N‑ndata ñua nuu ndenee sellu kuu uxa
8
N‑ndata ntuku Ia kuu tkolelu jan nuu ndenee sellu kuu uxa.
Ijan te nanii nga n‑xiñi andɨu naxa dava hora.
2 Ijan dada n‑xini‑da uxa ángel xniñi nuu Ianyuux te nɨ uxa‑ia n‑ka niʼi ɨɨn ɨɨn strompeta.
3 Ijan dada n‑xee ɨnka ángel neʼe ɨɨn censariu oro.
N‑nujuiin‑ia yatni altar io ijan.
N‑niʼi‑ia kueʼe duxa xa daka‑ia xiʼin duxa n‑ka tnaa ntdaa ñayiu n‑kida Ianyuux xa n‑ka ndunini‑i xiti censariu jan hora ka xijan taʼu‑i nuu‑ia.
N‑xajan ndodo‑ia xijan nuu altar oro ndeʼa tnaʼa xiʼin silla kaʼnu jan.
4 Yatni nuu tuu Ianyuux n‑kane ñuʼa censariu neʼe ángel,
ia xinokuechi nuu‑ia.
Nɨni kane ñuʼa jan najaʼan Ianyuux tnuʼu ka xko jaʼan ntdaa ñayiu n‑kida‑ia xa n‑ka nduu‑i ñayiu ii hora ka xko xijan taʼu‑i nuu‑ia.
5 N‑dakeé ángel jan ñuʼu tkua yodo yuku nuu altar censariu jan,
te n‑dajunkoio‑ia ñuʼu jan ñuñayiu.
Ndeʼe n‑kaʼndɨ,
te n‑kana dau.
N‑xeyeʼe.
N‑kee taxa te ndeʼe n‑kɨdɨ ñutnaa ñuñayiu.
Uxa strompeta
6 N‑ka ndoneʼe uxa ángel xneʼe strompeta jan strompeta jan xa tɨu koio‑ia.
7 N‑tɨu ɨɨn‑ia strompeta‑ia,
te n‑xini‑da ñɨñɨ xiʼin ñuʼú daka nɨñɨ.
Te n‑dajunkoio‑ia xijan ñuñayiu.
N‑kayu ɨɨn parti ñuñayiu te n‑kaku dava ka.
Ntnaʼa ɨɨ́n yutnu io ñuñayiu n‑naa uni‑tnu.
N‑kayu ntdaa ite,
kuʼu,
yua du.
Ni ɨɨn xaʼa ñatu n‑kaku.
8 N‑tɨu ɨnka ángel strompeta‑ia te n‑dajungava‑ia ɨɨn tnduu kaʼnu koko nuu mar.
Ɨɨn parti mar nduu nɨñɨ,
te dava n‑kaku.
9 Ntnaʼa ɨɨ́n kɨt io mar,
n‑xiʼi uni‑tɨ.
Ntnaʼa ɨɨ́n barcu xika nuu mar n‑ka naa uni‑i te dava‑i n‑ka kaku.
10 N‑tɨu ángel kuu uni strompeta‑ia te jungava chudini kaʼnu koko ná koko ɨɨn itikava kaʼnu ñuñayiu.
Ntnaʼa ɨɨ́n deʼva nuu xika ndute ñuñayiu n‑xino ɨɨn parti‑tɨ uni deʼva jan,
te ña tuu nax n‑yaʼa dava ka deʼva.
Dɨuni n‑xino ntaka ɨnka parti‑tɨ ntaka nuu kane ndute.
11 Ajenjo nani chudini ijan.
N‑ku ua ndute nuu n‑xino ntaka pedazo chudini jan.
Yo kueʼe ñayiu n‑ka xiʼí xaxeʼe xa n‑ka xiʼi‑i ndute ijan.
12 N‑tɨu ángel kuu koon strompeta‑ia te n‑tɨu ɨɨn parti ngandii.
N‑tɨu ɨɨn parti yoo.
Dɨuni n‑tɨu ɨɨn parti ntaka chudini.
N‑kunee ɨɨn parti nuu ngandii te dava nduu nga n‑ndii.
Dani n‑kunee ɨɨn parti nuu yoo xiʼin ntaka chudini,
te ñatuka n‑ndii‑ia xiʼin‑tɨ xakuaa.
13 N‑xini ntuku‑da ɨɨn ñau xiko dava andɨu.
Xee jaʼan‑tɨ.
Duʼa n‑jaʼan‑tɨ:
—Naka ndaʼu yaʼa koio ñayiu io ñuñayiu.
Naka ndaʼu yaʼa koio ñayiu io ñuñayiu.
Naka ndaʼu yaʼa koio ñayiu io ñuñayiu chi tɨu koio uni ka ángel strompeta‑ia —kuu‑t.