Na Pasi Babylon
18
Nenee fei, una fanunupaꞌaa hemeadiai aloꞌalo fi nogio pafea. Na bauanai foraforana ma feni ano namina weꞌa aꞌa fei agimee ununa. 2 Ina harofabauana ba: “Na pasi! Na pasi fei Baua Gufu Babylon!
Hia nawe oanaa humuu ei pigea
ma pale aꞌa minaa ei hafeloꞌaa spiriti,
mawe watauda ei mau loloaa spiriti
mawe ei hafeloꞌa manufifidau.
3 Uaa minaa ei baua gufu, rona hunudigaa
fei poapoa wine wagii ei fiharoharoiana.
Ei haparaa feni ano, rona fiharoharoifipui aꞌana,
ma ei ramaꞌa rona aloꞌalo ma ponopono aꞌa feni ano,
rona paꞌi watauda manumanu wagii ei watauda manumanuna.”
4 Ma una guainaa hepalodiai lao noramiana pafea na ware ba:
“Walaꞌamai aꞌana, ena gufuu,
ba lomi hamoꞌaa tonaa
ei hafeloꞌana ma ei fagianana;
5 uaa ei hafeloꞌana namina dupunaa i gufu pafea ma mei Haidaa na nonominaa ei bigifatatana.
6 Fani aꞌana ana aleꞌei hia na fani;
fani faguapoai lagina aꞌa tamanu na bigiꞌia.
Fani faguapoai numana aꞌa fei ana barana.
7 Fani fiꞌia ma faloloaꞌia aꞌana
ana aleꞌei fei hawera ma rawaniꞌa ina tonia ana unaia.
I laloo naranarana na famamagugui,
‘Yau na guta aleꞌei pifine hapara;
yau abaa maꞌesuabea,
ma lomi ba awe aiwawasusu.’
8 Siꞌei, laloo heai ua arewaa ei hafeloꞌana iwe fuaꞌonia:
maꞌea, aiwawasusu ma mouabiabia.
Fei hafi i guꞌafamatalaia,
uaa na paꞌi faufauna mei i dududuia,
mei Fasu, mei hia Haidaa.
9 “Ena rona fanunupaꞌaa fei haguna ei haparaa feni ano, ei rona fiharoharoifipui aꞌana ma tofipui aꞌana ei rawaniꞌa manumanuna, roꞌaa aiꞌaigia ma aiwawasusu. 10 Roꞌaa maꞌaufafelo aꞌa fei fagianana ma roꞌaa ufaraua ma mewai ba:
“‘Fagiana! Fagiana, yoi fena baua gufu,
yoi Babylon, fena faufau baua gufu!
Laloo heai ua hour ma ona tonaa fagianamu!’
11 “Ei ramaꞌaa aloꞌaloa ma ponoponoꞌa aꞌa feni ano, roꞌawe aiꞌaigia ma aiwawasusu uaa lomi nemea na fai ponodinaa ei manumanuu roꞌou— 12 ei manumanu gold, silver, mau rawani mugoo, ei pearl; ei waduduu linen, purple, silk ma roa lawalawa; minaa ei mau haihai citron, ei manumanu ivory, rawaniꞌa haihai, bronze, iron ma marble; 13 cinnamon ma spice, dufaa pao, myrrh ma frankincense, wine, pao olive, fei palaua na bauana ponoꞌana, wheat, budumaꞌao ma sipsipi; hosi ma pale na paꞌi welona; ma ei hudi unuu ramaꞌa ma spiriti roꞌou.
14 “Roꞌawe ware ba, ‘Ei nunumiamu fua na apaꞌai aꞌamu. Minaa ei manumanumu ma haweramu na apaꞌai, fai lomi owe paꞌia.’ 15 Ei ramaꞌa rona aloaa ei manumanu ei ma to mugoo poꞌi aꞌa mei pifine mei, roꞌaa ufaraua ma maꞌaufafelo aꞌa fei fagianana. Roꞌaa aiꞌai ma aiwawasusu 16 ma mewai ba:
“‘Fagiana! Fagiana yoi fena baua gufu,
fena ona susuinaa fei linen na bauana ponoꞌana, purple, roa,
agimana aleꞌei gold, ei rawaniꞌa mugoo ma ei pearl!
17 Laloo heai ua hour ei watauda manumanu
nawemina hafelopaꞌai!’
“Minaa ei rapiꞌa i agi ma minaa ei rona taletale pafoo ei baua wa mawe minaa ei diaꞌagi, roꞌawe ufaraua. 18 Ena rona fanunupaꞌaa fei haguna, roꞌawe ware, ‘Haa, na paꞌi gufu namina rawani aleꞌei mina?’ 19 Roꞌawe larosimai piye pafoo tabaa roꞌou fininaa aiꞌaiga ma aiwawasusua ma mewai ba:
“‘Fagiana! Fagiana, yoi fena baua gufu fena,
i aꞌamu minaa ei baua wa agi,
rona to mugoo poꞌii roꞌou!
Laloo heai ua hour ona tonaa fagianamu!
20 Onei niꞌeniꞌe wagii fei fagianana, fena gufu pafea!
Niꞌeniꞌe ena apunaiaa mei Haidaa
ma ena apostle mawe ena mamamaꞌa!
Mei Haidaa na dududuia wagii fei bigiꞌana aꞌa hamuꞌou.’”
21 I dii, hemea faufau aloꞌalo na poroꞌaa fei baua mugoo lalaꞌana aleꞌei hepalo baua naꞌanaꞌa ma bainafaꞌinaa agi ma ware ba:
“Aꞌa fei mau baꞌananarai pani
roꞌawe siminaa pu fei baua gufu Babylon
ma fai lomi oꞌaa fanunupaꞌidinia.
22 Ei laugaa ei hafugaa harp, ei ramaꞌaa lalauga,
ei hugufaa flute ma maniwa,
fai lomi oꞌaa guaipaꞌidinaa roꞌou.
Lomidiai ba nemea bigibigiꞌa
i bigi i lalomu.
Fai lomi oꞌaa guaipaꞌidinaa
roiaa hai.
23 Fai lomidiai i weꞌa
ei weꞌai i aꞌamu.
Fai lomidiai ba oꞌaa guaipaꞌidinaa
lao ei wawane ma pifine lalaia.
Ei ramaꞌa aloꞌaloa ma ponoponoꞌa aꞌamu mina,
ronamina mua aꞌa feni ano.
Aꞌa ei maumau puala ona paꞌi,
minaa ei baua gufu na pasi wagina.
24 Aꞌa mei pifine mei, na paꞌi fei namoo ei mamamaꞌa
ma ei apunaiaa mei Haidaa,
mawe minaa ei foꞌafamaꞌeaa hefiꞌa yeni malagufu.”