Hallelujah
19
Nenee fei, una guainaa fei memeꞌii unuu hefaa baua gupuu ramaꞌa i gufu pafea ba:“Hallelujah!
Fei telaꞌana ma hawera ma faufau,
manumanuu mei Haidaniaa oꞌou,
2 uaa na faꞌuai ma wanewane ei dududuana.
Ina fafagianainaa mei paꞌaa pifinee tala,
mei na fafeloaa feni ano aꞌa ei fiharoharoipaꞌaiana.
Mei Haidaa na fani lagina uaa aꞌa fei namoo ei nafina.”
3 Ma rona mewaidiai ba:
“Hallelujah!
Na leleꞌataꞌamai fei hagu
aꞌa mei pifine mei ma dinaa pafea ranimai ranimai.”
4 Ei enu paꞌania ma gunaroa forafora mina mina mawe ei gunaroa manumanu na paꞌi fawewenii roꞌou, rona fapasinaa pu ma losuinaa mei Haidaa, mei fi guta pafoo fei gutanaa hapara. Ma rona mewaiware ba:
“Amen, Hallelujah!”
5 Ma hepalo lao noranamai aꞌa fei gutanaa hapara na ware ba:
“Uduginaa mei Haidaniaa oꞌou,
minaa hamuꞌou ena nafina,
hamuꞌou ena hamona maꞌauia,
hamuꞌou ena na paꞌi baua haraa hamuꞌou
ma hamuꞌou ena lomi!”
6 Ma una guainaa hefaa baua gupuu ramaꞌa, aleꞌei pasiaa mamaua ma parara ma rona mewaiware ba:
“Hallelujah!
Uaa mei Fasu, mei Haidaniaa oꞌou,
mei Faufaua fi haparai.
7 Onei niꞌeniꞌe ma wiwiwidi
ma uduginia!
Uaa fei lalaiaa fei Naꞌuu Sipsipi na nodigimai ma mei harona na hawegidii.
8 Rona haweginaa mei harona
aꞌa fei linen bauana ponoꞌana,
fei rona pagifarawaninia,
fei na agime ma poꞌi.”
(Fei linen fei, na haduoinaa ei wanewane bigiꞌaa ei apunaiaa mei Haidaa.)
9 Ma mei aloꞌalo na warenaa aꞌau ba, “Neꞌi aleꞌei ba: ‘Na paꞌi hawegiaa roꞌou, ei ina lalaꞌaa roꞌou ba ronei nomai aꞌa fei hananaa fei Naꞌuu Sipsipi!’” Ma na warediai ba, “Eꞌeni, eni faꞌuaia wareaa mei Haidaa.”
10 Aꞌa fei una fapasi i pinena ba a losuinia. Maꞌuaa ina warenaa aꞌau ba, “Apuna bigiꞌaa fei! Yau ana hemea nafi aleꞌei yoi ma ei lofumu, ei rona panarofaa fei uꞌugaa Jesus. Losuinaa mei Haidaa! Uaa fei uꞌugaa Jesus, sifei fei spiritii fei diwareꞌauga.”
Mei Rapiꞌaa fei Poꞌiaa Hosi
11 Una fanunupaꞌaa fei gufu pafea na gigi ma i maꞌau na paꞌi hepalo poꞌiaa hosi, mei rapiꞌa pafona, rona roroinia ba Oafagugu ma Faꞌua. Aꞌa fei wanewanea, i fadududu ma faꞌasiꞌanaa fifoꞌaia. 12 Guei pudana aleꞌei weguweguaa hafi ma pafoo tabana na paꞌi watauda tao. Ina neꞌi haraa ununa, fei lomi hemea na apaꞌia, ana unaia. 13 Ina hawegi aꞌa hefaa hawaa ugu, fei na paꞌi namo wagina ma fei harana, fei Wareaa mei Haidaa. 14 Ei ramaꞌaa foꞌaa i pafea, rona nenegia pafoo ei poꞌiaa hosi ma susuu roꞌou, ei linen bauana ponoꞌana, ei na poꞌi malewa. 15 Na leleꞌamai poana fei wararoa wadu, fei ba i fagianainaa ei baua gufu. “I famamoaa roꞌou fininaa fei o hapara, paꞌafina iron.” Ina hapuninaa fei fofoo wine, fei na haduoinaa fei sibaa mei Faufau Haidaa. 16 Pafo fei hawaa uguna ma fei hafauna na neꞌi fei hara:
HAPARAA EI HAPARA MA FASUU EI FASU.
17 Ma una fanunupaꞌaa hemea aloꞌalo na u laloo fei halo ma na mewaifabauana aꞌa minaa ei manufidufidu, ei roi fifidau haroo pafea ba, “Nomai, figupui ba oꞌaa guta wagii fei baua hananaa mei Haidaa 18 ba hamonei hanaiaa ei pigioo ei hapara, bauaniaa foꞌaa, faufau ramaꞌa, ei hosi ma ei rapiꞌaa roꞌou ma pigioo minaa ei ramaꞌa, humuwa ma abaa humuwa, ei rona paꞌi baua haraa roꞌou ma ei lomi.”
19 Ma una fanunupaꞌaa fei manulelele ma ei haparaa feni malagufu ma ei foꞌaa roꞌou, rona figupui ba roꞌaa fifoꞌai aꞌa mei rapiꞌa pafoo fei hosi mawe ei foꞌaa i aꞌana. 20 Maꞌuaa rona patarofaa fei manulelele fipuinaa mei sifisifi mamamaꞌa, mei nadoꞌo bigiꞌaa ei hilalaa foigia ba i hadumaa fei manulelele. Aꞌa ei hilala ei, ina sifiꞌaa ei rona tonaa fei lalaa fei manulelele ma losuinaa fei haduona. Ana laguꞌei fawewenai ma rona siminaa lagua pu aꞌa fei hafi, fei fi guꞌaguꞌa ma na paꞌi babaiaa mugoo wagina. 21 Rona paugifamaꞌenaa ei dufuu roꞌou wagii fei wadu, fei i leleꞌamai poaa mei rapiꞌa pafoo fei hosi ma minaa ei manufidufidu, rona hanafamagu aꞌa ei pigioo roꞌou.