Vax kuyatni kɨu kixi ntuku Jesús ɨnka vuelta ñuñayiu
22
Ijan dada n‑dandeʼa ñaʼa ángel jan ndute kɨndɨ xika deʼva.
Kee‑té kaʼa silla nuu nukoo Ianyuux xiʼin Jesús xa ka taxnuni‑ia.
Ndute koʼo‑ro xa kutuu‑ro nɨkava nɨkuita xiʼin‑ia kuu‑té.
2 Dava ichi kaʼnu xiti ñuu jan niʼno deʼva nuu xika ndute jan.
Nduu lado yuʼu deʼva jan nukoo ɨɨn yutnu juun xavidi kaxi‑ro xa kutuu‑ro xiʼin Ianyuux nɨkava nɨkuita.
Ntnaʼa yoo juun xavidi‑tnu.
Vaʼa vixi‑tnu jan xa mayo ka ñayiu ntakantuʼu nación tnaʼa kueʼe.
3 Ijan mayo ñayiu jan uʼu ɨnka ñayiu.
Ijan kuu nuu xtuu Ianyuux xiʼin tkolelu silla‑ia,
te nakuetu koio ñayiu ka xinokuechi nuu‑ia nuu‑ia.
4 Kundeʼa ñayiu jan‑ia te kundenee dɨu‑ia tnee‑i.
5 Ñatu kunee ijan.
Ma juetniu ka ñayiu kutuu ijan candil,
ni ñatu ndoñuʼu‑i ngandii chi mee Ianyuux ndii ijan.
Nɨkava nɨkuita taxnuni koio ñayiu kutuu ijan.
6 Te n‑jaʼan ka‑ia nuu‑da:
—Na jandixa ñayiu ntdaa xaʼa chi xandaa xakuiti xa jɨn tnaʼa.
Xandaa kuu.
Ia n‑xian tnuʼu se n‑ka jaʼan nuu ñayiu xa n‑jaʼan Ianyuux n‑jaʼan nuu‑r nax koo.
Kuu‑r ia xinokuechi nuu‑ia.
N‑jaʼan‑ia xa kachitnuʼu ñaʼa‑r ntdaa‑n xa ka kuu‑n ñayiu ka xinokuechi nuu‑ia nax yaʼa ñuñayiu.
Xa vax kuyatni xa yaʼa xaʼa.
7 Te n‑jaʼan ka ángel jan nuu‑da:
—N‑jaʼan Jesús nuu‑r:
“Kunaʼa xa xá n‑kuyatni xa jɨʼɨn ntuku‑r ñuñayiu.
Taʼu kuu koio ñayiu jandixa tnuʼu xyodotnuni nuu tutu tuniʼno yaʼa” —kuu ángel jan.
8 Daña Sua,
n‑teku‑da ntdaa xaʼa te n‑xini‑da ntdaa xa n‑dandeʼa ñaʼa ángel jan.
Nu n‑yaʼa xaʼa,
n‑xe juiin xiti‑da xeʼe‑ia xa na nakuetu‑da nuu‑ia.
9 Te n‑jaʼan‑ia nuu‑da:
—Ñaʼa,
maxku daa kada‑n chi dɨuni ka xinokuechi‑r nuu Ianyuux ná ka xinokuechi ndoʼo xiʼin se ka jaʼan nuu ñayiu xa n‑jaʼan Ianyuux xiʼin ntdaa ñayiu ka jandixa xa n‑xe kodotnuni nuu tutu kidavaʼa‑n de.
Ñani‑n ka kuu se ka jaʼan tnuʼu‑ia.
Nuu Ianyuux juiin xiti,
te nakuetu‑n.
10 ʼMaxku tenee tnaʼa‑n tutu n‑kidavaʼa‑n de ni maxku kuedi‑n sellu chi vax kuyatni vax kuvii xa jɨn tnaʼa ntdaa xa n‑xe kodotnuni.
11 Ñayiu ka kida xaneʼe xayichi,
daa na kada naʼi‑i.
Ñayiu dakuido datau ka anu‑i,
na dakuido datau naʼi anu‑i.
Ñayiu ka kida xavaʼa te ka jandixa‑i xa n‑jaʼan Ianyuux,
na jandixa naʼi‑i xa n‑jaʼan‑ia —kuu‑ia.
12 Ijan dada n‑jaʼan Jesús nuu‑da:
—Kunaʼa xa vax kuyatni kɨu naxee‑r.
Te nudɨɨn nudɨɨn juñaʼa‑r taʼu ñayiu según nax n‑ka kida‑i ɨɨn ɨɨn‑i.
13 Ruʼu kuu Ia daa nga io te kutuu‑r nɨkava nɨkuita.
14 Naka taʼu ñayiu kɨu nuu ndii yeʼe ñuu xee ya,
chi xá n‑ka nakate‑i daʼma‑i.
Kɨu koio‑i,
te kaxi koio‑i xavidi juun yaʼa te kutuu‑r xiʼin‑i nɨkava nɨkuita.
15 Yata nama naduku nduu ñuu yaʼa ndoo koio ñayiu ka kida xaloko xaduʼa,
ñayiu chibruju ñayiu,
seyɨɨ xiʼin ñadɨʼɨ xndaa xiʼin ñayiu ñatu n‑tnundaʼa xiʼin‑s,
ñayiu n‑xaʼni ndɨyɨ,
ñayiu ka ndadakaʼnu ianyuux n‑ka kidavaʼa mee‑i,
ntdaa ñayiu unu vete du.
Mayo‑i kɨu ñuu xee ya.
16 ʼRuʼu n‑tundaʼa ángel,
ia xinokuechi nuu‑r xa kachitnuʼu ñaʼa‑ia ndoʼo xiʼin ntdaa ka ñayiu ka kukanu ini ñaʼa nax yaʼa.
Ruʼu kuu Jesús,
te kuu‑r daʼya dana David.
Kuenda kɨu tkɨun xino hora vax tuu xa ndeʼe ndii‑t kuu‑r.
17 Jaʼan Espíritu‑r nuu‑r:
“Jɨʼɨn‑n ñuñayiu.”
Dɨuni ka xko jaʼan ñayiu ka kukanu ini ñaʼa nuu‑r:
“Ndixi‑n ñuñayiu.”
Kuenda kɨu dichi tnundaʼa xiʼin‑r ka kuu ñayiu jan.
Na jaʼan ñayiu kunini tnuʼu n‑jaʼan‑r‑ya:
“Ndixi‑n.”
Ñayiu yichi ndute,
na kixi‑i yaʼa xa na koʼo‑i ndute juñaʼa‑r xa na kutuu‑i nɨkava nɨkuita,
te kutuu‑r xiʼin‑i.
Ña tuu nax chiyaʼu‑i —kuu Jesús,
n‑jaʼan‑ia.
18 Te n‑jaʼan ka ángel ijan nuu‑da:
—Juñaʼa‑n nuu ntdantuʼu ñayiu kunini a kaʼu tnuʼu yodotnuni nuu tutu n‑kidavaʼa‑n de xa maxku chidotnuni ka‑i ɨnka tnuʼu.
Nux daa na kada‑i ndaʼu ka yaʼa‑i dada xa yaʼa koio ñayiu kakuneʼe libru dian.
19 A ndeda ñayiu na ndada ndoo tnuʼu yodotnuni nuu libru dian ma juejoon Ianyuux xa kaxi‑i xavidi juun yutnu io andɨu xa kutuu‑i nɨkava nɨkuita.
Dani ma juejoon‑ia xa kɨu‑i ñuu ii xa niʼi‑i ntdaa xa n‑xe kodotnuni nuu libru dian —kuu‑ia,
n‑jaʼan‑ia.
20 N‑jaʼan ka Ia n‑kachitnuʼu ñaʼa ntdaa tnuʼu yaʼa nuu‑da:
—Xa kuyatni xa naxee‑r.
Te xiaʼan‑da nuu‑ia:
—Daa na koo.
Ndixi‑n nuda.
21 Na chindee chituu ñaʼa Jesús,
Ia kuu Xtoʼo‑ro ntdaa‑ro.