1000 Igisimasi
20
Ma una fanunupaꞌaa hemea aloꞌalo fi upugio gufu pafea fininaa fei gigigii fei walaloa lomi iaꞌiana ma na paꞌi hepalo baua alatai i panina. 2 Ina patarofaa fei dragon, fei waꞌa mina mina, fei hia haniꞌu, o Satan ma na faugia ba nei oa aleꞌei laloo hefa pufabaꞌa igisimasi. 3 Ina siminia laloo fei walaloa lomi iaꞌiana, fawiꞌia ma lotomia ba ineiꞌaa sifidinaa ei baua gufu nopaꞌaloo fei iaꞌiaa fei hefa pufabaꞌa igisimasi. Nenee fei, te ropowe alafatatalania maꞌida.4 Una fanunupaꞌaa ei gutanaa hapara, ei rona guta pafona, ei rona tonaa fei forafora ba roꞌaa fadududu. Ma una fanunupaꞌaa ei spiritii ei na mosu huaa roꞌou, uaa fei uꞌugaa roꞌou Jesus ma fei wareaa mei Haidaa. Lomi rona losuinaa fei manulelele o fei haduona ma lomi rona tonaa fei lalana i pafoo rawa o panii roꞌou. Rona weradiai ma haparaifipui aꞌa Christ laloo hefa pufabaꞌa igisimasi. 5 (Ei dufu maꞌea, lomi rona weradiai nopaꞌaloo fei iaꞌiaa fei hefa pufabaꞌa igisimasi.) Sifei fei rawarawa asiꞌana. 6 Ei ramaꞌa i paꞌi hawegia ma apunaiaa roꞌou wagii fei rawarawa asiꞌana. Fei faguapaloaa maꞌea lomi i famomoaa roꞌou, maꞌuaa rowe aleꞌei ei bauaniaa humuu mei Haidaa ma Christ ma roꞌaa haparaifipui aꞌana laloo hefa pufabaꞌa igisimasi.
Fei Fagianaa Satan
7 Iꞌa pedu fei hefa pufabaꞌa igisimasi, ropowe alaraa Satan aꞌa fei boboꞌaiana. 8 Ma iwe talaisifiꞌaa ei baua gufu aꞌa obaoei walasusuu feni malagufu—Gog ma Magog—ba i papaꞌifipuinaa roꞌou aꞌa fei fifoꞌaia. Puduu roꞌou aleꞌei ei piyee feni malagufu. 9 Rona talaifaweloinaa fawelei rona guta wagina ei apunaia, ei na haguaa roꞌou mei Haidaa, fei na paꞌi ei rafeiana wagina. Na pasigio hafi pafea ma guꞌafamatalaiaa roꞌou. 10 Mei haniꞌu, mei na sifiꞌaa roꞌou, mei Haidaa na siminia laloo fei huapu, fei na guꞌaguꞌa ei babaiaa mugoo wagina, ana fei inadoꞌo siminaa fei manulelele ma fei sifisifi mamamaꞌa wagina. Ropowe tonaa fagianaa roꞌou arewaa ma poi ranimai ranimai.
Rona Tonaa Dududua ei Maꞌea
11 Ma una fanunupaꞌaa hefaa baua poꞌiaa gutanaa hapara ma mei i guta wagina. Fei malagufu ma fei pumanugawe, laguna apaꞌai inamoana ma lomi gutanaa lagua. 12 Ma una fanunupaꞌaa ei maꞌea, ei na paꞌi baua haraa roꞌou ma ei lomi, rona u i maꞌaa fei gutanaa hapara ma ina lamiꞌaa ei buꞌu. Ma ina lamiꞌaa hepalodiai buꞌu, fei buꞌuu harenua. Ma ina dududuaa ei maꞌea ana aleꞌei ei bigiꞌaa roꞌou, ei na pana haraa roꞌou laloo ei buꞌu. 13 Ei maꞌea laloo agi, rona leleꞌamai ma ana rona leleꞌamai ei maꞌea aꞌa fei gufuu maꞌea ma Hades ma hememea ramaꞌa na tonaa dududuana ana aleꞌei ei bigiꞌana. 14 Ma ina siminaa fei gufuu maꞌea ma Hades i laloo fei hafi. Fei hafi, sifei fei faguapoaa maꞌea. 15 Hini lomi harana laloo fei buꞌuu harenua i siminia i laloo fei hafi.