Ɨɨn cientu uu diko koon mil daʼya dana Israel n‑xe kondenee sellu tnee
7
Nu n‑yaʼa ntdaa xaʼa,
n‑xini‑da koon ángel,
ia ka xino kuechi nuu Ianyuux.
Xniñi‑ia nkoon lado ñuñayiu xa xndiʼu‑ia nuu tachi xa maxku kane‑i nuu ñuʼu,
ni nuu mar,
ni xa maxku dakanda‑i ni ɨɨn yutnu io ñuñayiu.
2 Te n‑xini‑da ɨnka ángel do nu kane ngandii.
Neʼe‑ia sellu Ianyuux ndixa.
Xee n‑kana‑ia nuu nkoon ángel n‑ka xe konetniu xa kada dañu‑ia ñuʼu yichi xiʼin mar.
Duʼa n‑jaʼan‑ia:
3 —Maxku ñaʼa kada koio‑n ñuʼu xiʼin mar xiʼin yutnu nde na tenee koio‑r sellu Taa‑ro Ianyuux tnee ñayiu ka xinokuechi nuu‑ia.
4 Te n‑teku‑da nadaa ñayiu nkondenee sellu tnee‑i.
Ɨɨn cientu uu diko koon mil ñayiu kuu daʼya dana Israel n‑ka xe kondenee sellu tnee.
5 Uxi uu mil daʼya dana Judá,
uxi uu mil daʼya dana Rubén,
uxi uu mil daʼya dana Gad,
6 uxi uu mil daʼya dana Aser n‑ka xe kondenee sellu teʼu.
Dɨuni n‑ka xe kondenee sellu teʼu uxi uu mil daʼya dana Neftalí xiʼin uxi uu mil daʼya dana Manasés,
7 uxi uu mil daʼya dana Simeón,
uxi uu ka mil daʼya dana Leví xiʼin uxi uu mil daʼya dana Isacar.
8 Dani n‑ka xe kondenee sellu teʼu uxi uu mil daʼya dana Zabulón,
uxi uu mil daʼya dana José,
xiʼin uxi uu mil daʼya dana Benjamín du.
Kueʼe xa kueʼe ñayiu xniʼno daʼma kuixi
9 Nu n‑yaʼa xaʼa,
n‑xini ntuku‑da xa xyuku ntdantuʼu ñayiu ñuu ñuñayiu nuu Ia nukoo nuu silla kaʼnu xiʼin nuu tkolelu.
Nandɨkaa ñayiu xyuku.
Kueʼe‑i xa kueʼe‑i xyuku.
Mayo kundee kaʼu‑i‑yɨ.
Ntdaa‑i xniʼno daʼma kuixi te xnundaʼa‑i ñuu.
10 Xee ka kana‑i ntdaa‑i.
Duʼa ka kana‑i:
N‑dananitaʼu ñaʼa Taa‑ro Ianyuux,
Ia nukoo nuu silla kaʼnu.
N‑dananitaʼu ñaʼa tkolelu.
11 N‑ka naduku nduu ángel,
ia ka xinokuechi nuu Ianyuux sexaʼnu ka kunxaʼnu jan.
Sexaʼnu jan n‑ka naduku nduu nkoon kɨt dana xndaa jan,
te kɨt ijan n‑ka naduku nduu silla kaʼnu jan.
N‑ka xe juiin xiti ángel jan,
te n‑ka ndadakaʼnu‑ia Ia nukoo nuu silla kaʼnu jan.
12 Ka jaʼan‑ia:
Daa na koo.
Na nakuetu‑ro nuu Taa‑ro Ianyuux.
Na ndadakaʼnu‑ro‑ia.
Na najuen tnuʼu‑ro‑ia,
chi xini‑ia ntdandituʼu xa yaʼa ñuñayiu xiʼin xa yaʼa andɨu.
Na ɨɨn xa ma kada‑ia.
Na juñaʼa‑ro xa n‑ka kutaʼu‑ro nuu‑ia.
Na taxnuni‑ia nuu ntdandituʼu ñuu.
Daa na ku kuu nɨkava nɨkuita.
Ka kuu ángel jan.
13 Ijan dada n‑xijan tnuʼu ñaʼa ɨɨn sexaʼnu kunxaʼnu jan:
—¿Jundu ka kuu ñayiu xniʼno daʼma kuixi ya te ndexu vaxi koio‑i?,
xani ini‑n u.
14 —Mee nga‑n naʼa,
Dito —kuu‑da,
xiaʼan‑da.
Te n‑kachitnuʼu ñaʼa‑s:
—Ñayiu yaʼa kuu ñayiu yo ndaʼu n‑ka yaʼa xa n‑ka kida uʼu ñaʼa ñayiu xaxeʼe xa n‑ka kukanu ini‑i Jesucristu.
N‑ka nakate niʼno‑i daʼma‑i nuu nɨñɨ tkolelu xa n‑ka ndadakɨyɨ‑i daʼma‑i.
15 Xijan kuu xa xyuku‑i nuu nukoo silla kaʼnu nuu nukoo Taa‑ro Ianyuux.
Ka xinokuechi‑i nuu‑ia xiti veñuʼu‑ia nduu xakuaa.
Ñunuu‑ia‑i xa maxku ñaʼa yaʼa koio‑i.
16 Mayo ka‑i kojon,
ni mayo ka‑i yichi ndute,
Ni ma teñuʼu ñaʼa ka ngandii;
Ma ndaʼu ka yaʼa‑i nuu kaʼni ngandii.
17 Ma duʼa ka yaʼa koio‑i chi junuu ñaʼa tkolelu iin ndodo silla kaʼnu.
Na ñunuu ñayiu tkachi‑i junuu‑ia‑i.
Kandeka ñaʼa‑ia jɨʼɨn nuu kane ndute koʼo‑i xa kundito‑i nɨkava nɨkuita.
Kada Ianyuux xa ma ndaʼi ka‑i —kuu sexaʼnu jan nuu‑da.