Fei Ranu Harenua
22
I dii, mei aloꞌalo na famaꞌaiau fei udeaa fei baua ranuu harenua, namina malewa aleꞌei crystal ma na wigimai aꞌa fei gutanaa haparaa, fei gutanaa mei Haidaa mawe fei Naꞌuu Sipsipi, 2 na wiginaloo memewaa fei baua tala i laloo fei baua gufu. Ma guapepei adii fei ranu na habe fei haihai harenua ma ina paꞌi hefua ma guapalo au hufuꞌa. Hepalo laloo hepapaloo ei hefua ma guapalo puda. Ma ei rau fei haihai, fapedupedu funuaa ei ramaꞌaa ei baua gufu. 3 Fai lomi i paꞌi umua. Fei gutanaa haparaa mei Haidaa mawe fei Naꞌuu Sipsipi i ude laloo fei baua gufu ma ei nafina, rowe losuinia. 4 Roꞌaa maꞌa pudana ma fei harana i pafoo rawaa roꞌou. 5 Fai lomi i paꞌi poi. Fai lomi bigiꞌana fei weꞌai o fei weꞌaa fei halo, uaa mei Fasu, mei Haidaa i weꞌainaa roꞌou. Ma roꞌou aleꞌei hapara ranimai ranimai.6 Ma mei aloꞌalo na warenaa aꞌau ba, “Eni warea eni napaꞌaa rawani ma faꞌuai. Mei Fasu, mei Haidaniaa ei spiritii ei mamamaꞌa na aloaa mei aloꞌalona ba nei famaꞌaa ei nafina tamanu anaa i nomai.”
Jesus fi Nomai
7 “Fanunu, anaa a nomai! Na paꞌi hawegiana mei i neneraa ei diwareꞌauga i laloo feni buꞌu.”
8 Yau, John, meni na guainaa eni manumanu eni ma fanunuaa eꞌei. Ma ei a guainia ma fanunuia, una fapasi i pinee mei aloꞌalo ba a losuinia, mei na famaꞌaiau eni manumanu. 9 Maꞌuaa ina warenaa aꞌau ba, “Apuna bigiꞌaa fei! Yau ana nafi aleꞌena yoi ma ei lofumu, ei roꞌou mamamaꞌa mawe minaa ei rona neneraa ei wareaa feni buꞌu. Losuinaa mei Haidaa!”
10 Ma ina warenaa aꞌau ba, “Apuna obainaa ei diwareꞌaugaa feni buꞌu, uaa fei au na rafiꞌi. 11 Hini ana fi bigifatata, faninaa nunumiana; hini ana fi bigifafelo, faninaa nunumiana; hini ana fi bigifarawani, faninaa nunumiana; hini ana fi fafaꞌarai faninaa nunumiana.”
12 “Fanunu, anaa a nomai! Fei ponoꞌa, i aꞌau ma a fani ponoꞌaa hememea ana aleꞌei ei bigiꞌana. 13 Yau fei Alpha ma fei Omega, fei Maꞌa ma fei Mugi, fei Rawarawa ma fei Pedupedu.
14 “Na paꞌi hawegiaa ei rona fesuaa ei hawaa uguu roꞌou uaa i ugainaa roꞌou mei Haidaa ba ro to aꞌa fei haihai harenua ma waduꞌai aꞌa ei poaa fanefanee fei baua gufu. 15 I augu, ei ponoto, ei rona bigiꞌaa ei mau siafa, ei fitatafipaꞌaia, ei rona foꞌafamaꞌe, ei rona losuinaa ei haidaa sifisifi ma minaa ei rona refubigiꞌaa ei sifisifi.
16 “Yau, Jesus, una aloawii mei aloꞌalou ba nei uꞌufanioa feni uꞌuga aꞌa ei losuu. Yau fei Wara ma Pai David ma fei agimee Piꞌu Arewaa.”
17 Fei Spiriti ma mei pifine lalaia, laguna ware ba, “Nomai!” Ma hini na guainia, ana nei ware ba, “Nomai!” Hini na sigigi, fanoramai; ma hini na paꞌi nunumiana, nei tonaa fei ranuu harenua, lomi ponoꞌana.
18 Uꞌei aweinaa minaa ei rona guainaa ei diwareꞌaugaa feni buꞌu: Nabaa nemea i augaa hepalodiai warea pafoo feni, mei Haidaa ana i pafoinaa fagianana wagii ei mau funua hafelo, ei na uꞌudigia feni buꞌu. 19 Ma hini na tosiminaa hepalo wareaa wagii feni buꞌuu diwareꞌauga, ana i tohadiweꞌinia aꞌana mei Haidaa, tamanu ina paꞌi wagii fei haihai harenua ma tamanu ina paꞌi laloo fei baua gufu apuna, fei na uꞌudigia feni buꞌu.
20 Mei i uꞌugaa eni manumanu eni na ware ba, “Hiꞌi, anaa a nomai eni.”
Amen. Nomai, mena Fasu Jesus.
21 Fei rawaniꞌaa mei Fasu Jesus i ude aꞌa ei apunaiaa mei Haidaa. Amen.