ni na kada uʼu ñaʼa‑tɨ oʼon yoo.
Ná xatu ñɨɨ‑ro xa tuu ñaʼa tduʼan daa xatu ñɨɨ ñayiu kaxi langosta jan.
6 Tiempu ijan nduku ini ñayiu xa kuú‑i,
ko ma niʼi‑i mudu kuú‑i.
“Vaʼa ka nu na kuú‑ro”,
kachi koio ñayiu ijan,
ko ma kuu xa kuú‑i.
7 Xndaxio tuʼa langosta jan ná xndaxio tuʼa caballu ka xkodo soldado jɨn jantnaʼa.
Xñuʼu dɨkɨ langosta jan corona.
Ná xndaa corona oro xndaa.
Ná xndaa nuu ñayiu xndaa nuu‑t.
8 Ná kaa idi dɨkɨ ñadɨʼɨ kaa idi dɨkɨ‑tɨ.
Ná xndaa nuʼu ngaʼa xndaa nuʼu‑t.
9 Ná kaa kaa ndiʼu pechu soldado kaa xa ndiʼu pechu‑tɨ.
Ná kundaʼnde xeʼe caballu xñuʼu carreta xa ka kendava‑t hora ka jantnaʼa soldado,
daa kuu xa ka ndava langosta jan.
10 Kaa duʼan‑t ná kaa duʼan tduʼan,
te dɨuni io iñu nuu duʼan‑t ná iñu nuu duʼan tduʼan.
Oʼon yoo tuu‑tɨ ñayiu.
11 N‑kane ɨɨn ángel nua ña xe ndɨʼɨ jan,
te ángel ijan taxnuni nuu‑tɨ.
Abadón nani ángel ijan hebreu,
te Apolión nani‑i griegu.
12 Ijan te n‑teku ka‑da xa n‑jaʼan:
—N‑yaʼa xa n‑ka kida uʼu langosta ñayiu,
ko uu ka vuelta ndaʼu yaʼa koio‑i.
13 N‑tɨu ángel kuu iñu jan strompeta‑ia,
te n‑teku‑da xa n‑jaʼan ɨɨn xa n‑jaʼan.
Nu xndodo nkoon ndɨkɨ yuʼu altar oro io yatni nuu tuu Ianyuux,
n‑jaʼan xijan,
te n‑teku‑da.
14 Xiaʼan xijan nuu ángel kuu iñu neʼe strompeta jan:
—Dayaa nkoon ángel xndijun yatni yuʼu ndute xika deʼva kaʼnu nani Éufrates.
15 Te n‑ka yaa nkoon ángel jan xa kaʼni koio‑i ñayiu kɨu ijan.
Ntnaʼa ɨɨn cientu mil ñayiu io ñuñayiu n‑xiʼí oko uxi uni mil‑yɨ.
16 N‑teku‑da xa uu cientu millón soldado xyodo caballu xyuku ijan.
17 Duʼa xndaa caballu xiʼin soldado n‑kida Ianyuux xa n‑xini‑da.
Duʼa xndaa pechu‑tɨ xiʼin pechu soldado jan.
Ná kueʼe ñuʼú koko kueʼe pechu‑tɨ xiʼin pechu‑s,
te ná kuaan azufri kuaan pechu‑tɨ xiʼin pechu‑s.
Dɨuni tndee.
Ná xndaa dɨkɨ ngaʼa xndaa dɨkɨ caballu jan.
Kee ñuʼú,
ñuʼa,
azufri yuʼu‑t.
18 Xaxeʼe xa n‑kee ñuʼú,
ñuʼa xiʼin azufri yuʼu caballu jan n‑ka xiʼí ñayiu.
Ntnaʼa ɨɨn cientu mil ñayiu io ñuñayiu n‑xiʼí oko uxi uni mil‑yɨ.
19 Yuʼu‑tɨ xiʼin duʼan‑tɨ n‑kida uʼu ñayiu.
Ná xndaa koo xndaa duʼan‑tɨ,
te dɨkɨ koo jan n‑kida uʼu ñayiu.
20 Ñayiu ña tuu nax n‑ka kida ñaʼa yuʼu‑tɨ xiʼin duʼan‑t,
ña n‑ka natu ini‑i xa n‑ka kida‑i kuechi.
Ñayo‑i n‑ka natu ini xa xjuiin xiti‑i nuu ntaka xaloko xiʼin xa ka xko nakuetu‑i nuu‑i.
Ñayo‑i n‑ka natu ini xa xjuiin xiti‑i nuu santo oro,
nuu santo plata xiʼin nuu santo bronce.
Ni ña n‑ka natu ini‑i xa xjuiin xiti‑i nuu yuú xiʼin nuu yutnu ka kuu ianyuux‑yɨ.
Dɨuni ñayo‑i n‑ka dandoo xa ka xko nakuetu‑i nuu xijan.
Ñatu xndito xijan chi ñatu teku‑i,
ni ñatu xika‑i.
21 Dɨuni ña n‑ka natu ini ñayiu jan xa ka xaʼni‑i ndɨyɨ,
ni ña n‑ka natu ini‑i xa ka chibruju‑i ñayiu,
ni ña n‑ka natu ini‑i xa xndaa‑i xiʼin ñayiu ña n‑ka tnundaʼa xiʼin‑i,
ni ña n‑ka natu ini‑i xa ka duʼu‑i.