Manufau Jerusalem
21
Ma una fanunupaꞌaa hepalo manufau pumanugawe ma malagufu, uaa fei rawarawa pumanugawe ma malagufu na apaꞌai ma fai lomi agi. 2 Una fanunupaꞌaa fei Gufu Apuna, fei manufau Jerusalem fi nogio pu noranamai pafea aꞌa mei Haidaa ma na hawegidii aleꞌei hemea fananamai pifinee lalaia i nomai aꞌa mei harona. 3 Ma una guainaa hepalo baua lao na nomai aꞌa fei gutanaa hapara ma ware, “Eni fei gufuu mei Haidaa i oa aꞌa ei ramaꞌa ma i oafipui aꞌa roꞌou. Roꞌaa oanaa ramaꞌa gufuna. Ma mei Haidaa i oanaa Haidaniaa roꞌou. 4 I huguaa ranu pudaa minaa roꞌou. Fai lomi maꞌea o faloloaꞌia o aiꞌaiga o fiꞌia, uaa fei watanai maumau mina, na falogidigilao.” 5 Mei fi guta wagii fei gutanaa hapara na ware ba, “Uꞌei famanufaunaa minaa ei manumanu!” Ma ina ware ba, “Neꞌiꞌaugaa feni, uaa eni warea, inapaꞌaa rawani ma faꞌuai.”
6 Ina warenaa aꞌau ba: “Ina pedu. Yau fei Alpha ma fei Omega, fei Rawarawa ma fei Pedupedu. Hini na sigigi, a fani numana lomi ponoꞌana aꞌa fei ranuu harenua. 7 Hini i mua ipowe tonaa minaa eꞌeni manumanu eꞌeni ma yau a oanaa Haidaniana ma hia, i oanaa naꞌuu. 8 Maꞌuaa ei mamaꞌauhafelo, ei abaa narafaweꞌia, ei hafeloꞌa, ei rona foꞌafamaꞌe, ei fitatafipaꞌaia, ei rona bigiꞌaa ei siafa, ei rona losuinaa ei haidaa sifisifi mawe minaa ei sifisifi—gutanaa roꞌou i wagii fei hafi na guꞌaguꞌa fininaa babaiaa mugoo. Sifei, fei faguapoaa maꞌea.”
9 Hemea ei oloromea aloꞌalo, mei na paꞌi olorompalo lopi, ei na pepesu aꞌa ei olorompalo aꞌapoo mau funua hafelo namii ware aꞌau, “Nomai, a famaꞌaio mei pifinee lalai, mei haroo fei Naꞌuu Sipsipi.” 10 Ma aꞌa fei Spiriti ina poronaa yau aꞌa hefaa baua tarea maugeni ma famaꞌau fei baua gufu apuna, Jerusalem fi nogio noramiana i pafea aꞌa mei Haidaa. 11 Ina weꞌa aꞌa fei haweraa mei Haidaa ma fei agimena aleꞌei hepalo paꞌaa rawaniꞌa mugoo aleꞌei jasper, namina malewa aleꞌei crystal. 12 Ina paꞌi hepalo baua tarea nono ma hefua ma guapalo poaa fanefane wagina ma hefua ma helagui aloꞌalo aꞌa hepapalo poana. Fei neꞌia wagii ei poaa fanefane, ei haraa ei hefua ma guai pai Israel. 13 Odumanu poaa fanefane i pepei rai, odumanu i pepei oala, odumanu i pepei haraꞌuu ma odumanu i pepei hafaa. 14 Fei nonoo fei baua gufu na paꞌi hefua ma guapalo fasuꞌufufugoi ma pafoo hepapalo na paꞌi ei haraa ei hefua ma helagui apostle fei Naꞌuu Sipsipi.
15 Mei aloꞌalo, mei na fiwarewarei aꞌau, na paꞌi hepalo mau o, paꞌafina gold ba i tapainaa puduu malaa fei gufu, ei poaa fanefanena ma ei nonona. 16 Fei baua gufu na paꞌi obao nonona ma malaa hepapalo nonona na fiminaꞌei—manafana ma malana na fiminaꞌei ua. Mei aloꞌalo na tapainaa fei malaa fei gufu ma puduu fei malana aleꞌei 12,000 stadiaa ma fei manafana ma tarena ana aleꞌei. 17 Ina tapainaa fei nono ma fei piꞌoduanab aleꞌei 144 cubitc —aleꞌei fei tatapai ramaꞌa, fei i tapaina mei aloꞌalo. 18 Fei paꞌafii fei nono, paꞌaa jasper ma fei baua gufu, gold ua—lomi maꞌidadiai manumanu wagina ma na ramarama ua. 19 Ei fasuꞌufufugoi ei nonoo fei baua gufu, rona haweginaa watauda ei maumau rawaniꞌa mugoo. Fei rawarawa fasuꞌufufugoi, jasper, fei faguaiana, sapphire, fei faꞌoduaiana, chalcedony, fei faꞌobaoana, emerald, 20 fei fahaipaniana, sardonyx, fei faꞌoloroana carnelian, fei olorompaloana, chrysolite, fei fafainaroana, beryl, fei fafaimpaloana, topaz, fei fahefuana, chrysoprase, fei fahefuamapaloana, jacinth ma fei fahefua ma guapaloana, amethyst.d 21 Ei hefua ma guapalo poaa fanefane, paꞌafii roꞌou, pearl. Hepapalo poaa fanefane, minaa pearl ua. Fei baua talaa fei baua gufu fei, minaa gold ua ma na ramarama.
22 Lomi una fanunupaꞌaa hepalo humuu mei Haidaa laloo fei baua gufu fei, uaa mei Fasu, mei Faufau Haidaa ma fei Naꞌuu Sipsipi, lagua aleꞌei fei humuna. 23 Lomi bigiꞌaa fei halo, o fei puda aꞌa fei baua gufu fei ba lagunei faweꞌainia, uaa fei haweraa mei Haidaa na faweꞌainia ma fei Naꞌuu Sipsipi aleꞌei weꞌai lalona. 24 Ei ramaꞌaa ei gufu rona talai aꞌa fei weꞌaina ma ei haparaa fei malagufu rowe waduꞌainaa lalona fininaa ei haweraa roꞌou. 25 Lomi ba iwe fareꞌi ei poaa fanefanena, uaa lomi i paꞌi poi yei. 26 Ei ramaꞌaa ei baua gufu, rowe waduꞌia fininaa ei hawera ma honuaa roꞌou. 27 Lomi iwe paꞌi hepalo loloaa manumanu i waduꞌia. Ana lomi i waduꞌia nemea i bigiꞌaa ei maumau famamafaa, o sifisifiꞌa, maꞌuaa, uniaa ei na paꞌi haraa roꞌou laloo fei buꞌuu harenuaa fei Naꞌuu Sipsipi.